O LE AVE PASI A’OGA

VAEGA 19

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, ae o le a fa’aauau atu le tatou Fagogo – O LE AVE PASI A’OGA.

*********************************************

Sa gata mai le tatou Fagogo i le vaiaso ua mavae, ina ua fa’ata’ape e le pulea’oga ia fanau a’oga i o latou aiga.  Ma o le taimi lea, ua toe ai na’o le pulea’oga ma le ta’ita’i leoleo i totonu o le fale a’oga.

E savali atu le taitai leoleo e alu, ae ona maua se telefoni ma sa tu ma toe liliu mai i le mea o iai le pulea’oga.  Na va’aia e le pulea’oga le fa’anunumi o foliga a le taitai leoleo ma fai lana telefoni.

Ina ua mae’a, sa fai sina umi ona punou le taitai leoleo ma valu le ulu pei e mageso.

Ona ia ea mai lea i luga ma toe fesili atu i le pulea’oga, “O le a le umi talu ona ave pasi ia Paulo i le tou aoga?”

Na fai sina fa’ate’ia o le pulea’oga i le fesili a le taitai leoleo, ma ua ia nofo ma tau mafaufau le umi na ave pasi ai Paulo i le aoga.

“Ua savali nei le fa tausaga,” o le tali mai lea a le pulea’oga.  “E iai se mea ua tupu?”

Ae peitai, sa le’i tali sa’o mai le alii leoleo i le fesili a le pulea’oga, ae ua na’o na toe tatao atu o leisi ana fesili ma ia faapea atu, “E fa’afia ona su’esu’eina a outou ave pasi i tulaga o fuala’au faasaina po o ‘ava malolosi?”

Ua amata ona popole le pulea’oga i le leo o le fesili a le taitai leoleo ma ia tali atu faapea, “E fai i amataga o tausaga a’oga ta’itasi.”

“O lona uiga, o le taimi mulimuli na su’esu’e ai tou ave pasi i tulaga o fualaau faasaina ma ‘ava malosi, o Setema o le tausaga ua tuanai?  Ae o lea ua lata ia Iuni?” o le toe fesili atu lea a le taitai leoleo.

“Ioe, e sa’o lea,” o le tali mai lea a le pulea’oga.

Ua toe nofo le ta’ita’i leoleo ma punou ma na fai sina umi, e leai sana tala na fai mai i le pulea’oga.

Ona ia ea a’e lea i luga ma faapea atu i le pulea’oga.  “A o’o nanei, ae e te le’i taoto ifo i lou moega, ia e manatua, e tootuli ifo i ou tulivale, ma fa’afetai i le Atua mo le fa’asaoina o ola o fanau aoga uma sa i luga o le pasi.”

“O le tagata lea sa ma talanoa i le telefoni, o le foma’i fa’apitoa lea o lo’o faia suesuega i le tino maliu o Paulo, lau ave pasi.  Fai mai a ia, e ofo i le mamao o le mea na o’o iai le pasi, ae e le’i lavea.  Ona o lo’o matua’i tumu le tino o le alii ave pasi ma fuala’au faasaina.”

[E FAIA PEA]