Molia se ali’i talavou umia o fualaau fa’asaina ma le fa’amoemoe e faatau

O le 2 vaiaso talu ai na taofia faapagota ai e Leoleo se ali’i talavou mai Vailoa, ona o tu’uaiga i lona umia fa’asolitulafono lea o vaega o le pauta fa’asaina o le aisa, faapea ai ma vaega o le laau fa’asaina o le mariuana.

O le vaiaso na te’a nei na tula’i ai Matthew Lagai i luma o le afioga i le ali’i Fa’amasino ia Elvis P. Patea mo lana ulua’i iloiloga.

E 4 moliaga mamafa ua molia ai e le malo ia Lagai. O ia moliaga e aofia ai le moliaga e tasi o lona umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta fa’asaina o le aisa ma le fa’amoemoe e tulei ma faatau atu i isi tagata; tasi le moliaga o le umia faasolitulafono o vaega o le laau fa’asaina o le mariuana; tasi fo’i le moliaga o le umia faasolitulafono o vaega o le laau fa’asaina o le mariuana; o vaega uma ia o solitulafono mamafa, lea e mafai ona fa’asala ai se tasi i le toese mo le umi e le itiiti ifo ile 5 tausaga ae le silia i le 10 tausaga, pe fa’asala fo’i i le salatupe e le itiiti ifo il e $5,000 ae le sili atu i le $20,000, poo le fa’asala fo’i i fa’asalaga uma ia e lua.

E $50,000 le vaega tupe lea ua fa’atulaga e le Fa’amasinoga e tatala ai i tua Lagai.

TAGI A LE MALO

E pei ona taua e le malo i le latou tagi e fa’apea, o le po o le aso 5 o Tesema, na logoina ai e Leoleo o le Ofisa o Leoleo i Tafuna sui o le Vaega e gafa ma le suesuseina o mataupu tau fualaau fa’asaina, ina ia aga’i atu i le Ofisa i Tafuna mo le suesueina o se mataupu e fa’atatau i fualaau fa’asaina sa maua i totonu o se ta’avale na taofi e Leoleo i luma o se faleoloa i Iliili.

E to’atolu Leoleo Suesue mai le vaega e suesueina mataupu tau fualaau faasaina na aga’i atu mo le suesueina o lenei mataupu.

Na taua e le malo i le latou tagi e fa’apea, e to’afa ali’i Leoleo sa i tiute i luga o le alatele a le malo i le afioaga o Iliili i le po na tula’i mai ai le fa’alavelave. Ao faatino tiute a ali’i  Leoleo nei e to’afa, sa latou molimauina se taavale pikiapu numera 5554 o aga’i atu i se saoasaoa e le faatagaina, atoa ai ma le faaletonu o le moli o le laisene pito i tua. Na taofi e Leoleole ta’avale ma iloa ai, e to’alima ali’i o lo o i ai i totonu, o i latou nei e aofia ai ali’i matutua e to’afa ma se ali’i e toatasi e talavou i lalo o le tulafono.

I le taimi na taofi ai e Leoleo le ta’avale, na faatino ai loa galuega masani a Leoleo o le saikiina lea o le tino o le taavale, e fa’aaoga ai le ta’ifau sosogi, K-9 Lucy. I le taimi na sosogi ai e K-9 Lucy fa’ataamilo i le tino o le ta’avale, sa vaaia ai le faailoga e le ta’ifau o se gaioiga e ta’u atu ai i Leoleo, e i ai fualaau fa’asaina o lo o i totonu o le ta’avale.

Na saili e Leoleo totonu o le ta’avale ma maua ai se teutusi pa’epa’e o lo o nana i le va  nofoa o le ta’avale. I totonu o le teutusi lea o lo o i ai ni tama’i pepa iila se 3 o lo o i ai straw ua uma ona ta tipi tulimanu ae utu i ai totonu vaega o le pauta pa’epa’e. E tusa ma le 96 le aofa’i o straw ua uma ona ta tatipi tulimanu ae utu i ai pauta pa’epa’e sa maua i totonu o le teutusi pa’epa’e.

Sa maua ai foi e Leoleo i totonu o le ta’avale se tama’i pepa iila o lo o i ai vaega o lau mamago e foliga mai o lau o le laau faasaina o le mariuana.

O le maua ai e Leoleo o fualaau fa’asaina i totonu o le ta’avale, na fa’atonuina ai loa i latou uma e to’alima sa i totonu ina ia agai uma i fafo o le ta’avale. O i latou sa i totonu o le ta’avale sa aofia ai ma le susuga a Lagai, le ali’i lea ua molia i lenei mataupu.

A o i ai i latou nei e to’alima i fafo o le ta’avale, sa maitauina e Leoleo le susuga a Lagai o lo o taumafai e tago i le taga o lona ofu. Ae ina ua ta’ita’i atu e Leoleo ia Lagai i totonu o le ta’avale Leoleo, sa latou maua ai se tama’i pepa iila o lo o i ai vaega o le pauta pa’epa’e i le vaega sa tu ai o ia i fafo.

Na muamua lava fesiligia e Leoleo ia Lagai e tusa ai o fualaau fa’asaina sa maua i le vaega sa tu ai i autafa o le ta’avale. Ina ua fesiligia o ia e Leoleo, sa ioeina ai e Lagai e faapea, o fualaau fa’asaina uma lava sa maua i totonu o le ta’avale ma fafo o le ta’avale, o mea uma ia a ia.

Sa ia taua e faapea, sa ia fa’aalu lana tupe e siliai le $2,000 e fa’atau mai ai fualaau fa’asaina nei mai le tagata e suafa ia Chiko mai le nofoaga e taua o le “Filifili”. O le faanaunauga sa ia te ia, e fia fai sana pisinisi musika, ma ua ia manatu fo’i, na pau le auala e mafai ai ona tele ni ana tupe ma faaleleia atililana pisinisi ua mafaufau i ai, o le fai lea o sana tama’i pisinisi e tulei ma fa’atau atu ai fualaau faasaina.

Na fesiligia e Leoleo nisi o ali’i sa i totonu o le ta’avale e aofia ai le ave ta’avale, o ia fo’i lea e ana le ta’avale, ma le ali’i e to’atasi lea e laititi i lalo o le tulafono.

Na taua e le ali’i ave ta’avale e faapea, o ia ma ali’i e to’atolu na latou aga’i atu e momoli nofoa i le Bowling Alley i le nofoaga o lo o i ai le pisinisi o Taavale Mautotogi a le latou aiga, ae latou maua atu ai ai Lagai o luga o le alatele i Taputimu, ma latou pikiina ai lea o ia.

Ina ua latou fo’i mai ina ua mae’a ona momoli nofoa i le Bowling Alley, na taofia ai loa e Leoleo le latou ta’avale i Iliili. Na taua e le ave ta’avale le faateia o ia ina ua maua e Leoleo fualaau faasaina i totonu o lana ta’avale, ona o lo o i ai lona talitonuga, e le o i ai ni fualaau fa’asaina i totonu o le ta’avale.

Na taua e le ali’i e talavou i lalo o le tulafono i Leoleo e fa’apea, ina ua taofi e Leoleo le latou ta’avale, na faateia o ia ina ua tuu atu e Lagai se teutusi lanu moana ia te ia e nana. Sa ia tago ma tuu atu le teutusi lea i le isi alii sa i totonu o le ta’avale, peita’i sa musu le ali’i lea e talia le teutusi, o lea na ia tago ai loa ma nana le teutusi i totonu o lona ofu.

Ina ua latou o i fafo ma le ta’avale, sa ia tago ai loa ma togi i tua o le pa ma’a sa i o latou tafatafa le teutusi.

O le po lava lea ina ua mae’a suesuega a Leoleo, na toe aga’i atu ai loa Leoleo ma le ali’i talavou lenei e fa’asino le vaega tonu sa tago tia’i ai le teutusi. Ina ua maua e Leoleo le teutusi, sa latou siaki totonu ma maua i ai ni taga pepa iila o lo o i ai ni tama’i taga pepa se 90 o lo o i ai lau mamago o le mariuana, ae o le isi taga pepa o lo o i ai sikaleti mariuana e 15 ua uma ona taai.

O le mae’a ai ona fesiligia e Leoleo o ali’i matutua e to’afa sa i totonu o le ta’avale mo le umi e 48 itula, ae o le ali’i talavou sa i ai na tatala i tua i lalo o le vaavaaiga a ona matua, e faatali ai suesuega o lo o fa’aauau pea e faatatau i lenei mataupu.

E talitonu le Samoa News, e na o le susuga a Lagai ua molia e le malo i lenei mataupu.