Molia se alii na gaoia le telefoni a se alii leoleo i le uafu

Pago Pago - AMERIKA SAMOA

E tusa ai ma fa’amaumauga a le faamasinoga, o le po o Me 18, 2025 na molimauina ai e leoleo ia le taofiofia e se alii e leoleo o le uafu i Fagatogo, sa tu’uaia i lona gaoia o se telefoni a se tasi o leoleo o le uafu.

Mulimuli ane, sa maua ai foi i totonu o le kava o le telefoni, ia ni vaega o fualaau faasaina.

Sa molia ia Gaupule Fulu i le Gaoi, o se vaega ‘C’ i solitulafono mamafa, e mafai ona nofosala ai i le falepuipui, e le sili atu ma le fitu tausaga, po o se sala tupe; po o faasalaga uma e lua.

E tusa ai ma su’esu’ega a leoleo, na masalomia ia Gaupule i le gaoia o se telefoni a se tasi o leoleo i luga o le uafu a le malo i Fagatogo.  Ma e taunu’u atu leoleo mai i le Ofisa a Leoleo, sa tu’uina atu ia i latou e leoleo mai i le uafu, ia Gaupule.

Sa fa’ailoa atu e se tasi o leoleo mai i le uafu a le malo, i leoleo mai i le ofisa a leoleo, le gaoia o lana telefoni.  Ma e tusa ai ma le faamatalaga a le leoleo o le uafu, na amata faigaluega i le taeao na tupu ai le faalavelave, i lana galuega lona lua, o se sikulaki i se kamupani tua.  Ma sa ia va’aia Gaupule, o fealua’i fafo o le fale na ia leoleo, ma ia fesiligia ai Gaupule po o le a lana mea o fai.

Sa tali Gaupule, o la e eva.  Ma sa faatonuina o ia e le alii sikulaki e alu e eva i le maketi.  O le lata i le aoauli, na fai ai se malologa a le alii sikulaki, ma toe te’i ane ai i l uga i le 1:00 i le aoauli, ua latalata i le taimi e manava ai.  Ae ona va’aia, ua leai lana telefoni.

Ina ua taunu’u le sikulaki i lona fale, sa ia fa’aaogaina le telefoni a lona tuafafine, e valaau ai lana telefoni lea ua leiloa.  Ae tali mai e se leo, e masani ai.  Ma o le talitonuga a le sikulaki, o le leo o Gaupule lea na tali mai i lana telefoni lea ua leiloa.  Ma sa fai mai le tagata na tali maia lana telefoni, o le telefoni lea sa faatau atu i le $100.

O lea na fai atu ai loa le sikulaki i le tagata sa tali mai i lana telefoni, e alu atu e momoli atu le telefoni i lana galuega lona lua (i luga o le uafu), i le 6:00 o lea afiafi, ae o le a ia (sikulaki) tu’uina atu se $100.  Ma sa ta’ua e le sikulaki, na mafua ona ia faia lea fuafuaga, ina ia pu’eina ai le tagata lea ua alu ma lana telefoni.

O le latalata i le 7:00 o lea afiafi, na va’aia ai le savali atu o Gaupule agai i Utulei.  Ma na vala’au mai iai le alii leoleo o le uafu (po o le sikulaki), e fia talanoa iai.  Ma sa faatolu ona ia fesiligia Gaupule pe na alu atu i le nofoaga na galue ai i le ao, ae na tali Gaupule e leai.

Ae o le taimi lena, sa ia (leoleo/sikulaki) e vaavaai faalelei ia Gaupule, ae se’i vala’au le ofisa a leoleo.

Sa taumafai le alii o Gaupule e sola, ae na sulu ma pa’u ma mafai ai ona pu’eina o ia e leoleo o le uafu.  O le taumafaiga a leoleo o le uafu e fa’atu i luga ia Gaupule, na pa’u ‘ese mai ai le telefoni mai totonu o lana taga, ae e le’i taunu’u atu leoleo mai i le Ofisa a Leoleo.

Na faapea ona aveina atu Gaupule i le Ofisa a Leoleo i Fagatogo mo le fa’aauauina o su’esu’ega a leoleo.  Ma na molimauina e leoleo, i le taimi na ave faapagotaina ai Gaupule, ia le mumu o ona mata ma le fa’atosotosololoa o lana tautala ma o ana gaioiga e foliga mai o se tagata, o lo’o a’afia i vaega o fuala’au faasaina.

Sa taumafai le na molia, e tete’e atu i gaioiga a leoleo ae peitai, sa mafai ona aveina o ia i totonu o le ofisa a leoleo ma togafitia e le vaega a le EMS.

I lana faamatalaga, ina ua su’esu’eina o ia e leoleo, sa ia fa’amaonia lona gaoia o le telefoni a le alii sikulaki, po o le leoleo o le uafu, a’o moe o ia.  Ma sa ia (le na molia), nanaina se tamai taga pepa iila, o iai se vaega o fualaau faasaina (Aisa), i tua o le kava o le telefoni.

Ina ua su’esu’eina e leoleo ia tua o le telefoni, e pei ona sa faamatalaina e le na molia, sa mauaina ai ia le tamai taga pepa iila ma sa faapea ona fa’ao’oina atu i le vaega e mataituina ia vaega o fualaau faasaina, mo a latou suesuega.

E $5,000 le vaegatupe na fa’atulagaina, e mafai ona tatalaina ai le na molia, a’o faagasolo lana mataupu i le faamasinoga.