Molia se tamaloa i le sauaina o lona afafine

Pago Pago - AMERIKA SAMOA

O le masina o Me o le tausaga nei sa fa’afeso’ota’i atu ai e le vaega a le EMS (Emergency Medical Services) ia le Ofisa a Leoleo i Fagatogo, e tusa ai ma se teineititi e 14 tausaga, o lo’o masalomia na sauaina e lona tua’a.

(O le a le lomia e le Samoa News suafa o i latou ua a’afia i lenei mataupu, aua le puipuiga o fanau iti).

E tusa ai ma fa’amaumauga a le malo, o le afiafi o le aso 28 o Me, 2024 na o’o atu ai se ripoti i le Ofisa a Leoleo i Fagatogo, mai i le EMS e tusa ai ma se teineititi e 14 tausaga, e faapea na sauaina e lona tama.

Sa faapea ona agai atu leoleo i le nofoaga na tupu ai le fa’alavelave ma o latou maua molimauina ai se teineititi o lo’o li’o e ni isi o lo’o latou taumafai e tapili ma fa’amalu lona tino.

Ina ua su’esu’eina o ia e leoleo, sa fai sina faigata ona tali le teineititi ma na faapea ona vala’au ai loa e leoleo ia le vaega a le EMS ae peitai, sa fa’ailoa mai e le EMS le leai o se latou ta’avale o avanoa.

O lea na aveina ai loa e leoleo ia le teineititi ma lona tina faapea ona tuagane laiti e to’atolu, i le falema’i a le LBJ.

Ae ina ua toe fo’i atu leoleo i se taimi mulimuli, ua toe fo’i le tina ma lana fanau i lo latou aiga.  O lea na toe aga’i atu ai loa leoleo i le nu’u o le aiga lea o lo’o tupu ai le faalavelave, ma toe aumai le tina ma le teineititi na a’afia, i le ofisa a leoleo i Fagatogo mo le fa’atalanoaina.

Sa fa’amatalaina e le teineititi i leoleo, a’o fa’alogologo lona tina, na amata mai le fa’alavelave i se la misa ma lona tuagane ona o se se’evae.  Ma na taumafa le la tama e taofi le la fusuaga ae peitai sa le mafai.

Na i’u ai ina mau le ua molia i le ua o le ofu a lona afafine ma toso mai i tua, e tusa ai ma le faamalaga a le teineititi.  Ae o le taimi lena, sa iai se ‘ula i le ua o le teineititi, ma o le malosi o le se’i mai a le ua molia, na afaina ai le ua o lona afafine i le ‘ula.

Sa ta’ua foi e le teineitiiti le tu’i e lona tama ia lona manava ma fa’afaigata ai ona ia manava.

Na fa’amaonia e le tina ia le molimau a lana tama teine ma sa ia ta’ua fo’i e faapea, e le o se taimi muamua lea ua sauaina ai e lona to’alua ia i latou ma lana fanau.  Sa faamatala e le tina, o lona to’alua o lo’o feagai ma tulaga faigata i lona loto ita ma o se tulaga e lamatia ai le saogalemu o ia ma lana fanau.

Sa ta’ua foi e le tina le lokaina o lona to’alua ia Novema 2023 ona o le sauaina o ia ma lana fanau.

Ina ua mae’a le fa’atalatalanoaga a leoleo ma le tina ma lana tama teine, na faapea loa ona agai atu leoleo ma loka mai le tama o le aiga ma moliaina ai loa o ia i moliaga e tolu, e aofia ai;

Faitauga 1:  Fa’ao’olima i lona tulaga e tolu – o se vaega ‘A’ o solitulafono mama, lea e mafai ona nofosala ai i le falepuipui e le sili atu ma le tausaga, po o se sala tupe e le silia ma le $1,000; po o fa’asalaga uma e lua.

Faitauga 2:  Sauaina o se tamaititi/teineititi – o se vaega ‘D’ o solitulafono mamafa, lea e mafai ai ona nofosala ai i le falepuipui i le o’o atu i le lima tausaga, po o se sala tupe e $5,000; po o faasalaga uma e lua.

Faitauga 3:  Faia o se tulaga e ono a’afia ai le saogalemu o se tamaititi/teineititi – o se vaega ‘A o solitulafono mama, lea e mafai ona nofosala ai se tasi i le falepuipui, po o se sala tupe e i le va o le $150 ma le $1,000; po o faasalaga uma e lua.

E $5,000 le vaegatupe sa faatulagaina mo le tatalaina o le ua molia, ina ia mafai ona faatali ai lona fa’amasinoga.