Nofovaavaaia le ali’i faigaluega ta’usala ave faagaoi o meatotino Kamupani

Pago Pago, AMERIKA SAMOA

E 5 tausaga lea ua poloaina e le Fa’amasinoga Maualuga e nofovaavaaia ai le susuga a Jessie Sefulu, ina ua ta’usala o ia i le moliaga o le gaoi ma le umia faasolitulafono o fualaau faasaina, e mafua mai i le fa’alavelave lea na molia ai o ia i lona ulufale faamalosi i le lotoa o le Kamupani sa galue ai ma ave faagaoi nisi o meatotino sa i ai. Ae i le taimi na pu’e faapagota ai o ia e Leoleo, na maua ai fualaau faasaina i lona tino.

O le silia i le 10 tausaga talu ai, na ta’usala ai e le Fa’amasinoga Maualuga le susuga a Sefulu i le moliaga o le umia faasolitulafono o mariuana, ina ua osofa’i e Leoleo lona fale ma lona fanua ae maua ai se laau mariuana o loo toto i lana fa’atoaga.

O le vaiaso na te’a nei na tula’i ai Sefului luma o le Fa’amasinoga Maualuga mo le tuuina atu o lana fa’asalaga. E 2 tagi na ulua’i tu’uaia ai o ia e le malo.

I le tagi muamua, na molia ai o ia i le moliaga o le gaoi faapea ai moliaga o le ave faagaoi o meatotino sa tu’u atu i lalo o lana vaavaaia, o ni solitulafono mamafa o le vaega C, lea e mafai ona faasala ai se tasi i le Toese mo le umi e oo atu i le 7 tausaga, pe faasala foi i le salatupe e oo atu i le $5,000, poo le faasala foi i faasalaga uma ia e 2; faapea ai ma isi  moliaga mama e 2 e aofia ai le faatupu vevesi i nofoaga faitele atoa ai ma le faaleaga meatotino i le tulaga tolu, o solitulafono mama o le vaega A, lea e mafai ona faasala ai se tasi i le Toese mo le umi e oo atu i le tasi le tausaga, pe faasala foi i le salatupe e oo atui le $1,000, pe faasala foi i faasalaga uma ia e 2.

Ma le tagi lona lua, sa molia ai Sefulu i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le maruana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e 2.

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga i le masina o Me o le tausaga nei, ua malie ai Sefulu e tali ioe i le moliaga mamafa o le gaoi, faapea ai ma le moliaga mamafa lea ua toe teuteu e le malo, le solitulafono o le umia faasolitulafono o vaega o le pauta faasaina o le aisa.

I le tali ioe ai o Sefulu i moliaga mamafa e 2 e pei ona ta’usala ai oia e le Fa’amasinoga, na ia ta’utino ai e faapea, i se taimi o le aso 15 o Me, 2020 i Amerika Samoa, na la osofaia ai ma le ali’i o Matthew Loleni Jr le nofoaga autu o le Kamupani sa la galulue ai i Tafuna i se taimi o le po ae ave faagaoi ni oloa sa i ai e pei o mea faigaluega e ola i le eletise atoa ai ma ni uta laupapa ma u’amea e fa’aaoga e fausia ai pou o fale tetele.

Na ta’utino atili Sefulu e faapea, i le po o le aso e pei ona taua, na alu atu ai Loleni Jr, le ali’i o loo molia faatasi i laua e le malo i lenei mataupu, ma fesili atu mo lana fesoasoani e ala i le fa’aaoga o lana pikiapu e la’u ese mai ai oloa gaoi mai totonu o le lotoa ae ave i le fale o Loleni Jr i Tafeta e nana ai ma le faamoemoe o se taimi mulimuli ane la te faatau atu ai nei oloa ae maua mai ai se seleni. 

Na taua fo’i e Sefulu i lana tali ioe e faapea, i l e tuana’i ai o le vaiaso talu ona sailia o ia e Leoleo e tusa ai o meatotino na ave faagaoi mai totonu o le lotoa o le Kamupani sa galue ai, na taofi ai e Leoleo lana ta’avale i luga o le alatele i Faleniu i lona le usitaia o tulafono i luga o le alatele. 

Ina ua saili e Leoleo lona tino, na maua ai e Leoleo fualaau faasaina i totonu o le ata o lona ofu sa fai.

Ina ua maua le avanoa o Sefulu mai le Fa’amasinoga Maualuga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga ma saili sana galuega e fesoasoani ai i le atina’eina o lona aiga i lona to’alua ma lana fanau. 

Na taua e le ua molia e faapea, o le 11 masina lea na taofia ai o ia i le Toese a o faagasolo ai taualumaga o lana mataupu, ua ia a’oa’oina ai se lesona taua i lona olaga e faatatau i le leaga o le solitulafono, e le gata ua misia ai le mafutaga ma lona to’alua ma le la fanau, ae ua le mafai ai fo’i ona faataunuu ona tiute faa Tama i totonu o le aiga, o le galue lea e saili tupe e tausi ai lona to’alua ma lana fanau.

Na faailoa e Sefulu i le Fa’amasinoga lona misia o le taimi na fanau ai lona grandson lea ua 10 nei masina lona matua, ina ua pu’e faapagota o ia e Leoleo ma taofia i lenei mataupu, ae toe tasi le masina ona fanau lea o le pepe a lona afafine matua ma lona to’alua.

Na talosaga le Loia Fautua na tula’i mo le ua molia i le Fa’amasinoga mo se faasalaga faanofovaavaaia, ina ia maua ai le avanoa e toe fo’i atu ai le ua molia i tua i lona aiga e saili sana galuega e tausi ai lana fanau. O Sefulu e pei ona taua e lana Loia Fautua, o se Tama sa galue malosi mo le tau atina’eina o lona aiga. Sa i ai fo’i le taimi na ave lua ai ana galuega i le 2005 e oo mai i le 2009 ona o lona naunau lava ia aua nei faaletonu le tausiga o lona aiga, ao laiti lava si ana fanau e to’a 6 lea ua matutua i le taimi nei.

Na lagolago e le Loia a le malo le talosaga a le itu tete’e mo se faasalaga faanofovaavaaia. Na taua e le malo e faapea, e ui na fesoasoani le ua molia i le aveeseina mai o oloa na gaoia, e ala i le fa’aaoga o lana ta’avale, peita’i e leai ma sana tupe na maua mai i oloa uma na ave faagaoi. E ese tagata na manuia i oloa na ave faagaoi.

Na talosaga fo’i le malo i le Fa’amasinoga ina ia poloa’i le ua molia e molimau ma le faamaoni i le faamasinoga autu o le susuga a Loleni Jr, e pei ona ia ioe ai i tuutuga o lana maliliega sa sainia ma le malo.

O faamatalaga na tuuina atu e molimau i le Ofisa Faanofovaavaaia e uiga i lenei mataupu, o loo taua ai uiga lelei ma le tautua aiga o le ali’i ua molia nei, e le gata i totonu o lona aiga ae faapea ai fo’i le nu’u ma lana Ekalesia. 

Na faatepa e le Fa’amasinoga Maualuga le ua molia i le matuia o lana solitulafono sa faia, e ala i lona talia lea o le talosaga a Loleni Jr e fa’aaoga lana ta’avale e aveese mai ai oloa sa gaoia ma la’u atu i le fale o Loleni Jr. O le taeao na sosoo ai ina ua toe usu atu le ua molia i le fale o Loleni Jr, ae na faailoa i ai e Loleni Jr, ua uma ona faatau oloa na gaoia, ae o loo faatali i le taimi e taunu’u atu ai le tupe mai le tagata na ia faatauina oloa.

E taofia faapagota e Leoleo ia Sefulu i le isi vaiaso na sosoo ai o loo faatali pea lava sana vaega mai le tupe o oloa na ave faagaoi. 

E 5 tausaga na manatu le Fa’amasinoga e faasala ai Sefulu i le Toese i Tafuna, peita’i ua manatu le Fa’amasinoga e faamalumalu le faataunuuina o lea faasalaga, ae nofovaavaaia le ua molia mo le 5 tausaga i lalo o tuutuuga e ao ona ia usita’i i ai. O nisi o ia tuutuuga e aofia ai lona tuli o masina e 20 i le Toese i Tafuna, e faitau ai ma masina e 11 lea ua mae’a ona ia tuliina i le taimi nei. O le paleni e totoe ai, ua manatu le Fa’amasinoga e taofi lona tuliina, se’i vagana ua tuuina atu se isi poloaiga i se taimi o i luma.

Ae ua tatala nei i tua le ua molia mai le Toese ma le tuutuuga e 90 aso lea ua tuu atu e saili ai sana galuega tumau e totogi ai lana salatupe e $1,000. Ae afai e mae’a le 90 aso ae lei maua lava se galuega a le ua molia, ona toe fo’i loa lea i totonu o le Toese e tuli faamae’a masina e 9 o loo totoe o lana faasalaga faa falepuipui.