Molia se alii ma se tamaitai na pisa ona o fualaau faasaina

Pago Pago - AMERIKA SAMOA

O le aoauli o le aso 3 o Ianuari, 2024, na valaau atu ai se tamaitai i le Ofisa a Leoleo i Tafuna, e lipotia se fa’alavelave o tulai mai i Ottoville, i le va o lona uso ma lana uo tama.  Sa ta’ua e le tamaitai na valaau i leoleo, e le o iai o ia i le nofoaga o lo o tupu ai le faalavelave, ae o lona tina na valaau atu ia te ia, e fa’afeso’ota’i leoleo, ona o la e fufusu lona uso ma lana uo tama, ona o fualaau fa’asaina.

Sa ta’ua e le tamaitai na valaau i leoleo, e le o se taimi muamua lea ua tupu ai lenei faafitauli i le va o lona uso ma lana uo tama.

Ina ua taofia leoleo i le nofoaga o tupu ai le faalavelave, sa talatalanoa ma le tina o le ua molia faapea ma lona uso, ma na o la faamatalaina i leoleo, o i la’ua ia o Tereise Sunia ma Tanumaleu Luani (lea ua molia), e nonofo uma i le fale o le uso o le tina a Sunia i Ottoville.  Sa ta’ua e le uso a Sunia, le faapopoleina o lona tina ina ua tupu mai le vevesi i le va o lona uso ma lana uo tama (Luani).

Sa faamatala e le tina a Sunia, na alu atu e asi lana tama teine ma Luani ma avatu iai le la ‘ASPA debit’ ua uma na totogi, ae na faateia o ia ina ua tamo’e mai Luani o lo o totolia uma lona lima.  Ma na fai atu Luani ia te ia, na oso atu lana tama teine ma se naifi ia te ia (Luani) ma o lo o manaomia na alu i le falemai.  O iina na valaau ai loa le tina a Sunia i lona to’alua, e sau e ave Luani i le falemai, ona toe valaau lea o le tina i lana tama teine (lea na valaau i leoleo) e valaau lona tama ma le ofisa a leoleo.

Sa fa’amatala foi e le tina lona savalivali fa’ata’amilo i le fale, ma ia vaaia le ta’ei uma o faamalama ma ua paepae uma tioata i totonu o le potu malolo.

Sa ta’ua e le tina, na faamatala atu e lana tama teine (Sunia) ia te ia le mea na tupu i le va o la’au ma Luani e faapea, na faatonu e Sauni ia Luani e alu ‘ese ae le mana’o le alii o Luani e alu ‘ese, ma i’u ai lava ina o la pisa.  Na ta’ua fo’i e le tina, sa taumafai Sauni e tapuni fa’amalama o le fale, ae o lo o fa’aauau lava ona o la misa ma Luani ona o fualaau faasaina.

Sa aveina atu loa Sunia i le Ofisa a Leoleo i Tafuna mo le su’esu’eina o ia.  Ma sa ia faamatala ai i leoleo, e ala mai i luga, e na te le i vaai i lana ta’avale.  Ma o le mafua’aga lena o lona ita, ua ese le mea ua paka ai le ta’avale, e foliga mai na alu Luani i se mea.  Ma na fiu Luani e talanoa atu ia te ia, ae sa ia faatonuina Luani e alu ese, ae musu.  O le mea lea na toe alu ai i totonu o lona potu ma tapuni le faitoto’a.  Ae mulimuli atu ai Luani i totonu o le potu ma sa ia taumafai e u’unai ese Luani.

Sa ta’ua e Sunia, o lona ita tele i le musu o Luani e fai le mea o lo o fai atu, na ia tago ai loa u’u mai se naifi ma tuli Luani.  Ina ua tamo’e i fafo Luani, na ia tago loa loka le faitoto’a.

Sa faamatala foi e Sunia, ina ua ia vaai atu ua tamo’e Luani agai i se faamalama, sa ia tamo’e atu ma tapuni le faamalama.  Ma o lona tago atu e tapuni le faamalama lona tolu, atonu ua malosi lana u’una’i, na ta’e ai loa le faamalama lea.  Ae o iina na fai mai ai Luani ia te ia, ua lavea lona lima, ae taunu’u atu loa lona tina.

Sa agai atu foi leoleo i le falemai e fa’atalanoaina ia Luani ma e taunu’u atu leoleo, o lo o faatalitali Luani mo le togafitiga o lona lima.  Sa ia faamatalaina foi le la misa ma Sunia, i leoleo, lea na faai’u I le lavea o lona lima.  Na faatonuina loa o ia e leoleo ina ia agai atu i le ofisa a leoleo i Tafuna pe a mae’a ona togafiti lona lima, mo le faia o sana faamatalaga tusitusia.

O lo o ta’ua foi foi i faamaumauga a leoleo e faapea, i le taimi atoa sa fa’atalanoaina ai e leoleo ia Luani ma Sunia, sa molimauina e leoleo le uiga ese o la taga na fa’aalia.

Sa ta’ua e le tina ma uso a Sunia i a la molimau tusia, na mafua ona misa Sunia ma Luani ona o fualaau faasaina ma e le o se taimi muamua foi lea ua o la molimauina ai le tupu o faalavelave i le va o le to’alua lea.

Sa lokaina uma Luani ma Sunia ona o lenei faalavelave ma molia ai i la’ua i le Faatupu Vevesi i totonu o aiga, lea e mafai ona faafalepuipui ai se tasi i le o’o atu i le sefululima (15) aso, po o se sala tupe e i le va o le $150 ma le $300; po o faasalaga uma e lua.

O lo o ua molia foi Sunia i le Faao’olima i lona tulaga e tolu, o se solitulafono e mafai ona faafalepuipui ai se tasi i le o’o atu i le sefululima (15) aso, po o se sala tupe e i le va o le $150 ma le $300; po o fa’asalaga uma e lua.

E ta’i $300 le tupe faatulagaina e mafai ona tatala ai Sunia ma Luani, e faatalitali ai a la faamasinoga.

I seisi mataupu e ese mai i le faalavelave lea ua molia ai Tereise; o le afiafi o le  aso 9 o Ianuari, 2024

TEREISE SUNIA

O le aoauli o le aso 9 o Ianuari, 2024 na fa’afeso’ota’i ai e le Ofisa Leoleo i Tafuna ia le iunite a leoleo e mataituina fualaau faasaina (Vice and Narcotics Unit) mo se fesoasoani ona o se tamaitai ua lokaina atu, ina ua masalomia lona solia o tulafono a le faamasinoga faaitumalo.  O le tamaitai lea o Tereise Sunia.

Sa molia o ia i lona umia o se vaega o fualaau faasaina, po o le Aisa, lea e mafai ona lokaina ai i le va o le lima (5) ma le sefulu (10) tausaga; po o se sala tupe e i le va o le $5,000 ma le $20,000; po o faasalaga uma e lua.

O le tupe faatulagaina e mafai ona tatalaina ai o ia i tua, e faatali ai lona faamasinoga, e $2,000.

Ina ua taunu’u le Iunite a le Vice & Narcotis i le ofisa leoleo i Tafuna, sa fa’ailoa atu le lokaina o Sunia i lona solia o aiaiga sa tu’uina mai e le ofisa o faamasinoga mo le tatalaina o ia i tua, ina ua maua e leoleo i totonu o sana tama’i ato, ia se paipa tioata o lo o iai totonu ia vaega o fualaau faasaina, o le Aisa. 

Na maua e leoleo nei mea i totonu o le ato a Sunia, ina o faatinoina a latou tiute mo le lokaina o lenei tamaitai.