Molia se tamaloa 50 tausaga i le fa’ao’olima ina ua le moaina e lona tuaoi lana vao

Pago Pago - AMERIKA SAMOA

O le taeao o le aso 2 o Me, 2024, na fa’afeso’ota’ia ai e se tamaitai ia le Ofisa a Leoleo i Tafuna, e lipotia sona tuaoi, ua na fa’ao’olima i se alii o lo’o moa lana vao.

E tusa ai ma fa’amaumauga a leoleo, o lo’o ta’ua ai le aga’i atu o leoleo i le nofoaga na tupu ai le fa’alavelave i Tafuna ma talatalanoa ai ma le na a’afia i lenei faalavelave faapea lona tuaoi lea sa valaauina le ofisa a leoleo.

Sa faapea foi ona valaau e leoleo ia le vaega a le EMS ona sa mapeva le vae o le na a’afia i le taimi o le faalavelave.

Na faamatala e le tamaitai sa valaau i le ofisa a leoleo, ma sa ia ta’ua lona iai i totonu o lona fale, ae ona lagonaina mai le ‘e’e o se tagata.  Ma na ia va’aia le tosoina atu e le to’alua a le ua molia, ma se tina matua, ia le ua molia (Elia Autagavaia), aga’i i lo latou fale.  Ae o le taimi lea o lo’o valaau mai ai Autagavaia, i le na a’afia, lona faia o ni tulaga tiga ia te ia.

Ina ua taunu’u ia le vaega a le EMS, sa faapea loa ona aveina atu le na a’afia i le falemai mo togafitiga ae o le taimi lea ua mauaina ai e leoleo ia Autagavaia ma aveina atu o ia i le ofisa a leoleo.

Sa faamatalaina e le na a’afia, a’o moa lana vao i luma o le latou fale i le laumua o le ekalesia Peteli i Tafuna, ae alu atu le ua molia ma fesili atu pe aisea e na te le moaina ai le vao i luma o lona (Autagavaia) fale.  Sa tali mai iai le na a’afia, o le galuega lena a ia (Autagavaia) e fai.

Na avea le tali a le na a’afia na le fiafia ai Autagavaia ma amata ai ona ia faia ni uiga taufa’amata’u.  Sa ta’ua foi e le na a’afia, a’o ia taumafai e ave’ese ona se’evae faigaluega (boots), sa fa’ate’ia o ia ina ua tu’i o ia e Autagavai ma pa’u ai i lalo, ma mapeva ai lona vae.

Sa ta’ua foi e le na a’afia le fa’aauau ona tatu’i o ona foliga e le ua molia, seia o’o ina taofiofia o ia e lona afafine ma se alii.

I le fa’atalanoaina o Autagavaia i le ofisa a leoleo, sa ia ta’ua ai lona va’aia o le na a’afia, o moaina le fanua a le ekalesia, ae na te le moaina lona (Autagavaia) fanua.  O le mea lea na alu atu ai ma fesiligia le na a’afia, pe aisea ua na le moaina ai lona (Autagavaia) fanua.  Ae tali mai le na a’afia, o le galuega lea a ia (Autagavaia) e fai, o le moa o lona fanua.

Sa faamaonia e Autagavaia le faia o se la tauga’upu ma le na a’afia, ae peitai, e leai se mea na tupu, ma na ia toe fo’i i lona fale.  Ae peitai, na tamo’e atu le na a’afia ma tu’i o ia (Autagavaia), ae na misi lana tu’i.  Ma sa ta’ua e Autagavaia le fa’aauau ona tatu’i o ia e le na a’afia, se’ia o’o ai ina pa’u i lalo.  O le taimi lea na ia (Autagavaia) faasaga atu loa ua tatu’i le na a’afia, se’ia o’o ina toso ese mai o ia e lona afafine, aga’i atu i le latou fale.

Na fa’amaonia foi e Autagavaia lona lafoina o ni faamatalaga taufa’amata’u i le na a’afia.

Ua molia nei Autagavaia i moliaga e tolu;

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona loka ai se tasi i le falepuipui i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona faafalepuipui ai se tasi, i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 3:  Fa’ao’olima i lona tulaga e tolu – o se vaega ‘A’ o solitulafono mama, e mafai ona loka ai se tasi, i le o’o atu i tausaga e tasi (1), po o se sala tupe e $1,000; po o faasalaga uma e lua.

E $1,000 sa faatulagaina e mafai ona tatalaina ai le ua molia, e faatali ai lona faamasinoga.