Molia se tamaitai i le aveta’avale fa’asuaava

Pago Pago - AMERIKA SAMOA

E tusa ai ma fa’amaumauga a le malo, o le 5:17 i le taeao o le aso 10 o Me, 2024, na logoina ai le Ofisa Leoleo i Fagatogo, i se faalavelave tau ta’avale i Pago Pago, na a’afia ai se tamaitai e 30 tausaga, faapea se tama ma se tina matua.

Ina ua taunu’u leoleo i le nofoaga na tupu ai le faalavelave, sa molimauina le tama ma le tina matutua i totonu o le isi ta’avale, ma le tamaitai o Tiresa Lauama (lea ua molia) i leisi taavale.

O le ta’avale lea na iai le tina ma le tama matua, sa fa’afoeina e le tagata lea na valaauina leoleo.  Sa nofo i le nofoa pito i luma le tama matua ma na molimauina e leoleo le manu’a o le itu tauagavale o ona foliga faapea ma lona tulilima tauagavale.  O le nofoa sa pito i tua, i le itu na iai le tama matua, sa iai lona to’alua ma na foliga mai e leai ni ona manu’a na va’aia.

Sa aveina atu uma i la’ua i le LBJ , e le EMS.

O le ua molia, le tamaitai aveta’avale o leisi ta’avale, o Tiresa Lauama ma sa molimauina e leoleo le manu’a o lona muaulu ma le tiga o lona tino. 

Na ta’ua foi i totonu o fa’amaumauga a leoleo le lagonaina o se manogi o se ‘ava malosi mai i totonu o le ta’avale a le ua molia, ma ina o manavanava le ua molia i le tiga o lona tino, sa faapea foi ona molimauina e leoleo le malosi o lona manogi fa’asuaava. 

Ona o le tuga o manu’a a Lauama, sa le’i su’esu’eina ai o ia i le nofoaga na tupu ai le faalavelave, e faamaonia ai lona fa’asuaava.  Sa aveina foi o ia e le EMS i le falemai mo le togafitiga o ona manu’a.

I le 9:33 o lea lava taeao, sa fa’afeso’ota’i ai e leoleo ia le foma’i na togafitia o Lauama ma le ulugalii matutua.  Ina ua mae’a togafitiga o Lauama sa faapea loa ona tu’uina atu o ia i lalo o le va’avaaiga a leoleo na iai i le falemai.

Sa faapea ona sainia e le ua molia ia se pepa faataga e su’esu’eina ai o ia e faamaonia pe le faamaonia ai lona fa’asuaava.

Ua molia nei Lauama i moliaga e tolu, e aofia ai:

Faitauga 1:  Faafoeina o se taavale ae o lo’o fa’asuaava, ma afaina ai se tagata; o se vaega ‘D’ o solitulafono mamafa e mafai ona nofosala ai se tagata i le falepuipui, i le o’o atu i le lima tausaga, po o se salatupe e $5,000 po o faasalaga uma e lua.

Faitauga 2:  Aveta’avale le faautauta – o se vaega ‘B’ o solitulafono mama, e mafai ona nofosala ai se tagata i le falepuipui i le o’o atu i le ono masina, po o se sala tupe e $500; po o faasalaga uma e lua.

Faitauga 3:  Leai se laisene aveta’avale – o se vaega ‘B’ o solitulafono mama, e mafai ona nofosala ai se tagata i le o’o atu i le ono masina, po o se sala tupe e $500; po o faasalaga uma e lua.