Molia se ali’i Leoleo i lona fa’ataga o se ali’i pagota e sola i tua

Ua molia nei e le malo se ali’i Leoleo i lona faataga lea o se ali’i pagota e sola i tua mai le toese e aunoa ma se fa’atanaga fa’aletulafono.

O le vaiaso na te’a nei na tula’i ai i luma o le Fa’amasinoga Fa’aitumalo le susuga i le ali’i Leoleo ia Saito Pesaeli mo lana ulua’i iloiloga. O le ali’i Loia Fautua lagolago ia Ryan Anderson na tula’i mo ia, ae o le tama’ita’i Loia Sili lagolago ia Laura Garvey na tula’i mo le itu a le malo.

Ua molia nei Pesaeli i le moliaga o lona fa’ataga lea o se pagota e sola i tua mai le toese, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

E $5,000 le vaega tupe lea ua fa’atulaga e le afioga i le alii Fa’amasino ia Elvis P. Patea e totogi ona fa’atoa mafai lea ona tatala Pesaeli i tua mai le toese i Tafuna.

Afai ae mafai ona tatala o ia i tua, ua poloaina o ia ina ia tausisi i tulafono a le malo, e le tatau ona ia taumafai e tuua le atunuu, ma ia tuuina atu fo’i lona tusi folau e taofi e le loia a le malo. E le mafai ona ia taumafai e faafesoota’i molimau a le malo i soo se auala, afai latou te feiloa’i ma i latou i se nofoaga, o lona tiute o le tula’i ma alu ese mai ai.

Na teena e le afioga i le ali’i Fa’amasino ia Patea le talosaga e faaitiitia ai le tupe e taofia ai Pesaeli. Na taua e lana loia ia Anderson e fa’apea, o Pesaeli o se tagata e galue malosi mo le tausiga o lona aiga, e le o ia o se tagata e ono masalomia lona sola ese ma le atunu’u.

Peita’i na tete’e i ai le loia a le malo ma ia finau i le fa’amasinoga ina ia faatumauina pea le tupe ua mae’a ona fa’atulaga e tatala ai le ua molia i tua. E talitonu le malo, o le tupe ua mae’a ona fa’atulaga, e talafeagai ma le solitulafono ua tu’uaia ai le ua molia.

I le mae’a ai ona faafofoga o le Fa’amasinoga i fa’afinauga a itu e lua, na teena ai loa e Patea le talosaga a le itu tete’e, ma faatumau pea le tupe e tatala ai le ua molia i le $5,000.

O le vaiaso nei lea ua fa’atulaga e faia ai le ulua’i iloiloga a Pesaeli i luma o le Fa’amasinoga, e iloilo ai mau a le malo pe lava ma totoe e lagolago ai le latou tagi ua faaulu fa’asaga i le ua molia.

TAGI A LE MALO

O le po o le aso 21 o Aokuso o le tausaga nei, na logoina ai e le Ta’ita’i Uati vaega o Leoleo Suesue, e fa’ailoa i ai le ali’i pagota ia Manu Lefatia ua sola ese mai le Toese le Tumau sa taofia ai o ia i le nofoaga autu o le Ofisa o Leoleo i Fagatogo.

Na taua e le Ta’ita’i Uati mai le Ofisa i Fagatogo e fa’apea, sa ia maua se telefoni ma se tasi o tagatanu’u i le po o le aso lava lea, e fa’atatau ia Lefatia o lo o vaaia le fealua’i solo i ni isi o nofoaga faitele.

Ina ua mae’a ona maua e le Ta’ita’i Uati lea telefoni, na aga’i loa i tua i le nofoaga o lo o taofia ai Lefatia e siaki poo i ai o ia. Ina ua ia taunu’u atu i totonu o le potu o lo o taofia ai Lefatia, sa ia faamaonia ai loa, e le o i ai Lefatia i totonu o le potu e tatau ona loka ai o ia.

O le taimi lea na ia logoina ai loa Leoleo e to’atolu o lo o latou galulue fa’atasi i lea po, e aofia ai le ali’i Leoleo ua molia ia Pesaeli, atoa ai ma isi Leoleo e to’atolu ina ia aga’i atu i totonu o le Ofisa Autu i Fagatogo mo le talanoaina o se mataupu taua.

Ina ua taunu’u Leoleo ia e to’atolu, sa logo loa i ai e le Ta’ita’i Uati le mataupu e fa’atatau ia Lefatia, lea ua faamaonia lona sola ese mai totonu o le nofoaga sa loka ai o ia.

O le taimi lava lea e pei ona taua e le malo i le latou tagi, na fa’afuase’i ai loa ona fa’atoese le ali’i Leoleo ua molia ia Pesaeli i le Ta’ita’i Uati ma ia faailoa i ai, o ia (Pesaeli) na fa’atagaina Lefatia e alu i tua ma le toese.

Na taua e Pesaeli i le Ta’ita’i Uati e fa’apea, ua tele taimi na talosaga atu ai Lefatia ia te ia, mo se avanoa se’i alu ai i tua e asi lona atali’i o lo o ma’i. O lona alofa tele ia Lefatia, na mafua ai loa ona ia fa’atagaina o ia e alu i tua, ae ia lava le itula e tasi e alu ese ai ona toe fo’i atu lea i totonu.

Ina ua fesiligia e Leoleo Suesue ia Pesaeli e uiga i lenei mataupu, sa ia faamaonia ai lona fa’ataga o Lefatia e tuua le nofoaga o lo o taofia ai i Fagatogo, ae alu atu i lona aiga e vaai lona atali’i o lo o ma’i.

Na taua atili e Pesaeli e fa’apea, ua uma lelei ona ia fa’atonuina Lefatia, ua lava le itula e tasi e alu ai i tua.

O le mae’a ai ona ta’utino o Pesaeli i le Ta’ita’i Uati e fa’atatau i lona fa’atagaina o Lefatia e alu i tua, na ia tago ai loa i lana telefoni ma vili le telefoni a Lefatia, ma faatonu ina ia toe vave fo’i mai loa i totonu, o lea ua iloa uma e Leoleo lona sola ese mai le toese.

TAGI FA’ASAGA IA MANU LEFATIA

O le vaiaso lava fo’i na te’a nei na tula’i ai Manu Lefatia i luma o le Fa’amasinoga Fa’aitumalo. Ua molia o ia e le malo i le moliaga mamafa o lona sola ese lea mai le toese, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, pe fa’asala fo’i i fa’asalaga uma ia e lua.

Ina ua mae’a ona fesiligia e Leoleo Suesue ia Pesaeli e uiga i lenei mataupu, na latou fesiligia ai loa ma Lefatia e tusa ai o tu’uaiga i lona sola ese lea mai le toese na taofia ai o ia.

Na taua e Lefatia i Leoleo Suesue e fa’apea, ua tele aso o talosaga i le ali’i Leoleo ia Pesaeli mo se avanoa e fa’ataga ai o ia ona alu i tua e asi lona atali’i sa ma’i.

I le po o le aso 21 o Aokuso na te’a nei, na fa’ataga ai loa e Pesaeli o ia e alu i tua e asi lona atali’i, ona toe fo’i atu ai lea i totonu mo le umi e tasi le itula.

Na taua e Lefatia e fa’apea, a o i ai i lona fale i le po lea, na fa’afuase’i ona vili atu Pesaeli ma fai atu ia te ia e toe vave atu loa i totonu, o lea ua iloa uma e Leoleo lona sola ese mai le toese.

Na taua e Lefatia e fa’apea, ina ua toe fo’i ane i le potu o lo o taofia ai o ia, sa ia vaaia ai ni Leoleo se to’alua e aofia ai ma Pesaeli, o lo o tutu i luma o le potu o loo loka ai o ia, e vaavaai le taimi e toe fo’i ane ai i totonu.

ISI SOLAAGA E 2 FA’ASAGA IA LEFATIA

E le fa’atolu ai loea ona tu’uaia Lefatia i lona sola i tua mai le toese a o taofia ai o ia. I le masina o Aokuso o le tausaga na te’a nei, na tula’i mai ai se fa’alavelave ina ua sola i tua Lefatia ma ia fana se ali’i i Leone ma manu’a tigaina ai.

I lea fa’alavelave, e le gata o lo o molia ai Lefatia i lona sola i tua, ae o lo o molia ai fo’i se ali’i Leoleo sa Ta’ita’i Uati i le Toese i Tafuna i le po na tula’i mai ai lenei fa’alavelave, i lona taumafai lea e ufiufi ma faanana le sola i tua a Lefatia.

O le masina o Fepuari o le tausaga nei, na aveese mai ai Lefatia mai le toese i Tafuna, ae auina mai ma taofia i se potu faapitoa i le nofoaga o lo o i ai le Ofisa Autu o Leoleo i Fagatogo.

O le masina o Mati na tula’i mai ai le isi mataupu e pei ona tu’uaia ai fo’i Lefatia i le sola i tua mai le falepuipui, ina ua fa’ataga e se ali’i Leoleo o ia e sola i tua. O lo o molia fa’atasi Lefatia i le mataupu lona lua lea, faatasi ai ma le ali’i Leoleo ia Tuluiga Richard Salanoa.