Molia se alii ina ua maua ai e le leoleo ni fualaau faasina

Pago Pago - AMERIKA SAMOA

O le aso 16 o Oketopa na lokaina ai le susuga ia Gafa Fanene ona o se tusi saisai mai i le faamasinoga ma na ta’ua e le leoleo a le faamasinoga, le mauaina ai i lea alii ia pepa mata’eta’e sa afifi i se pepa solo, na iai se pauta pa’epa’e.

O se taimi mulimuli ane, na lokaina ai Fanene ma molia i lona umia o se vaega o Fualaau Faasina (Aisa), o se vaega o solitulafono mamafa, e mafai ona nofosala ai i le va o le lima ma le 20 tausaga, po o se sala tupe e i le va o le $5,000 ma le $20,000; po o faasalaga uma e lua.

E $5,000 se vaegatupe na faatulagaina e tatalaina ai le ua molia, e faatalitali ai oona faamasinoga.

E tusa ai ma faamaumauga a le malo, o le po o Oketopa 16 na aami atu ai sui o le vaega leoleo e mataituina vaega o fualaau faasaina, i le fale faamasino o Faamasinoga Faaleitumalo, i Fagatogo, e le leoleo o le fale faamasino.

Ma na fa’ailoa ifo iai e le leoleo a le fale faamasino, le lokaina mai o Fanene mai i se laumua o taavale la’upasese, ona o se tusi saisai mai i le faamasinoga.

Ae ina ua su’esu’eina la’ei ma meatotino a le ua molia, na maua ai se paipa mata’eta’e, o lo’o ta’ai i se pepa solo lima ma na maua ai se pauta pa’epa’e. 

Sa aveina loa e vaega a leoleo e mataituina vaega o fualaau faasaina, mea totino ia sa maua ia Fanene ma faia ai a latou su’esu’ega, ma na mafai ona fa’amaonia ai o se vaega o fualaau faasaina (Aisa) lea na maua.