Nofovaavaaia tama’ita’i faigaluega a le TSA mo le 2 tausaga

Ua fa’amalumalu e le fa’amasinoga maualuga le tu’uina atu o sana fa’asalaga fa’a falepuipui fa’asaga i le tama’ita’i faigaluega a le Ofisa o le o Fela’uaiga a le malo o Amerika (US Trasportation Security Administration - TSA) lea ua ta’usala i le moliaga mama o lona faia o fa’amaumauga sese i le pepa fa’atumu a se tagata malaga, ae ua fa’anofovaavaaia o ia mo le 2 tausaga i lalo o tuutuuga a le fa’amasinoga e ao ona ia usita’i i ai.

O ni isi o tuutuuga o le nofovaavaaia a Cindy Mailo ua tu’uina atu e le fa’amasinoga maualuga, e aofia ai lona totogiina o le salatupe e $500, aua ne’i ona toe solia se tulafono, a ia avea o ia ma tagatanu’u lelei e tausisi ma usita’i i tulafono uma a le malo, ma aua ne’i alu i le vaega o lo o i ai le potu e fa’atalitali ai pasese mo le malaga atu i le va’alele, se’i vagana o ia o se tasi o le pasese ua sauni e malaga.

I le taimi o fa’afinauga mo se fa’asalaga mo Mailo, na finau ai le loia a Mailo ia Sharron Rancourt e fa’asa’o se vaega o le ripoti a le Ofisa Fa’anofovaavaaia, lea o lo o taua ai e fa’apea, o le gaioiga sa faia e Mailo e ala i lona fa’atumuina o le pepa a se tagata sa malaga, na mafua ai ona maua le avanoa o lea tagata e alu ese atu ai o ia mai le atunu’u, peita’i na fa’auilavea le afioga i le fa’amasino sili ia Michael Kruse ma saunoa e fa’apea, e ui i le tele o itu e tatau ona iloilo e le fa’amasinoga i lenei mataupu, na pau le itu e taga’i i ai le fa’amasinoga, o le fa’avae lea o lana fa’aiuga i le moliaga lea ua tali ioe ai Mailo.

Na fa’atoese Mailo i le fa’amasinoga e tusa ai o lana solitulafono sa faia, ma ia talosagiana ai se isi avanoa mo ia se’i fa’aauau ai pea lana tausiga i lona aiga aemaise lava fanau. Na molimau fo’i se ali’i Epikopo e Ekalesia fa’atasi ma Mailo ma ia fa’ailoa i le fa’amasinoga itu lelei o le ua molia i totonu o lona aiga ma le Ekalesia.

Na lagolagoina e le itu a le malo le fa’afinauga a Rancourt ina ia fa’anofovaavaaia Mailo, ae aua ne’i tu’uina atu se fa’asalaga fa’a falepuipui ia te ia. Na finau atili Rancourt e fa’apea, o le fa’alavelave e pei ona ta’usala ai Mailo e le fa’amasinoga, na alia’e mai i le taimi a o galue o ia i le vaega o le Puipuiga mo Fela’uaiga (TSA agent), lea na ia fa’atumuina ai le pepa malaga se ali’i sa faia sa laua mafutaga i lea vaitaimi, o ia lea o [Johnny] Ah Mu.

E le i umi se taimi na malolo ai ali’i fa’amasino mo le iloiloina o sa latou fa’aiuga, ae latou tu’uina mai loa le fa’asalaga fa’anofovaavaaia mo Mailo.

O Mailo na ulua’i tu’uaia e le malo i moliaga mamafa e 2, le moliaga o lona fesoasoani i se tagata e malaga ese ma le atunu’u ina ia le mafai ai ona molia o ia, fa’apea ai ma le moliaga o lona fa’alavelave lea i taumafaiga e molia lea tagata, o ni moliaga e mafai ona fa’asala ai o ia i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, ae i lalo o se maliliega na sainia e Mailo ma le malo, na malie ai le malo e tali ioe le ua molia i le moliaga mama o lona tu’uina atu o ni fa’amaumauga sese, o se solitulafono mama i le vaega B.

E leai se fa’asalaga fa’a falepuipui na manatu le fa’amasinoga e tu’uina atu mo Mailo, ae o le umi e 5 aso lea na taofia ai o ia i le toese i le taimi na fa’atoa faila ai lana mataupu, o le a fa’aaoga lea e fai ma ona fa’asalaga i lona le fa’amaoni.

O le mataupu e pei ona ta’usala ai Mailo e le fa’amasinoga maualuga, na alia’e mai ina maua e le malo i ana su’esu’ega, o le aso 1 Tesema 2014 na tuua ai e Johnny Ah Mu le teritori o Hawaii, e iu o lo o i ai se poloaiga na sainia e le fa’amasinoga e fa’asa ai ona tuua e Ah Mu le atunu’u, ona o lo o fa’agasolo su’esu’ega fa’asaga ia te ia, e mafua mai i le mataupu lea o lo o tu’uaia ai o ia, i lona ave fa’agaoi o se vaega tupe mai le kamupani va’alele a le Polenisia Airlines, a o avea ai o ia o se tagata faigaluega (Cargo agent).

O le aso 11 Iuni 2011 na logo ai e se sui o le kamupani va’alele a le Polenisia le tupe ua leiloa i Leoleo, ma amata ai loa su’esu’ega fa’asaga ia Ah Mu, e aofia ai ma le tu’uina atu e le Ofisa o le Loia Sili o se poloaiga e taofia ai o ia mai lona tuua o le atunu’u. Sa aofia ai fo’i i totonu o le poloaiga e taofia ai Ah Mu mai lona tuua o le atunu’u, le fa’asa lea o Ah Mu ona ia taumafai e faia se gaioiga e sola pe tuua ai le atunu’u.

O le aso 8 Iulai 2014 na fesiligia ai e ni Leoleo su’esu’e se to’alua ia Ah Mu e tusa ai o le tupe o lo o tu’uaia ai o ia na leiloa mai i le Polenisia. Na taua i fa’amaumauga a le fa’amasinoga le fa’afeso’ota’i e Ah Mu o le Ofisa a le Loia Sili ma ia fesiligia ai, po o i ai se poloaiga e fa’asa ai o ia ona ia tuua le atunu’u, ae na fa’ailoa i ai e se sui o le Ofisa a le Loia Sili le tagi a le kamupani va’alele a le Polenisia ua faia fa’asaga ia te ia, ae tatau ona ia talanoa i le kamupani va’alele a le Polenisia ina ia mafai ai ona aveese lona igoa.

I le aso 1 Tesema 2014 e pei ona taua i fa’amaumauga a le fa’amasinoga, na fetaui ai Mailo ma Ah Mu i le malae va’alele a o galue ai Mailo o se sui o le TSA, ma fa’atumua i loa e Mailo le pepa a Ah Mu e fa’ailoa ai fa’amatalaga mo lana malaga, ma ia (Mailo) ai le igoa o Ah Mu e fa’ailoa mai ai ua sa’o uma fa’amatalaga ua tusia i le pepa fa’atumu.

Na taua fo’i i fa’amaumauga a le fa’amasinoga le aga’i atu o Mailo ma talosaga i se tagata faigaluega a le Ofisa o Femalagaaiga i le malae va’alele, mo se avanoa e siaki ai pepa malaga a Ah Mu ao le i oo i le taimi e gasolo ai le pasese, ina ia mafai ai ona ia malaga, peita’i ina ua siaki atu e le tagata faigaluega a le Ofisa o Femalagaaiga ana fa’amaumauga, na iloa ai o lo o i ai se poloaiga e taofia ai ona malaga ese atu Ah Mu ma le atunu’u.

E ui i taumafaiga a sui o le Ofisa o Femalagaaiga i le malae va’alele e taofi Ah Mu mai lona tuua o le atunu’u, na mafai lava ona tuua e Ah Mu le atunu’u i le po o le aso 1 Tesema 2014 i le malaga a le Hawaiian Air, peita’i na mafai lava ona toe fo’i mai o ia i le atunu’u i le amataga o le tausaga nei, ma faila ai loa e le malo moliaga mamafa o le gaoi ma le ave fa’agaoi o tupe mai le kamupani va’alele o le Polenisia fa’asaga ia te ia.