Nofovaavaaia le ali’i na ta’usala i le umia o fualaau faasaina

Pago Pago - AMERIKA SAMOA

E 5 tausaga lea ua nofovaavaaia ai le alii lea na tu’uaia i lona umia faasolitulafono o fualaau faasaina, ina ua faamaonia e le Faamasinoga Maualuga le solitulafono sa tu’uaia ai o ia e le malo, ma atagia mai ai lona le usitaia o tulafono e puipuia ai tulaga o fualaau faasaina i le Teritori. 

E ui ua nofovaavaaia le susuga a Upuese Iopu, poo Upu Iopu fo’i e pei ona iloa ai o ia e uo ma aiga, peita’i ua fautuaina malosi o ia e le Fa’amasinoga, ina ia usita’i ma tausisi i tuutuuga o lana nofovaavaaia, ina nei maimau tausaga e 5 o lona olaga e nofosala ai i le Toese pe afai na te soli se tuutuuga e tasi o lana nofovaavaaia.

O le vaiaso na te’a nei na tula’i ai Iopu i luma o le Faamasinoga Maualuga mo le lauina o lana fa’asalaga. 

Talu mai le taimi na pu’e faapagota ai e Leoleo ia Iopu i le masina o Iulai o le tausaga na te’a nei, sa taofia pea o ia i le Toese i Tafuna, ina ua le mafai ona ia totogi le tupe e $10,000 sa faatulaga e tatala ai o ia i tua.

Na ulua’i molia o ia e le malo i le solitulafono mamafa o lona umia faasolitulafono o vaega o le pauta o le aisa, lea e mafai ona faasala ai se tasi mai le 5 e oo atu i le 10 tausaga, pe faasala fo’i i le salatupe e oo atu i le $20,000 le maualuga.

Ae i lalo o le maliliega na sainia e Iopu ma le malo, lea fo’i na talia e le Fa’amasinoga Maualuga i le masina o Ianuari o le tausaga nei, na malie ai Iopu e tali ioe i le moliaga lea na toe teuteu e le malo le mamafa, le solitulafono o le umia faasolitulafono o vaega o le pauta o le aisa, lea e mafai ona faasala ai se tasi mo le umi e le silia i le 5 tausaga, pe faasala i le salatupe e le silia i le $5,000, poo le faasala foi i faasalaga uma ia e lua.

I le tali ioe ai o Iopu i le solitulafono e pei ona ta’usala ai o ia, sa ia ta’utino ai e fa’apea, i se taimi o le masina o Iulai o le tausaga na tea nei, sa ia umia ai se paipa tioata sa i ai vaega o le pauta faasaina o le aisa.

Na ta’utino atili le ua molia e fa’apea, ina ua saili e Leoleo lona tino i le aso e pei ona tula’i mai ai lenei faalavelave, sa maua ai i le taga o lona ofu se paipa tioata e faaaoga e ula ai le aisa ia te ia. I totonu o le paipa tioata, sa maua ai vaega o le pauta pa’epa’e o le aisa.

Ina ua maua le avanoa o Iopu mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i lona aiga e tausi lona to’alua ma lana fanau. 

Na taua e le ua molia lona salamo e tusa ai ma lana solitulafono, ma ua ia aoaoina fo’i se lesona taua mo lona olaga a o taofia ai o ia i totonu o le toese. Ua ia iloa ma mautinoa, e le o se nofoaga lelei le Toese mo soo se tasi lava e i ai sona aiga. E le gata o se nofoaga na motusia ai le latou mafutaga ma lona to’alua ma lana fanau, ae o se nofoaga fo’i e ma’imau ai aso e tele o le olaga.

Na talosaga Iopu mo se avanoa e toe fo’i ai i tua e saili sana galuega e tausi ai lona aiga, ma toe amata ai se isi itulau fou mo lona olaga. Na faamanino e le ua molia lona faatamala ua mafua ai ona aafia o ia i le tulafono, e le o ia fo’i o se tagata e fiafia i fualaau faasaina poo le ‘ava malosi.

Na talosaga le loia fautua a Iopu i le Faamasinoga mo se faasalaga nofovaavaaia, ina ia maua ai e le ua molia le avanoa e vave ai ona toe fo’i i tua e saili sana galuega e tausi ai lona to’alua ma lana fanau. A o le i taofia e Leoleo ia Iopu i lenei mataupu, sa galue o ia i lana galuega ua tele tausaga o galuega ai. O le taimi nei e pei ona taua e lana loia, e le o toe maua e Iopu lea galuega talu mai le solitulafono lea ua nofosala ai o ia.

Na faatusatusa e le alii Loia Fautua le mataupu sa ta’usala ai nisi i le umia faasolitulafono o fualaau fa’asaina, ma le solitulafono lea ua nofosala ai le alii o loo ia tauaveina lana solitulafono, ma ia taua ai e faapea, e tele atu vaega o le pauta o le aisa na maua i mataupu a isi tagata ua mae’a ona tuuina atu a latou faasalaga, ma vaega o le pauta o le aisa na maua i le susuga a Iopu.

Fai mai le Loia Fautua, e ese mai lava Iopu mai isi tagata ua mae’a ona nofosala ma faasala e le Fa’amasinoga i le umia faasolitulafono o fualaau fa’asaina. E le gata o i latou ia sa umia ma le faamoemoe e tulei ma faatau atu i isi tagata, ae sa i ai foi isi solitulafono na ta’usala muamua ai i latou.

O le alii ua ta’usala e le Fa’amasinoga e pei ona taua e lana loia fautua, o se Tama sa galue faamaoni mo le tausiga o lona aiga. O le tele o tausaga o lona olaga e le i aafia lava o ia i se solitulafono. O se tasi sa faamoemoe i ai le tausiga o lona to’alua ma lana fanau.

Ona o ia tulaga lelei, na finau ai loa le alibi Loia Fautua i le Fa’amasinoga ina ia nofovaavaaia le ali’i o loo ia tauaveina lana mataupu e aunoa ma le tuuina atu o se isi taimi na te tulia i le Toese, ae ua lava le 10 ma le afa masina lea na taofia ai o ia i le Toese e faatalitali ai se faaiuga o lana mataupu e fai ma ana faasalaga i lenei mataupu.

Talu ai sa fia malamalama le Faamasinoga i le tulaga o le pepa nofomau a Iopu, na mafua ai ona valaau e le Fa’amasinoga lona Faletua mo le tuuina atu o se faamatalaga e faatatau i le pepa nofomau a le ua molia.

Na taua e le Faletua a Iopu, o lana sponsor fo’i lea, o lo o lelei pea lava le I.D nofomau a Iopu, o ia fo’i o se tagata e faamoemoe i ai lona aiga.

Na fesili le Fa’amasinoga i le to’alua o le alii ua molia poo le a sona manatu i le talosaga a Iopu ina ia tatala o ia i tua, ae na tali lona to’alua, “Ou te manatu e tatau ona tatala o ia i tua, e na o ia lava o loo faalagolago i ai le tausiga o le la fanau ma le aiga”.

Na lagolago le malo i le talosaga a le itu tete’e mo se faasalaga nofovaavaaia mo le ua molia. Na taua e le loia a le malo, e laititi lava le vaega o le pauta faasaina o le aisa lea na maua ia Iopu. E le gata foi i lea, mai le tele o tausaga o lona olaga, o le ulua’i taimi lea ua aafia ai o ia i se solitulafono.

Na talia e le Fa’amasinoga faafinauga a loia e faatatau i se faasalaga nofovaavaaia mo Iopu.

Na taua e le Fa’amasinoga i le alii ua nofosala e fa’apea, e pei ona taua i le Ripoti a le Ofisa Nofovaavaaia, o Iopu o se tagata sa galue malosi mo le atina’eina o lona aiga. Sa galue o ia i lana galuega mo le silia i le 15 tausaga.‘

Sa lelei lau galuega, ola fiafia fo’i lou aiga i se olaga manuia ona o au galuega lelei, peita’i, ua e faatamala, o le mafuaaga lena o le faaletonu o lona aiga i le taimi nei, ina ua e filifili e te tagofia fualaau faasaina ma e faauo atu i tagata o lo o fiafia i fualaau faasaina,” o le saunoaga lea a le Fa’amasinoga.

Na faailoa e le Fa’amasinoga i le ali’i ua nofosala, tusa lava pe ua faaipoipo atu i se tagatanu’u o Amerika Samoa, o lana fanau fo’i na fananau uma i Amerika Samoa, ia manatua o lea ua ta’usala o ia e le Fa’amasinoga i le solitulafono mamafa, ma ua tele le avanoa e mafai ai e le Fa’amasinoga ona faatonu o ia e toe fo’i i lona atunu’u na malaga mai ai.

E 5 tausaga na manatu le Faamasinoga e faasala ai Iopu i le Toese i Tafuna, peita’i ua faamalumalu le tuliina e le ua molia o lea faasalaga, ae ua nofovaavaaia ai o ia mo le 5 tausaga i lalo o tuutuuga e ao ona usita’i i ai.

O nisi o ia tuutuuga e aofia ai lona tulia o masina e 20 i le Toese i Tafuna. Ua manatu le Fa’amasinoga, ua lava masina e13 e tuli e Iopu, ae o masina e 7 o lo o totoe ai, o le a taofi le tuliina sei vagana ua tuuina atu se isi poloaiga a le Fa’amasinoga.

“Iopu, o le avanoa mulimuli lenei mo oe. Afai e te toe aafia i se isi solitulafono, o le a le toe i ai se isi avanoa e totoe mo oe,” o le fautuaga lea a le Fa’amasinoga ia Iopu.

O le faaiuga o le masina lenei ua faamoemoe e tatala ai i tua Iopu, pe a mae’a ona tuli aso o lo o totoe e faaatoa ai le 11 masina o lana faasalaga faa falepuipui.