O LE AVE PASI A’OGA

Vaega e 18

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 18.

*****************************************************

A’o talatalanoa ia le Pulea’oga ma le taitai leoleo, sa tatagi le telefoni a le taitai leoleo ma ia tago i le tali.

Na fai sina umi o talatalanoa ia le taitai leoleo ma le tagata i luga o le telefoni, ona ia tu’u lea i lalo o lana telefoni ma liliu mai i le pulea’oga, ua fai sina suiga i ona foliga.

“E iai se me aua tupu?” o le fesili atu lea a le puleaoga.

Na fai sina umi o nofo le ta’ita’i leoleo ua leai sana tala, ae ua na’o le punou ma valuvalu lona ulu.

Ona ia ea mai lea i luga ma toe fesili atu i le pulea’oga, “O le a le umi talu ona ave pasi ia Paulo i le tou aoga?”

Na fai sina fa’ate’ia o le pulea’oga i le fesili a le taitai leoleo, ma ua ia nofo ma tau mafaufau le umi na ave pasi ai Paulo i le aoga.

“Ua savali nei le fa tausaga,” o le tali mai lea a le pulea’oga.  “E iai se mea ua tupu?”

Ae peitai, sa le’i tali sa’o mai le alii leoleo i le fesili a le pulea’oga, ae ua na’o na toe tatao atu o leisi ana fesili ma ia faapea atu, “E fa’afia ona su’esu’eina a outou ave pasi i tulaga o fuala’au faasaina po o ‘ava malolosi?”

Ua amata ona popole le pulea’oga i le leo o le fesili a le taitai leoleo ma ia tali atu faapea, “E fai i amataga o tausaga a’oga ta’itasi.”

“O lona uiga, o le taimi mulimuli na su’esu’e ai tou ave pasi i tulaga o fualaau faasaina ma ‘ava malosi, o Setema o le tausaga ua tuanai?  Ae o lea ua lata ia Iuni?” o le toe fesili atu lea a le taitai leoleo.

“Ioe, e sa’o lea,” o le tali mai lea a le pulea’oga.

Ua toe nofo le ta’ita’i leoleo ma punou ma na fai sina umi, e leai sana tala na fai mai i le pulea’oga.

Ona ia ea a’e lea i luga ma faapea atu i le pulea’oga.  “A o’o nanei, ae e te le’i taoto ifo i lou moega, ia e manatua, e tootuli ifo i ou tulivale, ma fa’afetai i le Atua mo le fa’asaoina o ola o fanau aoga uma sa i luga o le pasi.”

“O le tagata lea sa ma talanoa i le telefoni, o le foma’i fa’apitoa lea o lo’o faia suesuega i le tino maliu o Paulo, lau ave pasi.  Fai mai a ia, e ofo i le mamao o le mea na o’o iai le pasi, ae e le’i lavea.  Ona o lo’o matua’i tumu le tino o le alii ave pasi ma fuala’au faasaina.”

[E FAIA PEA]