Molia se tamaloa na tau lana tu’i i se alii talavou

Pago Pago - AMERIKA SAMOA

O le po o Aperila 5, 2025 sa faapea ona o’o atu ai se vala’au i le Ofisa a Leoleo i Fagatogo, ona o se misa a se aiga, na a’afia ai se alii talavou a’o ia taumafai e vaovao misa.

Ma sa faapea ona molia ai susuga ia Potoa’e Tuloli ma Siaosi po o Pati Ualotu, i lenei fa’alavelave, e tusa ai ma fa’amaumauga a le faamasinoga.

Ina ua taunu’u atu leoleo i le nofoaga na tupu ai le fa’alavelave sa faapea ona fa’afetaui mai i latou e Tuloli, ma o ia lea na vala’auina leoleo.

I le fa’amatalaga a Tuloli i leoleo, a’o faia se latou talatalanoaga fa’ale’aiga ma lona to’alua, o lona uso ma lona to’alua, sa alu atu ia) Pati, le atalii fai a lona uso, ma faapisa a’o faia le latou talanoaga.

Sa ta’ua e Tuloli, le amata ona fa’atonutonu atu i latou, e Pati.  Ma na fautua iai Tuloli, e alu e malolo ona e foliga mai, o lo’o fa’asuaava le alii.  Ma sa fautuaina loa e Tuloli, le toe fa’aauauina o le latou talanoaga i le aso e soso’o ai, ae peitai, sa palauvale ifo ia Ualotu ma fa’aauau ona pisa leotele i totonu o le fale.

Na ta’ua e Tuloli le oso mai o lona uso ma taumafai e fa’ato’ato’a lona atalii, ae peitai, na savali i fafo ia Pati ma u’u mai se ma’a ma taumafai e togi ai Tuloli.

Sa ta’ua e Tuloli lona savali atu loa ma tu’i ia foliga a Pati, ae se’e ai lona vae ma pa’u ai ma tau lona ulu i lalo.  Na fa’aauau ona ta’ua e Tuloli lona tau tu ifo i luga ma toe velo leisi ana tu’i, ae peitai, na misi Pati ae tau i se alii talavou, sa taumafai e vaovao misa.

A’o faia fa’atalanoaga a leoleo, ae o le taimi lea na toe tula’i mai ai seisi fa’alavelave, i se nofoaga lata ane.  Ma ina ua o’o atu iai leoleo, sa va’aia ai le taumafai o tagata e vaovao ia Pati ma le tua’a o le alii talavou na lavea i le misa muamua.

Sa taumafai leoleo e ave faapagota ia Pati, ae peitai, na tete’e malosi le alii, e ala i lona se’i fa’amalosi o ona lima mai i le taumafai a leoleo e loka, o le faamalo o lona tino faapea ma le fa’afaigata i leoleo, ona taofiofi o ia.

Sa faapea foi ona taumafai Pati e sola ‘ese ma leoleo, ae na mafai ona pu’eina o ia e leoleo ma lokaina loa o ia ma tu’uina i totonu o le ta’avale a leoleo, faatasi ma Tuloli, ma aveina atu loa i la’ua i le ofisa a leoleo i Fagatogo.

Na fa’atalanoa foi e leoleo ia le tua’a o le alii talavou na a’afia i le misa ma sa ia ta’ua le alu atu o Pita i le latou fale, ma amata ona ‘e’e solo i totonu o le fale.  Ma sa fiu le aiga e tuli i fafo ae peitai, na i’u lava ina tago atu le tua’a a le alii talavou, ma u’una’i mai i fafo Pita, mai totonu o le fale.

O moliaga na faasaga ia Potoa’e Tuloli, o le Fa’ao’olima i lona tulaga e tolu.  O se vaega ‘C’ i solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua.

E leai se tupe na fa’atulagaina, e mafai ona tatalaina ai i tua Tuloli, e faatalitali ai lona faamasinoga.

Ae mo Siaosi po o Pati Ualotu, na moliaina o ia i le Faatupu Vevesi i nofoaga lautele, o le moliaga o le Fa’ao’olima i lona tulaga e tolu faapea ma le moliaga o le Tete’e atu i leoleo a’o latou taumafai e ave faapagota o ia.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘C’ i solitulafono mama, e mafai ona nofosala ai i le falaepuipui mo aso e 15, po o se sala tupe e $300; po o faasalaga uma e lua.

Ma le moliaga o le tete’e i le ave faapagota e leoleo, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina e mafai ona tatalaina ai Pati mai i le falepuipui, e faatalitali ai lona faamasinoga.