Molia se ave pasi i le fa’ao’olima e aunoa ma se mafuaaga

Pago Pago - AMERIKA SAMOA

O le taeao o le aso 11 o Aperila, 2025, na fa’afeso’ota’i ai e se alii ia le Ofisa a Leoleo i Fagatogo, ma ripotia le sauaina o ia e se avepasi, e aunoa ma se mafua’aga.

E tusa ai ma fa’amaumauga a le faamasinoga, sa agai atu leoleo i le nofoaga na tupu ai le faalavelave, i luma o se fale ta lavalava, sa iai le alii na a’afia ma sa molimauina e leoleo le iai o ni manu’a i ona foliga.

Na faapea loa ona fa’afeso’ota’i e leoleo ia le vaega a le EMS mo sa latou auaunaga.  Ma a’o latou fa’atalitali mo le taunu’u atu o le EMS, na faapea ona fa’atalanoaina e leoleo ia le alii na a’afia.

Sa ia faamatalaina e faapea, a’o faatalitali sana pasi i luma o le fale ta lavalava, ma talatalanoa i luga o lana telefoni, sa fa’ate’ia o ia i le tu o se pasi lanu mumu i luma o ia, ma oso i fafo le ave pasi.  Na savali sa’o atu lava le ave pasi ia te ia, ma tu’i ona foliga ma pa’u ai i lalo, a’o fa’aauau ona tatu’i o ia e le ave pasi.

Ma ina o ia taumafai e tali atu i le sauaina o ia, na tago mai le ave pasi i le se’i atu lana telefoni, ma toe fo’i i luga o le pasi, ma agai atu ai lana pasi, agai i Sasa’e.

Ina ua mae’a ona fa’atalanoaina e leoleo ia le alii na a’afia, sa faapea loa ona aveina o ia e leoleo ma tu’u i totonu o le ta’avale.  Ma talosagaina e leoleo ia le pule o le fale ta lavalava, mo ata vitio mai i lana masini pu’e ata.

Sa fa’amaonia e le ata vitio mai i le fale ta lavalava, ia le faamatalaga a le alii na a’afia.

Na faapea ona agai atu leoleo ma le alii na a’afia, i le ofisa a leoleo i Fagatogo mo le fa’aauauina o su’esu’ega a leoleo, ma faatalitali ai le EMS, ae peitai, na te’ena e le alii na a’afia, ia le auaunaga a le EMS, e ui ina sa fula lona mata taumatau faapea ma le ma’osia o ona foliga ma lona isu.

Sa maua e leoleo ia le pasi i Faga’alu, ma o latou taofia le pasi, ae ave le ave pasi, le susuga ia Samitoto Kaio, i le ofisa mo le fa’atalanoaina.  Na te’ena e Kaio le faia o sana fa’amatalaga mo leoleo.

 O moliaga a Kaio, na aofia ai le Faatupu Vevesi i nofoaga faitele ma le Fa’ao’olima i lona tulaga e tolu.  O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

O le moliaga o le Fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga po o se sala tupe e $1,000; po o faasalaga uma e lua.

E $1,000  na fa’atulagaina e mafai ona tatalaina ai le molia, mai i le falepuipui, e faatalitali ai lona faamasinoga.