Moliaga fa’asaga i se ali’i mai Samoa, fa’alavelave tupu i Manu’a

Pago Pago - AMERIKA SAMOA

O se ali’i mai Samoa o lo o tu’uaia na susunu i lalo le potu e teu ai oloa ma le umukuka Samoa i tafatafa o le fale o se aiga i Manu’a, ua molia nei i le moliaga mamafa o le susunuing o mea-totino a isi i le tulaga lua.

O le vaiaso ua te’a na tula’i ai i luma o le Fa’amasinoga Maualuga le ali’i o David Sasagi, ma ua fa’atulaga e le fa’amasinoga le tupe e $5,000 e tatala ai o ia i tua. O le alii leoleo suesue, i lenei mataupu, o Captain Siliaivao Sea.

Na tuuina atu ia Sasagi se poloaiga e pu’e fa’apagota ai i Ta’u, Manu’a i le amataga o le masina nei e leoleo o le Marine Patrol e fa’atatau i le mu na tula’i mai i le masina na te’a nei - e tolu aso a’o lumana’i le Kerisimasi o le 2022.

E tusa ai ma le mataupu a le malo, na asiasi atu Sasagi i le fale o se aiga ma fesili i le tagata e ana le pia, ae na fai mai le pule o le lea fale, e na o le tasi le pia - o le pia sa ia inuina.

O lo o tuuaia ai na alu ese Sasagi, ma e lei umi se taimi na taumafai ai se tasi e tatala le faitotoa pito i tua.

Fai mai le pule o le fale, na ia tilotilo ma iloa atu Sasagi ma se agaese o tatala le faitotoa ma ta'u atu ia Sasagi e alu ese. 

“Ona aveese lea e le pule o le fale le agaese ma tuu i le ‘ua o Sasagi ma agai atu ai loa ma le sasaina o le tua o le ua molia i le agaese. O lo o tuuaia o le taimi lena na alu ese ai Sasagi,” o se vaega lea o le tagi a le malo.

Peitai e lei umi ae fafagu le pule o le fale e lona tuaoi fai mai o lona potu teu oloa ma le umukuka Samoa ua mu.

Fa’ailoa i pepa faamaumau i le tasi a le malo, o le potu teu oloa sa i ai mea faigaluega kamuta ma mea fagota sa mu i le efuefu.

Na ta’ua ina ua fesiligia e leoleo i Manu’a le ua molia, sa ia te’ena lona faia o lenei fa’alavelave; peitai i le taimi o le suesuega lona lua i le Ofisa o Leoleo Tutotonu i Fagatogo, sa ioeina ai e Sasagi le solitulafono.

Na taua e Sasagi i Leoleo i le mae’a ai o se inugapia i le po na tula’i mai ai le fa’alavelave, sa ia alu atu ai i le fale o le ali’i na a’afia ma fesili i ai po o i ai sana pia, peita’i, na savali ese le tagata e ona le fale e aunoa ma se tali atu ia te ia.

Na alu Sasagi i le fale ma aumai se agaese, ae na aveese e le tagata e ana le fale le agaese ma tuu i le ua o le ua molia ma ta ai lona papatua.

Ina ua mavae le 30 minute, na toe foi mai Sasagi ma vaaia malala o loo mu i totonu o le umukuka Samoa ma tuu loa i luga o niu mamago ma alu ai loa. Na oo atu ai i se afi na mu ai le potu teu oloa ma le umukuka.

E tusa ai ma le tagi a le malo, e tusa ma le $5,000 le tau o mea na faaleagaina ona o le mu ae e le o aofia ai le potu teu oloa ma le umukuka.