Molia se alii na fa’ao’olima i se tina ona o le tomumu

Pago Pago - AMERIKA SAMOA

O le aoauli o le aso 17 o Aperila, 2024 na telefoni ai se tama i le Ofisa a Leoleo i Tafuna, e lipotia ai le fa’ao’olima o sona atalii i se tina.

Ina ua taunu’u leoleo i le nofoaga na tupu ai lenei fa’alavelave, i le afioaga o Fagaima, sa va’aia le ua molia, o lo’o nofo mai i fafo o le latou fale, ma ona lima o lo’o iai se toto.

Sa faamatalaina e le tina ua a’afia i lenei faalavelave, i leoleo, le faia o sana galuega faamama faamalama i totonu o le fale, ae ona lagona mai le fa’afefeina e le ua molia, o sana tama teine.  Ma sa ia fesiligia le ua molia, pe aisea o lo’o ia fa’afefe ai lana tama teine, ae tali atu le ua molia, o la e la te ta’a’alo.

Sa ta’ua foi e le tina, le savali atu o le ua molia ma po ona foliga ma tatu’i lona ulu.  Ma ia tu’iina se kapeneta e iai se fa’ata, ma nuti ai le fa’ata.

Na aveina loa e leoleo ia le susuga ia Raymond Siimou i le Ofisa a Leoleo mo le fa’aauauina o a latou suesuega.

I le fa’atalanoaina o Siimou e leoleo, i se taimi mulimuli ane, sa ia ta’ua ai e faapea, sa o la nofonofo ma lona atalii i fafo o le fale, ae alu atu lona ‘niece’.  Sa ta’ua e Siimou, o so’o se taimi lava e va’ai ai lona ‘niece’ ia te ia, e fefe.  Ma o le mafuaaga lea na tagi ai ma tamo’e i lona tina.

Na fa’aauau le faamatalaga a Siimou, i lona faalogoina o le tomumu a le tina a lona ‘niece’ ma o le mafuaaga lea na ia savali atu ai ma fesiligia o ia, pe aisea le mea e tomumu ai, ma po ona foliga ma tu’i o ia.

Ua molia nei lenei alii e 30 tausaga, i le Fa’ao’olima i lona tulaga e tolu – o se vaega ‘A’ o solitulafono mama, lea e mafai ona nofosala ai se tasi i le tausaga e tasi (1) po o se sala tupe e $1,000; po o faasalaga uma e lua.

E $1,000 le vaegatupe faatulagaina e mafai ona tatalaina ai le ua molia, e faatali ai lona faamasinoga.