Molia se tamaloa sa fa’ao’olima i lona to’alua i le tuai ona saini ana pepa femalagaiga

Pago Pago - AMERIKA SAMOA

O le aso 24 o Iuni, 2024, na fa’afeso’ota’i ai e se tina ia le Ofisa a Leoleo i Fagatogo e molia ai lona to’alua, i lona fa’ao’olima ma le faamata’u ia te ia, ina ua ia le sainia pepa ‘immigration’ a le tamaloa.  E taunu’u atu leoleo ua sola ese le ua molia.

[Ua le lomia e le Samoa News suafa o i latou o lo’o a’afia i lenei mataupu, aua le puipuiga o le tina ma le fanau iti.]

E tusa ai ma fa’amaumauga a le malo, na lipotia e le tina i le aoauli o le aso 24 o Iuni, 2024 ia lona to’alua i le fa’afefeina o ia ma le u’una’i solo o ia i totonu o le latou fale i Utulei.  Ma ina ua taunu’u leoleo i le fale o le ulugalii, sa faasino ifo iai e le tina, le sola ese o lona to’alua aga’i i leisi a latou fale i luga atu o le a’ega.

Sa faapea foi ona fesiligia e leoleo ia ni isi o le aiga a lenei ulugalii, i le auala na alu ai le ua molia, ma o latou fa’ailoa mai le sola aga’i i luga o le mauga o le ua molia.

Na faatonuina loa e leoleo ia le tina na a’afia ina ia malaga mai i le Ofisa a Leoleo i Fagatogo mo le fa’aauauina o su’esu’ega ae o latou aga’i atu i luga o le mauga e taumafai e saili le ua molia, ae peitai, e le’i fa’amanuiaina a latou taumafaiga.

Ina ua fa’atalanoaina e leoleo ia le tina na a’afia, i lo latou ofisa, sa faamatalaina e lenei tina, le fa’amata’uina o ia e le ua molia, i lea taeao, pe afai e le sainia ana pepa e toe fa’afou ai lona ID.

Sa faamatala foi e lenei tina, ina ua toe fo’i atu lona to’alua mai i le EOB, o iina na amata ai ona sauaina o ia e lona to’alua, a’o ia saofa’i i luga o le moega lea o lo’o ta’oto ai lona tua’a.

Na ta’ua e le tina le leai o sona taimi e alu ai e saini pepa ‘immigration’ a lona to’alua i lea aso, ona sa pisi i ta’aloga a lona alo i Tafuna.  Ma sa ia fa’ailoa atu i lona to’alua, o le a ia alu i le aso e soso’o ai.  Ae peitai, sa le’i fiafia lona to’alua i lana tali ma ia folafola, o le a le uma le mataupu lea pe a le sainia ana pepa ‘immigration’.

Sa faamaonia e le tina lona popolega tele ona o upu taufa’amata’u ma le saua sa lafo e lona to’alua, i luma o le la fanau.  O nei fa’aupuga, na aofia ai le faalalaina o le fasiotia o le tina ma le fa’aaogaina o se naifi e fa’ao’o ai tiga ia te ia.  E le gata i lea, o le fa’ao’o foi o tiga i le aiga o le tina, pe a le sainia pepa a lona to’alua.

Sa faamatalaina foi e le tina, ua lata i le tolu vaiaso o tupu lenei fa’afitauli i lona aiga, i le faafefeina o ia e lona to’alua i luma o le la fanau, e pei o le fasiotia o ia pe a le avatu ia te ia 

Sa faapea ona fa’atalanoaina foi e leoleo ia le alo tamaitai e 12 tausaga a le ulugalii, i luma o lona tama matua ma le tina, i lo latou fale.  Ma e tusa ai ma le molimau tusia a le teineititi 12 tausaga, sa ia ta’ua ai lona va’aia o lona tama, o fa’ao’olima i lona tina.  Sa faamatala foi e le teineititi lona lagona o le palauvale a lona tama i lona tina ma faatonu lona tina e alu e saini pepa ‘immigration’.  Sa ta’ua e le teineititi lona tagi ma fai atu i lona tama e soia, aua o lea e faalogologo atu latou.

Sa ta’ua foi e le teineititi lona vaaia o lona uso matua o taumafai e taofi lona tama mai i le fa’ao’o o le tiga i lona tina ae sa tago lona tama, i le una’i lona uso ma pa’u atu ai i se fata na tu’u ai fa’ailoga o taaloga (trophy).

E tusa ai ma le molimau a le tua’a o le tina, a’o moe o ia i lona moega lea e i le potu malolo, sa fa’ate’ia o ia i lona va’aia o le ua molia, o fasi mai lona afafine (le to’alua a le ua molia).  Sa ta’ua e le tama matua, o ia e le o atoatoa le malosi o lona tino, o lea na le mafai ai ona tu i luga e taofi le to’alua a lona afafine.

I le mae’a ai o le faatalanoaga a leoleo ma le aiga, sa fautuaina loa i latou ina ia vave fa’afeso’ota’i atu le ofisa a leoleo pe a toe fo’i atu le ua molia.

E le’i ma’oti mai i faamaumauga a leoleo le aso tonu na lokaina mai ai le ua molia.  Ae e tolu moliaga ua molia ai o ia, e aofia ai;

Faitauga 1:  Faatupu vevesi i totonu o le aiga – o se vaega ‘C’ o solitulafono mama, e mafai ai ona nofosala i le falepuipui mo aso e sefululima (15) po o se sala tupe e i le va o le $150 ma le $300; po o faasalaga uma e lua.

Faitauga 2 & 3:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai i le falepuipui mo aso e sefululima (15) po o se sala tupe i le va o le $150 ma le $300; po o faasalaga uma e lua.

E $3,000 le vaegatupe na faatulagaina e mafai ona tatalaina mai ai le ua molia, e faatalitali ai lona faamasinoga.