Molia se alii i lona faia o uiga mataga i se tamaitai talavou

Pago Pago - AMERIKA SAMOA

Ua taofia nei i le Toese i Tafuna se ali’i e 45 tausaga le matua, ona o tu’uaiga i lona faia lea o amioga mataga i se tamaitai e 16 tausaga le matua. O le uso matua o le tamaitai na aafia na ripotia lenei mataupu i le Ofisa o Leoleo i Tafuna, ma mafua ai loa ona faia suesuega a Leoleo faasaga i lenei mataupu. 

E le i mafai ona maua e Leoleo le alii ua molia i le taimi na mana’omia ai se fesoasoani a Leoleo, ae na faatoa maua i le tuana’i ai o masina e 2 talu ona sola sola solo o ia ma Leoleo, ina ua taofi e Leoleo se ta’avale i le solitulafono i luga o le alatele ae maua ane ai, o le ave ta’avale o le ta’avale na taofi, o le alii lea o loo mana’omia i lenei mataupu.

O le masina na te’a nei na tula’i ai le susuga a Raymond Taulia i luma o le fa’amasinoga faaitumalo ma faatulaga ai loa e le Fa’amasinoga le tupe e $20,000 e tatala ai o ia i tua.

O moliga faasaga ia Taulia e aofia le umia faasolitulafono o vaega o le laau faasaina o le mariuana, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, pe faasala foi i faasalaga uma ia e 2; atoa ai ma le moliga e tasi o lona tagofia o itutinosa o se tamaitai e laititi i lalo o le tulafono, o le vaega D lea o solitulafono mamafa; faatasi ai ma moliga mama e 2 o le faaoolima i le tulaga tolu atoa ai ma lona faia o gaioiga e lamatia ai le saogalemu o fanau laiti.

E ui i le tulaga matuia o le tagi ua faia faasaga i le alii ua molia, ae na finau lana loia fauna i le Fa’amasinoga mo se avanoa e faaitiitia ai le tupe e tatala ai le ua molia i le $5,000, ina ia mafai ai ona tatala o ia i tua e tausi lona aiga ma fa’aauau pea ona galue.

Na finau le loia a le ua molia e faapea, e ui i le tagi ma faamatalaga ua faila faasaga ia Taulia, e ao lava ona manino le mamalu o le Faamasinoga, o le tagi ua faila e le malo ma faamatalaga uma o loo i ai, ua na o se tagi lava e le i faamaonia.

Na tete’e malosi le Loia a le malo i le faafinauga a le itu tete’e, ma talosaga ai loa i le Fa’amasinoga ina ia faatumau le aofa’i o le tupe ua mae’a ona faatulaga e tatala ai le ua molia i tua. E le gata i lea, na finau fo’i le itu a le malo ina ia poloaina le ua molia e alu ese mai le fale ma le nofoaga o loo nofo ai, (lea e tuaoi ma le fale e nonofo ai le tamaitai na aafia ma lona aiga), a ia saili se isi nofoaga e nofo ma faamautu ai i le taimi nei a o faagasolo taualumaga o lana mataupu.

O le vaiaso fou lea ua faatulaga e toe tula’i ai Taulia i luma o le Fa’amasinoga Faaitumalo mo lana ulua’i iloilioga faapitoa.

TAGI A LE MALO 

O lenei mataupu na tofu atu i le Ofisa o Leoleo i Tafuna, ina ua talosagaina e se tamaitai e 25 tausaga le fesoasoani a Leoleo, ona o se alii sa ia faia ni uiga mataga i lona uso laititi e 16 tausaga le matua. O le alii na faia uiga mataga i le tamaitai talavou e pei ona taua e le molimau i Leoleo, e nofo i le fale e tuaoi ma le latou fale.

Na faailoa atili fo’i e le molimau lea i Leoleo e faapea, o le alii o loo masalomia i nei uiga mataga, o lo o tu’uaia fo’i i lona tulei atoa ai ma le faatau atu o fualaau faasaina i tagata lautele e aofia ai tagata e nonofo i le pitonu’u o loo latou nonofo ai.

Na aga’i atu Leoleo na maua le avanoa e feiloa’i ai i le molimau na valaau atu, o ia lea o se tamaitai e 25 tausaga le matua, faapea ai ma lona uso laititi na aafia e 16 tausaga le matua. O le mae’a ai ona feiloa’i atu o Leoleo Suesue i le tamaitai na aafia ma lona uso matua i lo latou fale, na malilie ai loa itu e 2 latou te aga’i atu i le Ofisa o Leoleo i Tafuna mo le faatalatalanoaina atili o lenei mataupu. 

Na taua e le tamaitai na aafia e faapea, e le o se taimi muumua lenei ua taumafai ai Ray (Raymond Taulia) e faia ni uiga mataga ia te ia. O Ray latou te tuaoi, ma ua pei lava fo’i o ia o se totino o le latou aiga. O nisi o taimi latou te fai’aiga i le latou fale i le afiafi ma Ray, a le o lena fo’i, o Toona’i o le aso Sa poo lotu afiafi fo’i, o taimi ia e mafuta atu ai Ray i lo latou aiga, ma ua pei ai lava Ray o se totino o le aiga.

Na amata mai lava i le tausaga na te’a nei ao 15 tausaga o le tamaitai na aafia, na amata mai ai lava iina ona faia e Ray uiga mataga ia te ia, peita’i, na te le i ta’uina lava i se tasi o lona aiga poo ona matua fo’i, ona o lona musu e save’u le filemu aemaise ai o le mafutaga ua mafana a Ray ma ona matua aemaise ai lo latou aiga atoa.

Na toe manatua e le tamaitai na aafia se tasi o faalavelave na tula’i mai i le isi po ua galo ia te ia le aso ma le masina o le tausaga na te’a nei, na faateia ai o ia ao moe i luga o lona moega ina ua ia faalogoina se tagata ua mamafa atu i ona luga. 

I le taimi muamua, sa ia manatu o sana miti o loo fai, peita’i ina ua ala i luga na ia iloa ai Ray o loo taoto atu i lona fatafata. Na nofo i luga le tamaitai na aafia ma fai ia Ray e alu i fafo ma le potu, peita’i na sisi’o Ray ma fai i ai, e malie lona loto i le mea ua tupu. O ia (Ray) na alu atu e su’e le uaea fafaga ma’a o lana telefoni ae te’i ina ua lavea lona vae ma pau atu ai i ona luga.

Na taua e le tamaitai na aafia i Leoleo lona faalogoina o le malosi o le manogi ‘ava malosi i totonu o lona potu i le taimi na i ai Ray.

O le isi faalavelave na tula’i mai i le masina o Aperila o le tausaga nei ina ua faateia o ia ao moe i totonu o lona potu i le aoauli o le aso Sa, ae faafuase’i ona matala atu le faitoto’a ma ia vaaia ai Ray o loo tu atu i le faitoto’a o lona potu. Sa ia fesili ia Ray poo fea e alu ai ae na tali le ua molia na alu atu ia te ia la te talanoa.

Na tu le tamaitai na aafia ma savali i fafo o lona potu (o le taimi lea e na o le tamaitai lava na aafia le fale, o loo malaga uma lo latou aiga i le lotu), ae na faateia o ia ina ua tago atu Ray ua taofi lona lima ma toe toso o ia i totonu o le potu. Na taumafai le tamaitai na aafia e toso ese lona lima peita’i o le malosi o Ray na mafai ona toe toso e Ray le tamaitai i totonu o le potu ma ia tagofia ai ona itutinosa.

O le faalavelave lea na tula’i mai i le masina na te’a nei, na alia’e mai ao moe le tamaitai na aafia i totonu o lona potu, ae faafuase’i ona tago atu se tagata i lona fatafata ma lona itutinosa. Na ala le tamaitai i luga ma ia vaaia ai Ray o loo saofa’i i ona tafa tafa ao tago atu ona lima i lona fatafata. 

Na ala i luga le tamaitai ma faatonu le ua molia e alu ese ma le potu. 

Na fesiligia e Leoleo le uso matua o le tamaitai na aafia ma ia faamatala ai le vaaiga na ia molimauina i le taeao na tula’i mai ai le faalavelave. Na taua e le uso matua o le tamaitai na aafia i Leoleo e faapea, o ia na alu e fa’aaoga le Fale Taele (tulou) i le vaveao, ae o lona toe fo’i mai laa toe savali i lona potu, na faateia ai lana vaai ina ua ia iloa atu le faitoto’a o le potu a lona uso laititi o loo matala.

Na ia masalosalo pe i ai se mea o tupu ua mafua ai ona matala le faitoto’a o le potu a lona uso laititi, o lea na ia savali atu ai loa e vaai pe i ai se mafua’aga ua matala ai le faitoto’a. 

Na faateia le tamaitai matua ina ua ia vaaia Ray o lo o soofa’i i tafa tafa o le moega a lona uso.  O le taimi lava na iloa mai ai e Ray o ia o loo tu atu i le faitoto’a, na vave ai loa ona faliu Ray i le isi itu ma faataga tago e susue i luga le tapuni o le pusa o loo i tafa tafa o le moega, e foliga mai o loo taumafai e su’e se mea.

E leai se tala na gagana ai le uso matua o le tamaitai na aafia, ae sa na o lona tu lava ma tilo tilo atu ia Ray. Na tula’i Ray ma savali i fafo ma le potu ma alu ese loa ma le fale.

Na fafagu e le tamaitai matua lona uso laititi ma iloa ai o loo moe o ia. Ae ina ua mae’a le talanoaga a le tamaitai matua ma lona uso laitiiti, na manatu ai loa le tamaitai matua e sili pe a faafesoota’i Leoleo ma logo i ai le faafitauli o loo tula’i mai, atonu e mafai ai ona taofi amioga le manuia a Ray o loo faia i lona uso laititi.

E lei maua e Leoleo le ua molia i lona fale i le aso na sosoo ai. Ae o le masina na te’a nei na pu’e faapagota ai loa o ia ina ua taofi e Leoleo lana ta’avale i le soona alu saoasaoa i luga o le alatele, ae maua ai ma se pepa iila laititi o loo i ai lau mamago o le mariuana. 

Ina ua fesiligia e Leoleo le ua molia e uiga i lenei mataupu, sa ia teena ai tu’uaiga e faapea sa ia faia uiga mataga i le tamaitai na aafia. Sa ia faailoa i Leoleo, o le aiga o le tamaitai e pei ona fesiligia, ua avea lava ma ona aiga moni.

O le pepa iila sa i ai lau mariuana na maua ia te ia, na ta’utino le ua molia, o le mea totino lava lea a ia.