Molia se tamaloa i Samoa i lona fasiotia o se teineititi 14 tausaga e iai mana’oga faapitoa

Apia - SAMOA

Sa fa’amaonia e le Komesina o Leoleo a Samoa, le susuga ia Auapa’au Logoitino Filipo, i le vaega fa’asalalau a le Samoa Observer, ia le tu’ua’ia o se alii e 29 tausaga le matua, i lona fasiotia o se teineititi e 14 tausaga le matua, e iai mana’oga faapitoa, mai i le afioaga o Salepoua’e, Saleimoa.

O le taeao o le aso Toonai o le vaiaso ua mavae, sa tula’i mai ai lenei fa’alavelave mata’utia ma ua fa’ate’ia ai le toatele o le atunu’u.  O le ua molia, o le ‘uncle’ a le teineititi ua maliu.

Saunoa Auapa’au, ua mae’a ona molia le alii i le moliaga o le fasioti tagata ma ua lokaina nei o ia, e faatalitali ai lona tula’i i luma o le faamasinoga, ia Me 5.

O se fa’alavelave mata’utia tele lenei faalavelave, e pei ona ta’ua e le Observer.  Ma i lona faamatalaga, e faapea, na maua atu le tino maliu o le teineititi, i tua o le fale le ta’ua, ina ua saili e lona aiga.  Ma sa iai lava le ‘uncle’ po o le ua molia, i le fale, ina ua taunu’u atu leoleo i le aso Toonai.

Ma na’o le ‘uncle’ lea ua molia, sa masalomia i lenei faalavelave.  O le teineititi ua maliu, e le atoatoa le malosi o lona tino, ma e mana’omia tagata o lona aiga, e feavea’iina o ia, a’o soifua.  Sa tu’ua na’o ia ma le ua molia, faapea nisi o le fanau, i le fale, ina ua alu se fa’atauga a le aiga i lea aso Toonai, aua toana’i mo le aso Sa e soso’o ai.

Ae ina ua sailia le ua maliu, sa maua atu e le fanau a le aiga, ia lona tino maliu, o lo’o tanumia mai i ni laula’au i tua o le fale le ta’ua.