Molia se alii i lona osofaia o le fale a se ulugalii matutua

Pago Pago - AMERIKA SAMOA

O le vaveao o le aso 18 o Aukuso, 2024, e pei ona ta’ua i faamaumauga a le malo, na fa’afeso’ota’i ai e se tina matua ia le Ofisa a Leoleo i Tafuna, ma lipotia ai se tagata na taumafai e osofa’i lo la fale ma lona to’alua.  Na ta’ua e lenei tina matua, o le suafa o le tagata sa taumafai e osofaia lo la fale, o ‘Pulali’ (po o Paia Fono).

Na agai atu leoleo i le fale o le tama ma le tina matua ma sa faamatalaina iai e le tina matua, o le fa’alua ai lea ona alu atu le ua molia i lo la fale ma tilotilo atu i totonu o le faamalama.

Sa ta’ua e faapea, o le vaveao o le aso 18 o Aukuso, na sasaeina ai e le ua molia, ia le ‘screen’ o le faamalama a le tama ma le tina matua, ma oso i totonu o le fale.  Ona savali atu lea o le ua molia ma tatala lo la potu ma tilotilo atu i totonu o le potu, ae iloa mai ai le ua molia, e le tama matua ma valaau mai i le ua molia.  Ae ole taimi lea, na tamo’e ai le ua molia, agai i le faitoto’a i tua o le fale ma alu ese atu ai.

Na faapea loa ona fa’afeso’otai e le tina matua ia le ofisa a leoleo ma ta’uina i leoleo le suafa o le ua molia, o se tagata o le latou aiga, ma e le o se taimi muamua lea ua ia faia ai se tulaga faapea.

Ae sa faamatalaina e le tama matua i leoleo, na fa’ate’ia mai o ia mai i sana malologa sa faia, ina ua matala atu le faitoto’a o le potu, ma sa manino lava lona iloa mai o le ua molia, o tilotilo atu ia te ia, ona o le la sa ola le moli o le potu.  Sa ta’ua e le tama matua, na ‘e’e mai i le ua molia, ae na tamo’e ese o ia.

Sa faapea ona agai atu leoleo ma le tina matua, e faasino le fale o le ua molia, e pe a ma le lona tolu o fale e va ai ma le fale a le tina ma le tama matua.

Ina ua taunu’u leoleo i le fale o le ua molia, sa fesiligia se tamaitai na tau iai, po o fea o iai le ua molia, lea na faasino ifo iai e le tamaitai le alii o lo’o moe i luma o le potu malolo.

Na o atu leoleo ma fafagu ia le ua molia ma su’esu’eina o ia e tusa ai ma le faalavelave na tupu, ae na tali le ua molia, o ia sa moe, e na te le o iloa se mea na tupu.

Na fesiligia le ua molia, e leoleo, po o le a le taimi na taunu’u ai i le fale.  Sa tali le ua molia, na taunu’u i le 7 i le po.  Ae peitai, na oso mai le tamaitai lea sa iai, ma faapea mai, o lo’o pepelo le ua molia, ona sa iai i latou i le fale i le taimi lea, ae e le’i iai le ua molia.

Na faapea ona faailoa atu e leoleo i le ua molia, o le a latou o atu i le fale o le tina ma le tama matua, e faamaonia, po o ia lea na alu atu i lo la fale i le po.

A’o faatalanoaina e leoleo ia le ua molia, sa lagona e leoleo le malosi o le manogi pia i le ua molia.

Ina ua taunu’u leoleo ma le ua molia, i le fale o le tama ma le tina matua, i lea vaveao, sa fa’amaonia e le loomatua ma le toeaina, o le alii lea na osofaia lo la fale.  Ae peitai, sa fa’aauau pea ona tete’e le ua molia, i tu’uaiga a le loomatua ma le toeaina.

Na faapea loa ona aveina e leoleo ia le ua molia, i le ofisa a leoleo, mo le fa’aauauina o a latou suesuega.

Sa toe faamanatu iai e leoleo, i le ua molia, o lo’o iai ni molimau e mafai ona faamaonia lona osofa’ia o le fale a le loomatua ma le toeaina.

O se taimi mulimuli ane, sa faapea loa ona ioeina e le ua molia, ia lona sasaeina o le ‘screen’ o le faamalama i le fale a le loomatu ma le toeaina, ave’ese ni fa’amalama se fa, ma oso i totonu o le fale. 

Na fa’amaonia foi e le ua molia lona savalivali solo i totonu o le fale, ae i lona tatalaina o le potu sa ia va’ai atu ai, o lo’o tilotilo mai le toeaina ia te ia.  Ma ia sola ‘ese ai loa, ina ua ‘e’e mai le toeaina ia te ia.

Ina ua fesiligia le ua molia e leoleo, pe aisea na alu ai i le fale a le ulugalii matutua, ma o le umi na tau mafaufau ai le tali a le ua molia, na toe fesiligia ai o ia e leoleo, po o ia o se tu paipa.  Lea na tali ai le ua molia, ioe.

O moliaga ua faia e faasaga i le ua molia, e aofia ai;

Faitauga 1:  Faomea i lona tulaga e lua - o se vaega ‘C’ o solitulafono mamafa, e mafai ona nofosala i le falepuipui, i le le silia ma le fitu tausaga, po o se sala tupe e $5,000; po o faasalaga uma e lua.

Faitauga 2:  Solivale o fanua e aunoa ma se faatagana - o se vaega ‘B’ o solitulafono mama, e mafai ona nofosala ai i le ono masina, po o se sala tupe e $500 po o faasalaga uma e lua.

E $5,000 se vaegatupe sa faatulagaina e mafai ona tatalaina ai le ua molia mai i le falepuipui, e faatali ai lona faamasinoga.