Nonofo tatalo aiga o ali’i na maliliu i Amouli faaiuga o suesuega a Leoleo

Pago Pago, AMERIKA SAMOA - 

E  ui e lei fesootai atu lava Leoleo i aiga o ali’i e to’alua ia na maua o la tino maliliu o opeopea i le sami i Amouli i le po o le aso Gafua o le vaiaso na te’a nei, mo le fesiligia o i latou e tusa ai o ni isi faamatalaga faaopoopo e ono fesoasoani i le latou suesuega, atoa ai ma le faailoaina atu o le tulaga o lo o aga’i i ai a latou suesuega, o lo o faaauau pea ona nonofo tatalo aiga-na-lua ma le talitonuga atoatoa, o le faaiuga o le suesusega a Leoleo o le a mafai ai loa ona tali le tele o le mau fesili e le o mafai ona taliina i le taimi nei, i lo latou fia iloa lea o le mafua’aga moni o lenei fa’alavelave.

E pei ona taua e aiga-na-lua, o ituaiga manu’a o loo aafia ai foliga ma ao (ulu) o i laua ua mailiu, ua momoli mai ai masalosaloga, e le i malelemo i laua nei e pei ona taua ai i ulua’i ripoti sa tuuina mai e molimau.

O le aoauli o le Aso Sa na te’a nei, tusa lea ua 6 aso talu ona tuana’i le faalavelave na asia ai e aiga e lua le nofoaga na mulimuli vaaia ai tino o i laua e to’alua ua maliliu mo le ofoina atu i ai o teu fugalaau e faailoa ai lagona misia ma le ootia o lo o ufitia ai paia o aig-na-lua.

O i laua ua maliliu e aofia ai le susuga a Alofa Christian Togia o Aoa, ua faaipoipo ma ua to’afa ona alo, ma le susuga a Junior Toleafoa o Amouli lava, ua faaipoipo fo’i ma e to’atasi lona alo o lo o i ai.

I se faatalatalanoaga ma le Samoa News, na taua ai e le faletua o Alofa ia Frances June Saelua-Togia le misia o si ana pele i le aiga ma le mafutaga, i ona iuga tausaafia ma le faagalo gata.

O Alofa, o se Tama e loto alofa i lona aiga, e naunau fo’i mo se mea lelei mo lona aiga. E aga malie ma fiafia e faauo atu i soo se tasi. O se tagata e atamai toe lelei lona soifua a’oa’oina, o se Tama fo’i e fiafia e ta’ita’i lona aiga i ala o le Atua, o ia fo’i o se Tama e mata’u ma ‘ava i le Atua.

“E tumu o ia i le alofa i lona aiga. Na te faia soo se mea ina ia mafai ai ona nonofo faatasi ma fai fai mea fa’atasi lona aiga. O se tagata e le solomuli gofie ae finau lava mo le manuia o lona aiga.”

Na taua atili e le Tina i le Samoa News lagona faateia o nai ona alo ina ua latou agai atu i le Falema’i o le LBJ i Faga’aalu i le po lea ma latou vaaia ai le tino maliu o si o latou Tama. Na ia taua le faigata ona ia faamatalaina le vaaiga sa ia molimauina i lea po, i le vaavaai atu o si ana fanau a o taoto mai le tino maliu o lo latou Tama.

Na taua e nisi o le aiga le misia o le mafutaga ma le susuga a Alofa. O ia o se tasi o tautai o le gataifale, e lelei lana ‘aau, e masani fo’i i soo se ituaiga tai.

“E le taliaina e lo matou aiga ripoti o Alofa na tafea ina ua alu e togi lana upega. E masani lelei Alofa i le gataifale, e le mafai fo’i ona alu e fagota pe afai na te iloa o loo faaletonu le tai,” o le molimau lea a se tasi o aiga o Alofa.

O le susuga a Alofa na faauu mai i le Aoga Maualuga a Samoana, ma aga’i atu ai loa i Hawaii mo le fa’aauauina ai o lona soifua a’oa’oina i le Iunivesite a Hawaii i Manoa faapea ai ma le Kolisi o le Kapi’olan Community College. 

O nisi o vaega o le malo sa galue ai Alofa e aofia ai le Ofisa o le ‘American Samoa Preservation’ i le tulaga o le ‘Archaeological Field Assistant’; sa galue fo’i o ia i le Pulega o le Suavai ma le Eletise a Amerika Samoa (ASPA) i le tulaga o le ‘Archaeological Technician’; galue i le Ofisa o le ‘Kalihi Palama Health Center’ i le tulaga o le ‘Patient Service Representative’; ma toe galue ai loa fo’i i le ASPA i le tulaga o le ‘Archaeological Monitor’.

O le susuga a Junior Toleafoa e pei ona taua e nisi o lona aiga, o ia o se tagata e faigofie lona soifuaga. E fiafia i soo se taimi e naunau fo’i e mafuta atu i ana uo ma soo se tasi e fesoota’i atu i ai.

“E le i talitonu lo matou aiga i le taimi na maua ai le tala o Junior ua maliu ina ua malemo i le sami. O ia o se tagata e masani i le gataifale, o lona olaga atoa fo’i lava o le sami i soo se taimi e alu ai e fagota,” o le molimau lea a se tasi o le aiga.

E le o taliaina fo’i e le aiga le faamatalaga a le molimau na mua’i maua tino maliliu o i laua nei e faapea, na tafefea i laua i le malosi o le ‘au. Na taua e nisi o le aiga e faapea, o manu’a i le ulu o Junior faapea ai ona foliga e atagia mai e le i maliu o ia ona ua malemo, ae na maliu ona o se isi faalavelave.

Ae faatoa mafai ona faamaonia nei masalosaloga pe afai ae mae’a suesuega a ali’i Leoleo o lo o faagasolo i le taimi nei.

O le susuga a Toleafoa sa galue o ia i le Tool Shop i Malaloa ao le i tula’i mai le faalavelave e pei ona amia ai lona soifua.

MOLIMAU ESEESE

E talitonu aiga-na-lua e tatau ona matua su’esu’e e Leoleo i lenei mataupu, ma taumafai e saili mau faamaonia e ono fesoasoani ai i le latou suesuega. 

E pei ona taua e le Pulenu’u o le afioaga i  Amouli i se faatalatalanoaga ma le Samoa News, faapea ai le Faletua ia Saelua-Togia i le Aso Faraile na te’a nei, tusa lea ua 4 aso talu ona mae’a le faalavelave, e i ai vaega o le faamatalaga a le alii Pulenu’u e le o tutusa ma faamaumauga na latou maua mai i molimau e faatatau i le fa’alavelave sa tula’i mai.

Na taua e le Pulenu’u i le faatalatalanoaga ma le Samoa News, lona maua o le moliuila fagota na alu ma Alofa i tai i le sami, ma ua malepe fo’i le moli uila. Sa ia taua atili fo’i e faapea, o loo ia teuina i totonu o lona fale le moliuila. 

E talitonu le aiga o Alofa, o le isi lea mea molimau sa tatau i Leoleo ona latou aveeseina atu i le taimi na amata ai le latou suesuega. E oo fo’i i meatotino a Alofa sa i ai pea lava i le fale o le Pulenu’u, lea na faatoa aveese mai i le aso Faraile, e talitonu Saelua-Tufuga, sa tatau fo’i i Leoleo ona latou aveese atu meatotino nei mai le fale o le Pulenu’u, aemaise lava le Telefoni, atonu e mafai ona fesoasoani ai i a latou suesuega, poo ai le tagata na mulimuli lava talanoa ma Alofa i lana telefoni i le po lea ae lei maua lena o lona tino maliu.

Ua talosagaina e aiga o alii ua maliliu ia Leoleo Suesue o lo o gafa ma le suesueina o lenei mataupu ina ia taga’i toto’a i mea molimau mai le nofoaga na tula’i mai ai le fa’alavelave, ina ia fesoasoani i le sailia o le mea moni lava na mafua ai ona maliliu Alofa ma Junior. 

E le o taliaina e aiga-na-lua ripoti e faapea na malelemo ma tafefea i laua nei i le malosi o le sua o le tai.

Na maua e le Samoa News le kopi o le ripoti o le tau mai le Ofisa Vaai Tau i Tafuna e tusta ai o le tulaga o le tau i lea afiafi.