Molia se alii ina ua ai’u i le leai o se meaai na totoe mai i le toanai i le aso Sa

Pago Pago - AMERIKA SAMOA

O lo’o ta’ua i faamaumauga a le malo e faapea, o le aoauli o le aso 22 o Setema, na valaau atu ai se tamaitai i le Ofisa a Leoleo mo se fesoasoani, ona o le faatupu vevesi o sona tausoga, le susuga ia Fidelis Taumalua lea ua molia i le tulafono.

Sa ta’ua e le tamaitai le palauvale solo o Taumalua, e le gata ia te ia, ae o lona tina ma le latou aiga atoa.

Ina ua taunu’u leoleo i le nofoaga na tupu ai le faalavelave, sa fa’asino ifo iai e le tamaitai lea na valaau mai i le Ofisa a leoleo, ia le potu o lo’o iai ia le ua molia.

Sa faatalanoaina foi e leoleo ia lea tamaitai ma na ia ta’ua e faapea, na tu’ua atu le latou lotu i lea aoauli ma faia le latou toanai.  Ae peitai, sa to’atama’i le ua molia, ona e alu atu ua leai se meaai o totoe ma amata ai ona ia palauvale leotele.  

Ina ua fesili atu le tamaitai i le ua molia po o le a le mea e pisa ai, ae taumafai le ua molia, e tu’i le tamaitai.  Ae na lelei le ‘alo a le tamaitai, ma savali ese mai ai.

Na ta’ua foi e le tamaitai le fefefe o le latou aiga, ona sa le gata ina tatu’i e le ua molia ia le faitoto’a ma faaleagaina ai, ae sa ia tata’eina ni ipu i totonu o se kapeneta.  Ma sa ia alu atu foi i totonu o le potu a lona ‘Aunt’ ma su’esu’eina le mafuaaga ua leai ai se meaai e tu’u atu mo ia.

Sa faamatala e le tamaitai e faapea, e le o se mea fou lea i lenei alii, le faatupu vevesi i totonu o le latou aiga.

Na fa’atalanoaina foi e leoleo ia le uo tamaitai a le ua molia ma sa ia faamatalaina i leoleo e faapea, sa taumafai foi le ua molia e ta o ia i se salu lima.  Ma na faamaonia lea faamatalaga e le tina ma le ‘aunty’ a Taumalua (le ua molia).

Ua molia nei ia Taumalua i moliaga o le Faatupu vevesi i totonu o aiga ma le Fa’ao’olima i le tulaga tolu, (sauaga i totonu o aiga), o se vaega ‘C’ o soligatulafono mama, e mafai ona nofosala ai i le falepuipu, i le tai 15 aso, i le faitauga e tasi.  

Po o se faasalaga tupe e ta’i $300 i le moliaga; po o faasalaga uma e lua.

E $1,000 le vaegatupe faatulagaina e mafai ai ona tatalaina le ua molia, e faatalitali ai lona faamasinoga.