Nofovaavaaia se ali’i ua ta’usala i le gaoi i le faleoloa sa galue ai

Pago Pago - AMERIKA SAMOA

E 5 tausaga lea ua faanofovaavaaia ai e le Fa’amasinoga Maualuga se ali’i na ta’usala i lona fesoasoani e ave faagaoi o oloa mai le faleoloa sa galue ai, ina ua talia e le Fa’amasinoga fautuaga a Loia mo se fa’asalaga mama mo ia, e aunoa ma le toe tuuina atu o se isi faasalaga faa falepuipui na te tuliina i le Toese i Tafuna, e ese mai le 14 masina lea sa taofia ai o ia i le Toese a o faatalitali ai se faaiuga o lenei mataupu.

E ui na manatu le Fa’amasinoga e toe fa’afo’i le susuga a Filipo Taula i lona atunu’u na malaga mai ai pe a mae’a ona tuli lona fa’asalaga, peita’i ua faamalumalu e le Fa’amasinoga le fa’ataunu’uina o lea tuutuuga, fuafua lava i le usita’i o le alii ua nofosala o poloaiga o lana nofovaavaaia.

O le vaiaso na te’a nei na tula’i ai le ali’i ua nofosaga i luma o le Fa’amasinoga Maualuga mo le tuuina atu o lana fa’asalaga. 

Na ulua’i tu’uaia e le malo ia Taula i moliaga mamafa e 2 o le Gaoi faapea ai ma le Ave Faagaoi o ni meatotino sa tuuina atu i lalo o lana vaavaaiga. Ae i lalo o se maliliega na sainia e le ua nofosala ma le malo, lea fo’i ua talia e le Fa’amasinoga Maualuga i le masina na te’a nei, na malie ai loa le malo latou te toe faia se teuteuga i le tagi sa latou fa’aulu fa’asaga ia i le ali’i ua nofosala, ina ia fa’ailoa ai le moliga feololo o le taupulepule lea ma isi tagata e gaoi ni mea totino.

O le moliga o le taupulepule ma isi tagata e gaoi mea totino a se isi tagata, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

I le tali ioe ai o le alii ua nofosala i le moliga e pei ona toe teuteuina e le malo, sa ia ta’utino ai e fa’apea, i se taimi o le amataga o le tausaga na te’a nei, na latou taupulepule ai ma nisi o ali’i sa latou galulue i le Faleoloa o le H & Lee Store e gaoi ni oloa e aunoa ma se fa’atanaga mai le Pule o le Faleoloa.

O le gaioiga sa latou faia ma isi alii e to’alua na fesoasoani ia te ia i lenei osofaiga e aofia ai lo latou la’uina lea o pusa Lialia, pusa apa meaai tuuapa, pusa pia, pusa mea’ai a pepe ma apaina i luga o lana ta’avale pikiapu ma le fa’amoemoe e le mafai ona toe maua e le Pule o le Faleoloa ana oloa. O le tau aofa’i o oloa sa latou gaoia e tusa ma le $2,623.54.

Ina ua maua le avanoa e fa’aleo ai le talosaga a le alii ua nofosala ma lana loia, sa talosagaina ai loa e lana loia fautua i le Fa’amasinoga mo se fa’asalaga faanofovaavaaia mo le ua molia e toe aoaoina ai lona mafaufau ma toe afua se isi taeao fou mai le mea sese sa ia faia.

Na taua e le alii loia fautua sa tula’i mo Taula e fa’apea, ina ua tatala i tua le alii ua nofosala e fa’atatalitali ai le faaiuga o lana fa’amasinoga, sa alu o ia ma saili lana galuega e tausi ai lona aiga. O le taimi nei, o lo o galue o ia i lana galuega fou, ma o ia fo’i o se tagata ua faatuatuaina i lea galuega i se tasi o Kamupani.

O ia o se Tama e galue malosi mo le tausiga o lona to’alua aemaise si ana fanau e to’atolu, o lo o tulaga lelei pea fo’i lona ID mai le Ofisa o Femalagaaiga. Na talosaga le loia fautua i le Fa’amasinoga ina ia talia le fautuaga a le Ofisa Faanofovaavaaia, mo se fa’asalaga mama mo Taula e aunoa ma le tuuina atu o se isi taimi na te tuliina i le Falepuipui.

Na faailoa fo’i e le alii loia fautua i le Fa’amasinoga le sauni o Taula ma lona aiga e toe totogi le tupe mo oloa sa ia ave faagaoi mai lana gaioiga sa faia faatasi ma nisi o le aufaigaluega.

Na lagolagoina e le loia a le malo le folasaga a le loia mo le itu tete’e, ma ia talosagaina ai fo’i le Fa’amasinoga ina ia faasala le ua molia i se fa’asalaga faanofovaavaaia. E talitonu le malo, ua matua salamo le ua molia e tusa ai o lana solitulafono.

Na taua e le loia a le malo i le Fa’amasinoga e faapea, na pau lava le itu o lo o naunau i ai le pule o le Faleoloa na a’afia, o le toe totogi atu lea o le tupe mo le tau o ana oloa na gaoia e le ua molia.

Na taua atili e le malo e fa’apea, e tatau ia Esau ona ia totogi atoa le tupe lea sa ia malie ai i totonu o le maliliega e totogi, afai e leai, o le a avea lea ma itu na te le usitaia ai tuutuuga o le latou maliliega ma le malo.

A o le i tuuina mai le faaiuga a le Fa’amasinoga, na toe faatepa e le Faamasinoga itu e lua e aofia ai ma le ua molia i mau faamaonia na sauni le malo e folasia i luma o le vaega iloilo iuga, pe ana faapea e tofu atu lenei mataupu i luma o le vaega iloilo iuga.

O lenei mataupu e pei ona saunoa le Fa’amasinoga, na alia’e mai i le nofoaga o le Faleoloa a le H & Lee Store, ina ua taupulepule le ua molia ma nisi o tagata faigaluega e ave faagaoi ni pusa Lialia ma le anoanoa’i o isi pusa oloa o taumafa ma le fa’amoemoe e le toe maua e le Pule o le Faleoloa.

A o la’u e i latou pusa oloa ma tu’u i totonu o se ta’avale, na i ai se taimi na manino lelei ai i le masini pu’eata a le Faleoloa le itu sa tu ai le alii ua nofosala nei, ma faigofie ai loa ona iloa o ia. Ina ua suesueina e le Pule o le Faleoloa i latou nei, sa latou ta’utino ai loa i le moni o tu’uaiga.

Na taua e le Fa’amasinoga e fa’apea, e le gata na molia Taula, ae na molia fo’i ma isi alii sa latou galulue fa’atasi i le Faleoloa na a’afia ona o lenei lava mataupu.

Saunoa le Fa’amasinoga e fa’apea, ua talitonu le Fa’amasinoga i fa’amatalaga uma ma folasaga sa tuuina atu e Loia e itu e lua e fa’atatau i lenei mataupu. E le gata fo’i i lea, ua fa’amalieina le Faamasinoga i faafinauga atoa ai ma itu lelei e fa’atatau i le ua molia, faapea ai ma se fa’asalaga e ono tatau ona tuuina atu ia te ia.

Na pau lava le itu e manatu le Fa’amasinoga e fai ma faamama avega mo se fa’asalaga mo le alii ua nofosala nei, o lona ta’utino lea i le Ofisa Faanofovaavaaia, o le a ia toe totogiina uma le tupe mo le taui o mea na ave faagaoi. O lea ta’utinoga e pei ona taua e le Fa’amasinoga, ua atagia mai ai le salamo faamaoni o Taula mai lana solitulafono sa faia.

E 5 tausaga na manatu le Fa’amasinoga e faasala ai Taula i le Falepuipui i Tafuna, faapea ai ma lona totogiina o le salatupe e $5,000. O ia fa’asalaga uma o le a faamalumalu, ae o le a nofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia poloaiga e aofia ai lona tuliina o masina e 20 i le toese i Tafuna e aunoa ma le tatalaina o ia i tua. Ua manatu le fa’amasingoa e taofi le tuliina o le 20  masina i le taimi nei, se’i vagana ua tuuina atu se isi poloaiga a le fa’amasinoga.

Ua poloaina fo’i Tauia na te tuua le atunuu ae toe fo’i atu i Samoa i lona atunu’u na malaga mai ai, peita’i o lea tuutuuga o le a faamalumalu, fuafua lava i le faamaoni o Taula e tausisi poloaiga a le fa’amasinoga ma ia totogi le salatupe e $2,000.

O le fautuaga malosi a le Fa’amasinoga mo le alii ua nofosala nei, afai e le toe fia fo’i i le Toese i Tafuna, pe toe fo’i i lona aiga i Samoa na sau ai, ia tausisi ma usitai uma i poloaiga a le Fa’amasinoga e aofia ai le faasala lea ona ia toe soli o se tulafono a le malo.