Molia se ali’i i lona faia o uiga mataga i se tama’ita’i 16 tausaga

Ua taofia nei e Leoleo i le Toese i Tafuna se ali’i e 46 tausaga le matua, ona o tu’uaiga i lona faia lea o uiga mataga faafeusuaiga i se tama’ita’i e 16 tausaga le matua e aiga lelei i ai, e ala i lona tagofia o itutinosa o lea tama’ita’i faapea ai ma lona taumafai e faamalosi o ia mo feusuaiga.

O le mae’a ai ona tu’ufaatasia e Leoleo o fa’amatalaga e uiga i lenei mataupu, na latou aga’i atu ai loa ma pu’e faapagota mai le ua molia mai lona fale, i lalo o se poloaiga mai le Fa’amasinoga.

Talu ai puipuiga i le ono mafai lea ona silafia e le to’atele le tama’ita’i o lo o aafia i lenei mataupu, o le a le mafai ai ona faalauiloa le suafa o le ali’i ua molia nei e le malo.

O le 2 vaiaso talu ai na tula’i ai le ua molia i luma o le Fa’amasinoga Faaitumalo mo lana ulua’i iloiloga.

E 5 moliaga mamafa ua molia ai e le malo le ua molia, o ia moliaga e aofia ai le moliaga e tasi o le faia o uiga faasotoma i se tama’ita’i; tasi le moliaga o le taumafai e faamalosi le faia o feusuaiga; ma moliaga e 3 o le tagofia lea o itutinosa o se tama’ita’i e lei faaipoipo i ai.

E $50,000 le vaega tupe lea ua fa’atulaga e le Fa’amasinoga Faaitumalo e totogi, ona faatoa mafai lea ona tatala le ua molia i tua. O le aoauli o le aso Faraile o le vaiaso nei lea ua fa’atulaga e faia ai le uluai iloiloga faapitoa o lenei mataupu.

TAGI A LE MALO

E pei ona taua e le malo i le latou tagi, o le grandmother a le tama’ita’i o lo o aafia i lenei mataupu na ia logoina Leoleo e tusa ai o se fa’alavelave na aafia ai le afafine o lana tama.

Ina ua maua le avanoa o le tama’ita’i na a’afia e asiasi ai i le fale o lona grandmother mo aso malolo o le kerisimasi ma le tausaga fou na mavae atu nei, na ia manatu ai loa e fa’ailoa i lona grandmother mea uma sa tutupu i le va o ia ma lona uncle ua molia nei.

O le faamatalaga uma a le tama’ita’i na aafia na faailoa i lona grandmother, na faailoa uma e lona grandmother i Leoleo, ina ua fesiligia ma faatalatalanoaina o ia e Leoleo e uiga i lenei faalavelave.

Na taua e le tama’ita’i na aafia i lona grandmother e fa’apea, o le tele lava o aso Toona’i, e masani ai ona telefoni atu le ua molia ia te ia, e alu atu i lona fale se’i fesoasoani i lona afafine e 12 tausaga le matua i le faiga o le tagamea, aemaise lava pe afai e alu le to’alua a le ua molia i le taulaga mo faatauaga.

O le tele lava la o taimi e mae’a ai ona faatino e le tama’ita’i na aafia galuega fesoasoani i le fale o lona uncle lea ua molia nei, na te vilia ai le telefoni a lona grandmother e alu atu e piki mai o ia i luma o se Faleoloa i Tafuna.

Na taua e le grandmother i Leoleo e faapea, i le aso 5 o Tesema na te’a nei, na telefoni atu ai le ua molia ia te ia, pe mafai ona piki o ia i luma o le Faleoloa i Tafuna. Na taunuu le grandmother i luma o le Faleoloa ma ia vaaia ai le o lo o aafia o loo tutu ai ma ona foliga faanoanoa.

Na fesili le grandmother i le tama’ita’i na a’afia pe i ai se mea ua tupu, ae na faailoa i ai e le tama’ita’i na aafia uiga mataga na fai atu e lona uncle ia te ia.

Na taua e le tama’ita’i na aafia i lona grandmother e faapea, o le masina o Oketopa na te’a nei na amata ai ona faaali atu e lona uncle uiga mataga nei ia te ia. A o pisi ai i le faiga o feau i le fale o lona uncle, na faateia o ia ina ua tago atu lona uncle i lona fatafata ma faasolo ifo ai lava lona lima i lona itutinosa.

Na una’i ese e le tama’ita’i na aafia lona uncle peita’i sa tago atu lona uncle ma toso mai lona lima ma taumafai e faapa’i atu i lona itutinosa.

Na savali ese le ua molia ma aga’i atu i totonu o lona potu, ma vaaia ai e le tama’ita’i na aafia le savali mai o le ua molia ma lana masini laptop ma taatia i luga o le laulau, ona ia valaau atu lea i le tama’ita’i na aafia e alu atu e matamata le la ata. Na iloa atu e le tama’ita’i na aafia, o le ata o feusuaiga o lo o ki e le ua molia i lana laptop.

O le isi faalavelave e pei ona taua e le tama’ita’i na aafia na tula’i mai i le masina o Novema, ina ua tago atu le ua molia i lona itutinosa, sosoo ai ma lona taumafai e faamalosi o ia la te feusua’i, peita’i sa ia tete’e malosi atu i ai ma fai i ai, e le tatau ona ia faia nei uiga mataga ia te ia.

Ina ua teena e le tama’ita’i na aafia le ua molia ma ana gaioiga mataga, sa tatala ese ai loa e le ua molia lona ie ae faaali lona totoga sa i le tama’ita’i na aafia. Sa ia fai fo’i i le tama’ita’i na aafia e tatala ese ona lavalava, peita’i sa musu le tama’itai na aafia ma savali ese ma le fale ma aga’i atu loa i le alatele.

O le isi faalavelave e pei ona taua e le tama’ita’i na aafia na tula’i mai i le faaiuga o le masina o Novema na te’a nei ao inu fagupia vailima a le ua molia, sa ia taumafai ai fo’i e faamalosi le tama’ita’i na aafia la te feusua’i, peita’i na tete’e i ai le na aafia ma alu i le atoa i fafo ma le fale, ma aga’i atu ai loa i le aualatele e faatali ai le taunuu ane o lona grandmother lea ua mae’a ona ia viliina.

Na taua e le tama’ita’i na aafia i Leoleo e fa’apea, e mafua ona alu i le fale o lona uncle, pe a telefoni atu ia te ia e alu atu e fesoasoani i lona afafine i feau o le latou aiga, peita’i o le tele lava o taimi o lo o tutupu ai nei faalavelave, e tutupu i le taimi e le o i ai le to’alua a lona uncle i le fale.

Na faamatala fo’i e le tama’ita’i na aafia mea uma sa tutupu i le va o ia ma lona uncle i le tuafafine o lona uncle, peita’i na talosaga i ai le tuafafine o lona uncle, e taoto atu le mataupu se’i talanoa i lona tuagane e tusa ai o nei tu’uaiga uma.

Na aga’i atu Leoleo ma pu’e faapagota mai le ua molia ma lona fale faigaluega, ma auina atu loa i le Ofisa o Leoleo mo suesuega e uiga i lenei faalavelave. Ina ua fesiligia e Leoleo le ua molia, sa ia ioeina ai lona faia o uiga mataga i lona niece i le tele o taimi e alu atu ai o ia i lo latou fale e fesoasoani i lona afafine i le faiga o feau.

Na ia faatoese i Leoleo ma faailoa i ai e faapea, ua mafua nei mea uma ona o le agaga leaga o loo nofo i totonu o lona mafaufau, lea na te faaosoosoina o ia na te faia uiga nei e le tusa ma le tulafono.