Molia se ali’i talavou i lona taumafai e ave faamalosi se tamaitai

Pago Pago, AMERICAN SAMOA -

O le ali’i talavou e 22 tausaga le matua lea na tu’uaia i lona taumafai e ave faamalosi se tamaitai talavou ina ua mae’a ona ia faaoolima ia te ia, ua taofia nei e Leoleo i le Toese i Tafuna ina ua pu’e faapagota o ia i le 2 vaiaso talu ai ae maua ai fualaau fa’asaina.

E 2 tagi tusitusia a le malo ua tu’uaia ai le susuga a Victor Ameperosa. O le tagi muamua, o lo o tu’uaia ai le ua molia i le moliaga o lona taumafai e taofi faapagota se isi tagata i se auala faamalosi; tasi le moliaga o lona taumafai e tagofia itutinosa o se tamaitai i se auala faamalosi; o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le siliai le $5,000, poo le faasala foi i faasalaga uma ia e lua; atoa ai ma moliaga mama e 2 o le faatupu vevesi i nofoaga faitele atoa ai ma le faaoolima i le tulaga tolu.

E $30,000 le tupe lea ua faatulaga e totogi ona faatoa mafai lea ona tatala Ameperosa i tua i le mataupu muamua lenei.

I le tagi lona lua a le malo ua molia ai o ia i le moliaga o le umia faasolitulafono o vaega o le pauta faasaina o le aisa faapea ai ma le moliaga o le umia faasolitulaafono o vaesga o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e amata mai i le $5,000 e oo atu i le $20,000, pe faasala foi i faasalaga uma ia e lua.

E $10,000 lea ua faatulaga e totogi ona faatoa mafai lea ona tatala Ameperosa i tua i le mataupu lenei.

O le aso Tofi o le vaiaso fou lea ua fa’atulaga e faia ai le ulua’i iloiloga o le nei mataupu.

TAGI A LE MALO

O le taeao o le aso 26 o Mati 2020 na faafesootai ai e le aunty a le tamaitai na aafia le Ofisa o Leoleo mo se fesoasoani, ona o le fa’alavelave e pei ona taumafai ai Ameperosa e ave faamalosi lona niece e 17 tausaga le matua i totonu o lana ta’avale ma le fa’amoemoe e ave i se isi nofoaga.

Na taua e le aunty o le tamaitai na aafia, ina ua uma ona fasi e le ua molia le tamaita’i na aafia i ona lima, ona sosoo ai loa lea ma lona taumafai e toso o ia i totonu o le pikiapu lanu uliuli o lo o tu mai i le isi itu o le auala. Ae na avea taumafaiga a le tausoga laititi o le tamaitai na aafia e ala i lona tauai o le ta’avale a le ua molia i maa, na mafai ai loa ona faasaoina le tamaitai na aafia.

Na maua le avanoa e fesiligia ai e Leoleo le tamaitai na aafia ma lona aunty e tusa ai o le fa’alavelave sa tulai mai. Sa i ai fo’i ma le tausoga o le tamaitai na aafia i le talanoaga sa faia ma Leoleo.

Na taua e le aunty i Leoleo, o le tamaitai na aafia o le afafine a lona tuagane o loo malaga i Hawaii ma lona to’alua mo ana talavai, ae o lo o latou faamuli ma le tama’ita’i lea i lo latou aiga i Fogagogo.

I le po o le aso 27 o Mati, na alu ai le tamaitai na aafia e moe i le fale o lona grandmother i Tafuna ma tafao ai. O le po lea na alu atu ai le ta’avale a Ameperosa i lo latou fale i Fogagogo e su’e atu le tamaitai na aafia, ae na faailoa i ai e le alii e 14 tausaga le matua, o le tausoga a le tamaitai na aafia, o loo alu le tamaitai e moe i le fale o lona grandmother i Tafuna ona toe usu atu ai lea i le aso e sosoo ai.

I le taeao na sosoo ai, o le taeao foi lea na tula’i mai ai le faalavelave, e le i ta le itula e 7:00 ae ua momoli atu le tamaitai na aafia e le isi ona aunty. E le i iloa e le tamaitai na aafia ua leva ona paka le ta’avale pikiapu lanu uliuli a Ameperosa i le isi itu o le auala ma vaavaai atu i le taimi e momoli ane ai o ia i lo latou fale.

O Ameperosa ma le tamaitai na aafia e uo i laua, peita’i o le tele o taimi e pei ona taua e le aunty, e fasi ai e Ameperosa le tamaitai na aafia e pei lava o lona to’alua.

Na faateia le tamaitai na aafia ao savali aga’i atu i le faitoto’a o le pa e ulufale ai i totonu o le lotoa ina ua valaau ane se tagata ia te ia. Na faliu le tamaitai i tua ma ia iloa ai Ameperosa ua oo atu, ma fesili atu poo fea na i ai i le po ua mavae. Na tali le tamaitai, o ia sa moe i le fale o lona grandmother. O le taimi lea na po ai loa e le ua molia foliga o le tamaitai na aafia ma ia fai i ai, poo le faitalia a ai na alu ai ua moe i le fale o lona grandmother.

E pei ona taua e le malo i le latou tagi, sa umi se taimi o fasi e Ameperosa le tamaitai na aafia i luma o le pa e ulufale ai i totonu o le lotoa o le fale. O le taimi lea o loo tutu mai ai i luma o le fale le tausoga tama a le tamaitai na aafia e 14 tausaga le matua, maia tamo’e mai ai loa e fesoasoani i si ona tei lea o loo fasi atu e Ameperosa.

Na ta tu’i e Ameperosa foliga o le tamaitai na aafia ma taumafai e toso i totou o le ta’avale, peita’i sa finau malosi fo’i le tamaitai na aafia ma taumafai e una’i ese lima o Ameperosa o lo o maua ia te ia. Na i’u lava ina mafai ona ave e Ameperosa le tamaitai na aafia i totonu o le ta’avale, ma ia faatonu loa le ave ta’avale e alu ese le ta’avale. Ae na avea le tau’ai e le alii e 14 tausaga le matua le ta’avale i ma’a ma itu na tuai ai ona alu ese le ta’avale, ae faafuase’i ai ona matala le faitoto’a o le ta’avale ma vaaia ai le tamaitai na aafia ua tamo’e ese mai le ta’avale ma aga’i atu i totonu o le pa o le lotoa.

Na oso Ameperosa i totonu o le ta’avale ma alu ese loa le ta’avale i se saoasaoa uiga ese.

Na taua e le tama’ita’i na aafia i Leoleo e fa’apea, na te le i mafaufauina o le a tupu se mea faapea ia te ia i lea aso. Ae ua laki le vave o gaioiga a si ona tausoga ua mafai ai ona faasaoina lona ola.

O le 2 vaiaso talu ai na faatoa maua ai e Leoleo faamatalaga e uiga ia Ameperosa ma aga’i atu ai loa Leoleo ua pu’e faapagota mai ao ia. A o le i auina atu Ameperosa i le Ofisa o Leoleo mo isi suesuega, sa saili muamua e Leoleo lona tino mo ni fualaau faasaina poo ni a’upega.

I totonu o le taga o le ofutino a Ameperosa sa faia i le itu taumatau, na maua ai e Leleo se pepa iila o lo o i ai lau mamago o le laau o le mariuana. O le isi taga o lona ofu sa mau a paipa tioata e 2 o lo o i ai vaega o le pauta faasaina o le aisa.

E le i mana’o Ameperosa e fai sana faamatalaga i Leoleo e tusa ai o fualaau fa’asaina sa maua ia te ia.