Molia se tamaloa i lona fa’afefeina o se tasi i se agaese

Pago Pago - AMERIKA SAMOA

 O le aso 27 o Aperila, 2024, sa valaau atu ai se tina loto mafatia mai i Utulei, i le Ofisa a Leoleo i Fagatogo, mo se fesoasoani ona o ni tamaloloa se to’alua o lo’o faia uiga taufa’amata’u e faasaga i lona aiga.

E tusa ai ma fa’amaumauga a leoleo, sa faamatalaina e lenei tina le palauvale solo o le ua molia, o Mark Nelisi, ma fa’afefeina lona to’alua i se agaese, i luma o le latou fale i Utulei.

Sa faapea loa ona aga’i atu leoleo i le maota o le tina ma vaaia ai ni alii se to’alua faapea ma se tamaitai i luma o le fale o le tina lea sa valaau mai i le ofisa a leoleo.

Sa faapea ona savavali atu leoleo i se tasi o alii e to’alua nei, ma sa fa’ailoa mai e lea alii i leoleo, lona fa’asuaava, ma sa alu atu i le fale o le na a’afia, e fesili iai pe aisea na ia ta’uina ai i le pulenu’u, le latou inuga sa faia.  Ma na ia tu’ua’ia foi le na a’afia, i lona pepelo i le pulenu’u, o la e tagofia e i latou ia fualaau faasaina i le fale a le aumaga.  Ma sa ta’ua foi e lea alii le fa’alala atu e le atalii o le na a’afia, ia se la’au malosi ia i la’ua.

O le alii lea sa fa’atalanoaina muamua e leoleo, o le susuga ia Mark Nelisi, lea ua molia nei i lenei mataupu.

O leisi alii lea sa to’alua ai i la’ua i luma o le fale a le aiga na a’afia i le mataupu, o le susuga ia Fa’afetai Kaleopa.  Ma sa faamatala e Kaleopa i leoleo, e le o se taimi muamua lea ua faia ai e le na a’afia ia lea tulaga, o le valaau i le pulenu’u ma pepelo iai, o la e tagofia e latou ia fualaau faasaina.

A’o fa’atalanoaina e leoleo ia Nelisi ma Kaleopa, sa va’aia e leoleo le agai mai o seisi alii ia i latou, ma sa ia fa’ailoa mai i leoleo, o ia lea o lo’o a’afia i lenei mataupu.

Sa faamatala e le tama na a’afia i lenei mataupu, a’o momoe lona aiga ma o lo’o pe moli o le latou fale, ae valaau atu sa tagata e na te le iloa, i lana telefoni ma su’esu’e o ia, pe aisea na ia fa’afeso’ota’i ai le pulenu’u ma pepelo iai, o la e latou te tagofia ia fualaau faasaina.

Sa faapea foi ona fa’afefe e le tagata lea na valaau atu, ia le tamaloa ma lu’i e sau i le malae pasiketi polo i tafatafa o le EOB, e la te fufusu, ae sa tali le na a’afia, e leai.

Ona fai atu lea o le tagata na valaau atu, o le a alu atu i le latou fale ma sa tali mai ai le na a’afia, o lea la’a faatali mai.

Na faamatala loa e le tam ana a’afia lona fa’alogoina o nisi o ‘e’e ma palauvale, i le auala i fafo o le latou fale.  Ma sa ia savali atu loa i fafo ma lona atalii, ma o la vaaia ni alii se toalua, i luma o le latou fale.  Ma o lo’o u’u e le tasi o nei alii, o Nelisi, ia se agaese.

Sa faapea foi ona alu atu i fafo ma le afafine o le na a’afia ma taumafai a fa’ato’ato’a ia le ua molia.

Ina ua fesiligia e leoleo ia Nelisi po o fea o iai ia le agaese, sa faasino iai e Nelisi se agaese o lo’o i tafatafa o se niu i luma o le fale.

Na faapea loa ona lokaina mai e leoleo ia le ua molia, ma tu’u o ia i totonu o le ta’avale a leoleo.

Ina ua mae’a ona tu’uina le ua molia i totonu o le taavale, sa faapea loa ona fa’atalanoaina e leoleo ia le atalii o le na a’afia, e tusa ai ma le la’au malosi lea sa ta’ua e Nelisi.  Ae sa tali le atalii, o se fana meata’alo sa ia tago vali lanu uliuli.

Ina ua taunu’u leoleo ma le ua molia i le ofisa leoleo, sa lagonaina e leoleo le manogi fa’asuaava o le ua molia ma le mumu o ona mata.

Ua molia nei Nelisi i moliaga e lua;

Faitauga 1:  Faatupu vevesi i nofoaga faitele – o se vaega ‘B’ o solitulafono mama, lea e mafai ona nofosala ai se tagata i le falepuipui, i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga tolu – o se vaega ‘C’ o solitulafono mama, lea e mafai ona nofosala ai se tagata i le falepuipui i le sefululima aso, po o se sala tupe e $300; po o faasalaga uma e lua.

E $1,000 ua mae’a ona fa’atulagaina e tatalaina ai le ua molia mai i le falepuipui, e faatali ai lona faamasinoga.