Molia se alii lona faaoolima i lona uo teine

Pago Pago - AMERIKA SAMOA

I le aso Lulu Oketopa 5, 2022 lea sa tula’i ai le ali’i e 29 ona tausaga, Ezra Williams, i luma o le Fa’amasinoga Maualuga ma lana iloiloga i le moliaga o le fa’ao’olima i le tulaga lua.

Sa ia ioe ina fo’i ma sainia fo’i se maliliega o le faamaonia lea o moliaga ole faatupu ina e ia se manu’a i le tino o lana uo teine, e fa’aaogaina le ma’a e tu’iina ai ona foliga.

Ole mae’a ai ona faatauto lea ali’i i lea aso ma sa fesili fo’i le alii Faamasino ia Elvis P. Patea poo le a lana gaioiga sa faia, ae na tali le ua molia, “sa ou po ina le gutu a la’u uo teine, pau lava lena”.

Sa tali atu le susuga le faamasino ia Patea e faapea “ Lau susuga Williams o le isi lea vaega o le maliliega lea na sainia e oe, e ioe ina mau faamaonia ia.”

Fa’ailoa e le fa’amasinoga, o le mea moni a lea na lau mai e le malo e faapea sa ia sainia lea maliliega o le faamaonia lea o mau faamaonia ia sa molia ai o ia o le fa’ao’o lima lea i lana uo teine pei o le po lea o lona gutu ma le u’u ina ole ma’a ma tu’i ina ai ona foliga.

Peita’i sa toe tete’e ina e lea alii ia mau faamaonia, ma sa ia faapea mai e leai lava seisi mea matuia sa ia faaoo ina i lona uo teine, ae pau lava le mea, sa ia po lona gutu, pau lava lena.

Lea la na toe talosaga loa e le susuga le loia ia David Vargas pe mafai ona toe tuu mai nai aso se’i toe la o ai ma lea alii e toe talanoa poo le a sa’o lana tali e tuuina mai i le Faamasinoga.

Saunoa le alii fa’amasino ia Patea e faapea e toe tuu ina atu le 2 vaiaso e toe talanoa ai le ua molia ma lana loia e tusa ai o lana tete’e i le maliliega ua mae’a ona sainia ma le malo.

O le aso 18 o Oketopa lea ua faatulaga e toe valaau ai le mataupu a Williams i luma o le fa’amasinoga, ma o loo taofia pea o ia i le Toese i Tafuna i le taimi nei e faatali ai le aso e toe tula’i ai.