O LE AVE PASI A’OGA

VAEGA 15

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

*************************************

Sa fa’agata mai le tatou Fagogo i le vaiaso ua mavae, ina ua tupu le fa’alavelave i luga o le alatele, a’o taumafai le alii ave pasi a’oga o Filipo ma le inisinia a le a’oga, e sui le pa’’u o le pasi a’oga lea na pa.

Ma na galulue Filipo ma le alii inisia i le itu na latalata i le alatele, ma ai o se mea faiaina le savali ‘ese mai o le alii inisinia, ma maulu i lalo o le pasi, e su’e mai le nati sa ta’avale ai.  Ae ua toe ai na’o Paulo i tafatafa o le pasi, ae so’a loa e le taavale a le tamaitai o Epi.

I se taimi mulimuli ane, sa faamatala e se tasi o tamaititi aoga e faapea, na pei o se ata ‘slow motion’ le mea sa tupu.  I le latou va’aia o le savali fa’ata’amilo mai i le pito i tua o le pasi, ia le alii inisinia ma mauu i lalo o le pasi.

Ae o le taimi lena, o lo’o tu pea ia Filipo i le itu o le pasi e latalata i le alatele.

Atonu o se fa’amanuiaga le le va’ai tonu o tamaiti a’oga i le taimi na so’aina ai e le taavale a Epi ia le alii ave pasi a’oga.  Ae na o le pau le mea sa lagona e tamaiti a’oga, o le pa’o, i le taimi na so’a ai e le taavale a Epi ia Filipo.

Sa lolofi atu uma ia leoleo i lea vaega o le alatele, faatasi ai ma le taavale a le falema’i.  Ma e le’i pine, ae taunu’u foi ma le pulea’oga, ona ua ia maua le tala, o lo’o iai fanau a’oga i le nofoaga na tupu ai le faalavelave.

E taunu’u le pulea’oga, ua na’o le feopoopoa’i solo o tamaiti a’oga ma fetagisi.  Ua fiu leoleo e tau fa’atalatalanoa i latou, ae peitai, ua le mafai e se tasi ona tautala, ona o le tulaga ‘ese o le mea ua o latou o’o iai i lea taeao.

Sa va’aia foi e le pulea’oga le fa’atalanoaina e leoleo o le alii inisinia a le a’oga, i se nofoaga e le mamao teisi atu ma le mea o tupu ai le faalavelave.

Na talosagaina loa e le pulea’oga ia leoleo, ina ia mafai ona vala’au ia matua o fanau a’oga, e o mai e piki a latou fanau.

Ae peitai, sa fa’atonuina e le ta’ita’I leoleo na iai, ia le momoliina atu uma o fanau a’oga i le falea’oga, e mafai ona piki ai iina e matua.

[E FAIA PEA]