O LE AVE PASI A’OGA

Vaega e 20

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 20.

**************************************************************************

Ua saofa’i ifo le pulea’oga ma ona foliga ua pei ua segia ona ua va’ai i se tagata na maliu ae ua toe tu a’e, ina ua ia fa’alogo atu i le faamatalaga a le alii leoleo.

Na toe fa’asolo mafaufauga o le pulea’oga i foliga uma lava o tamaiti a’oga ia sa i luga o le pasi a’oga lea na faafoeina e Paulo, i le tele o taeao ma aoauli pe a tu’ua aoga.

Ma amata lagonaina e le pulea’oga le faamanuiaina tele o le latou a’oga, ona o le le’i a’afia pe maliu se tasi o fanau aoga, i le alii pasi o Paulo.

Ua tilotilo atu nei le pulea’oga i le taitai leoleo ma ia fesili atu e faapea, “E manaomia ona faamatalaina lea tulaga i matua?”

Sa manavanava loloa le taitai leoleo ma faapea atu i le pulea’oga, “E lelei pe a logo le komiti faafoe a le aoga, e fai se tou tala po o le a se tou faamatalaga o le a tu’uina atu i matua e tusa ai ma lenei mataupu.”

Ua fa’aauau loa ona savali ese atu le pulea’oga ae ua nofonofo ai tau o le pulea’oga ma ona mafaufauga i le ripoti sa tu’uina atu e le taitai leoleo, e uiga i le alii ave pasi a’oga o Paulo.

Na alu lena po ua tau le lelei se moe a le pulea’oga.  Ae ua mae’a ona ia taloina se fonotaga ma totino o le komiti faafoe, i le taeao e soso’o ai.

Ua usupo lava le pulea’oga i le falea’oga ma ua mae’a ona alu le fa’asalalauga, talu ai le faalavelave na tupu, ua le faia ai ni a’oga i lea aso.  Ae ua tu’uina atu fanau e faatasi ma o latou matua ma aiga.

Ua aofia potopoto ia le komiti faafoe a le aoga ma nofo faatalitali mai i le o’o atu o le pulea’oga.  Sa tau fai mata’i uma e totino o le komiti faafoe ia le ulufale atu o le puleaoga ma ia saofa’i ifo i lona laulau ma ona foliga, e pei ua leva ona tagi.

[E FAIA PEA]