Molia se ali’i talavou i le faiaiga ma se tama’ita’i e 13 tausaga

O le amataga o le masina nei na pu’e fa’apagota ai e Leoleo se ali’i e 21 tausaga le matua mai Malaeimi, ona o tu’uaiga i lona fai’aiga lea i se teineititi e 13 tausaga le matua.

O lo o tu’uaia e le malo le ali’i o Kose Logova’a i moliaga mamafa e 8 e aofia ai moliaga e 2 o le fai’aiga ma se tama’ita’i e laititi i lalo o le tulafono; 2 moliaga o le faia o uiga fa’asotoma; 4 moliaga o le tagofia o itutinosa o se tama’ita’i e le fa’aipoipo i ai, ma moliaga mama e 2 o le faia o gaioiga e ono lamatia ai le soifua saogalemu o fanau e laiti i lalo o le tulafono.

O le vaiaso na te’a nei na tula’i ai Logova’a i luma o le fa’amasinoga fa’aitumalo, ma fa’atulaga ai loa e le afioga i le ali’i Faamasino ia Fiti Sunia le tupe e $10,000 e totogi ona fa’atoa mafia lea ona tatala o ia i tua e fa’atali ai taualumaga o lana fa’amasinoga.

Afai e mafai ona tatala o ia i tua, ua fa’asa ona ia taumafai e fa’afesootai le tama’ita’i na a’afia i lenei mataupu i soo se auala, fa’asa ona taumafai e sola ese ma le atunu’u, a ia avea o ia ma tagatanu’u e tausi i tulafono a le malo i taimi uma, ma ia auai i soo se taimi e valaau ai lana mataupu i luma o le fa’amasinoga.

O lenei mataupu na tofu atu i le Ofisa o Leoleo, ina ua talosagaina e se ali’i se fesoasoani mai Leoleo, e suesue ai le mataupu fa’asaga i lona niece na a’afia i ni gaioiga fa’afeusuaiga.

Na aga’i atu Leoleo ma maua le avanoa e fesiligia ai le tama’ita’i na a’afia i lenei mataupu.

Na taua e le tama’ita’i lea i Leoleo e fa’apea, o le fa’alavelave e pei ona fesiligia na tula’i mai i le taimi na alu ai ma moe i le fale o le fafine lea sa masani ona ia tausia lona grandmother i Malaeimi.

I le po o le aso 28 Aperila 2018, na taua e le tama’ita’i i Leoleo le fa’ateia o ia a’o moe ina ua alu atu Kose ma fafagu o ia, ma tauanau o ia la te fai’aiga. Sa fa’ailoa atu e Kose ia te ia, ua le maua sana moe ona o le mafaufau atu ia te ia.

Na talia e le tama’ita’i na a’afia le manaoga o Kose ma la fai’aiga ai loa i le vaveao o le aso lava lea. O iina na amata mai ai loa le la mafutaga ma Kose ma fa’aauau mai ai lava se ia oo mai i le po o le aso 23 Iuni 2018, lea na alu atu ai Kose e toe fafagu mai fo’i o ia la te fai’aiga, ae fa’afuase’i ai loa ona ala mai le aunty o le tama’ita’i ma ia fesiligia ai Kose i le mafua’aga na taumafai ai e fafagu le tama’ita’i na a’afia.

Na taua i faamaumauga a le fa’amasinoga le sola ese o Kose mai le fale ina ua ala mai le aunty o le tama’ita’i na a’afia.

Ina ua mae’a ona logoina Leoleo e tusa ai o lenei mataupu, na aga’i atu ai loa Leoleo e saili Kose, peita’i e le i mafai ona maua o ia.

E 3 aso talu ona taumafai Leoleo e saili le ua molia, ae vaaia loa le aga’i atu o le ua molia ma se tasi o lona aiga i le Ofisa o Leoleo i Tafuna, ma maua ai loa le avanoa e fesiligia ai o ia e tusa ai o lenei mataupu.

Na ioeina e Logova’a i Leoleo le la mafutaga ma le tama’ita’i na a’afia, ma e silia i le fa’a 5 ona la fai’aiga.

O le aso Faraile na te’a nei na tula’i ai Logova’a i luma o le fa’amasinoga maualuga, ma ia teena ai tu’uaiga fa’asaga ia te ia. O le aso 5 Oketope lea ua fa’atulaga e toe valaau ai lana mataupu i luma o le afioga i le ali’i Fa’amasino Sili ia Michael Kruse.