Molia tagata faigaluega kamupani O & O gaoia oloa silia i le $19,000 lona tau

E to’atolu tagata faigaluega a le kampuani o le O & O Enterprise ua tuua’ia e le malo o Amerika Samoa i le faia o gaioiga fa’agaoi i lea faleoloa i Nu’uuli. E silia ma le $19,000 le tau oloa a le O & O Enterprise o lo’o taua e le malo sa gaoia e i latou i le tausaga ua te’a 2018.

O i latou ua molia e le malo e aofia ai Kalala Leilua, Arona Ma'a, ma Siueli Blake. I le tagi a le malo ua ma’ea ona faila i le fa’amasinoga, o lo’o fa’ailoa mai ai le tele moliaga o le gaoi fa’asaga ia i latou nei.

Ua ma’ea foi ona fa’atulaga e le fa’amasinoga tupe e mafai ona tatala ai i latou nei i tua mai le toese i Tafuna.

Mo Leilua, e $20,000 le tupe fa’atulaga e le fa’amasinoga, ae o Ma’a e $5,000. O Blake o lo’o taofia i le toese e aunoa ma se tupe e tatala ai ai tua ona o le fa’aletonu o ona pepa Immigration e nofo ai i Amerika Samoa.

O le taeao o le aso 24 o Tesema 2018 sa tutulai ai i latou nei i luma o le Fa’amasionga Fa’aitumalo mo le taimi muamua ina ua ma’ea ona taofia i latou ona o moliaga sa faila e le malo.

I lea taimi sa finau le loia fautua a latou nei, le tamaitai ia Anna Wells, e fa’aitiitia le tupe e tatala ai i tua i latou ua molia. Ae sa tete’e malosi le loia a le malo ia Laura Garvey. I se fa’aiuga sa talia e le afioga i le Fa’amasino Fiti Sunia le fa’afinauga a le malo ina ia teena le talosaga a le itu tete’e.

O le aso 9 Ianuari e toe tulai ai Blake i luma o le fa’amasinoga ae o le aso 10 Ianuari e tulai ai Ma’a ma Leilua.

MATAUPU A LE MALO

O lo’o fa’amanino mai i pepa o le tagi a le malo i luma o le fa’amasinoga e fa’apea o le aso 28 o Novema o le tausga ua te’a, 2018, sa taofia ai e le pule sili Mr. Ko o le O & O Enterprise se ta’avale leoleo i luga o le alatele ma le talosaga pe mafai ona suesueina e leoleo nisi o le aufaigaluega o lo’o masalomia le gaoia o oloa a le O & O Enterprise ae fa’atau atu nei oloa i nisi o faleoloa i le atunuu. O le tele o nei faleoloa o pulea a tagata Asia.

E pei ona taua i le tagi a le malo, sa fa’ailoa e Ko i leoleo e fa’apea o ia sa malaga i fafo o le atunu’u ae o lona nephew sa vaaia le faleoloa. Ae peita’i sa fa’ailoa atu e lona nephew, se fa’atonu o lo’o i ai ona e le o tutusa le aofai o oloa i totonu o container ma le fale e teu ai oloa ma pepa fa’amaumaua a le O & O.

O lo’o fa’ailoa mai i le tagi a le malo o Leilua, o le supervisor ma o ia foi lea na muamua ona fesiligia e Ko i lenei mataupu. Ma sa tali Leilua ma ia fa’atoese ia Ko ma fa’ailoa i ai o ia sa gaoia oloa mai totonu o container ma le fale e teu ai oloa a le O & O Enterprise.

Ma o nei oloa, e pei ona taua i le tagi a le malo, sa fa’atau e Leilia i se tasi o faleoloa, le Lucky Seven Store i  Nuuuli, ina ia maua ai ni tupe.  O lea tupe, e pei ona fa’amatalaga e Leilua ia Ko, sa ia vaevae atu i isi tagata faigaluega a le O & O. Sa fa’ailoa foi e Leilua ia Ko i latou sa maua sa latou vaega tupe. O i latou foi ia sa fesigia e Ko.

Sa fa’ailoa e Ko i leoleo, o isi tagata faigaluega sa auai i lea gaoioiga le alofa, sa fa’atonuina i latou e Leilua ma Blake. O isi tagata faigaluega sa tuuaia i lenei gaoiaina o oloa e le o molia i le tagi a le malo ona o i latou ua na o ni molimau.

O lo’o fa’amatala auiliili i le tagi a le malo gaoioiga a Leilua, Blake ma Ma’a i le ave fa’agaoia o oloa a le O & O ma fa’atauina atu i le Lucky Seven Store. O lo’o taua ai foi i le tagi a le malo vaega tupe eseese sa maua e i latou nei mai le Lucky Seven Store.