Molia se ali’i i lona faia o uiga mataga i se tama’ita’i 13 tausaga

Pago Pago, AMERIKA SAMOA
 

O le vaiaso na te’a nei na pu’e faapagota ai e Leoleo se ali’i e 42 tausaga le matua, ma tula'i ai i luma o le Faamasinoga Faaitumalo, ona o tu’uaiga i lona faia o uiga mataga i le uso la'ititi o lona to'alua, e 13 tausaga le matua.

O le a le faalauiloaina e le Samoa News le igoa o le ali’i ua molia ona o puipuiga i le tamaitai ua aafia i lenei mataupu.

E tolu (3)  moliaga ua tu’uaia ai e le malo le ali’i ua molia, e aofia ai le moliaga o le faia o amioga faasotoma, lea e mafai ona fa’asala ai se tasi i le Toese i lva o le 5 ma le 15 tausaga, faapea ai ma moliaga e lua (2) o le tagofia o itutinosa o se tama’ita’i i le tulaga muamua, lea e mafai ona faasala ai se tasi i le Toese mo le umi e oo atu i le 5 tausaga, pe fa’asala i le salatupe e oo atu i l e $5,000, po o faasalaga uma ia e llua.

E $20,000 le vaega tupe lea ua faatulaga e le Faamasinoga Faaitumalo e totogi ona mafai lea ona tatalaina le ua molia i tua.

Afai ae tatala o ia i tua, e le mafai ona ia toe taumafai i soo se auala e faafesootai le tamaitai ua aafia p oo lona aiga fo’i, a ia avea o ia ma tagatanu’u lelei e tausisi i tulafono uma a le malo.

TAGI A LE MALO

O lenei mataupu na tofu atu i le Ofisa o Leoleo i Tafuna ina ua aga’i atu i ai se ulugali’i ma faauluina sa la tagi e faasaga i le to'alua o se tasi o a la alo tamaitai (son-in-law).

A o faagasolo suesuega a Leoleo Suesue e uiga i lenei mataupu, na latou maua ai, le taumafai fo'i o le ua molia e faia ni uiga mataga i leisi fo'i uso o lona to'alua, ae ua malaga atu nei lenei tamaitai ma aumau i atunu'u i fafo.

Sa ta'ua e le ulugali’i i Leoleo Suesue le faigata ia i la'ua ona faagalo le faalavelave ua aafia ai le la tama teine, o le mafua’aga lena o le la naunau ina ia faatino ala o le tulafono faasaga i lenei mataupu.

Sa faatalatalanoa e Leoleo Su'esu'e ia le teineitiiti ua aafia e uiga i lenei mataupu. Ma sa faamatalaina e lenei teineititi, le tele o taimi sa faia ai e le ua molia uiga mataga ia te ia, o nisi o taimi e faateia ai o ia i le faafuase’i ona tago atu lenei alii i lona tino e aofia ai lona fatafata ma lona itutinosa. Na ta'ua e le tama’ita’i ua aafia, i Leoleo Su’esu’e, lona le fiafia ma le ita i amioga a le ua molia.

Sa faamatala e lenei tamaitai i Leoleo Su'esu'e se faalavelave na tula'i mai, a o moe i lona moega i se tasi o po, na faateia o ia ina ua ia faalogoina se tagata o lo o tago atu i ona ogavae, ma faasolo atu ai lava i lona itutinosa. Na vave lona nofo i luga ma tau atu lana vaai i le ua molia o lo o saofa’i mai i autafa o lona moega. Sa ia ee i luga ma fai i ai e alu i fafo ma le potu. Na taua fo’i e lenei tama’ita’i lona faalogoina o le malosi o le manogi ‘ava malosi

O seisi faalavelave na faamatala e lenei tama'ita'i, na tula’i mai i le leva o le po pe tusa o le itula e 12:00 i le vaveao, ao la momoe lenei  ma sana uo teine i totonu o le potu malolo.  Sa ia ta'ua le faafuase’i ona ulufale faamalosi atu le ua molia i totonu o le potu malolo ma faia ni gaioiga mataga ia te ia, e aofia ai ma le tauanauina o ia e la te o i lona potu e la te faiaiga ai.

Na taua e le tama’ita’i ua aafia e faapea, sa loka le faitoto’a o le potu malolo sa la momoe ai ma lana uo, peita’i sa ia lagonaina le taimi na taumafai ai le ua molia e tatala faamalosi le faitoto’a ma ia fa'aaogaina ai loa se tama’i naifi e vane ai le tulimanu o le puipui e va ai le umukuka ma le potu malolo, ma sao ai loa i totonu i le vaega o lo o momoe ai le ua aafia ma lana uo.

Sa faamatalaina fo'i e lenei tamaitai i Leoleo Suesu'e, o se tasi o po na tupu ai se tasi o faalavelave a'o moe o ia i totonu o lona potu, na ia valaau ai loa i lona Tina ma ia faailoa i ai le mea ua tupu. Na alu atu le Tina o le tama’ita’i na aafia ma fai i le alii ua molia i e alu i fafo ma le potu.

Na su'esu'eina foi e Leoleo le uo a le tamaitai ua aafia e tusa ai o lenei mataupu ma sa faamaonia e lenei uo faamatalaga uma e uiga i lenei mataupu, i le ulufale faamalosi o le ua molia i totonu o le potu malolo ma tauanau le tama'ita'i ua a'afia, la te o i le potu a le ua molia atoa ai ma le tauvala'au mai a lenei ali'i mai i fafo o le fale, i le vaega na inu ai ana fagupia, ma tauanau le tamaitai ua aafia e alu atu i fafo la te talanoa ae na musu lenei tamaitai.

Na maua e Leoleo le avanoa e fesiligia ai le alii ua molia e tusa ai o lenei mataupu ma ia ioeina ai lona ulufale i totonu o le potu sa momoe ai le tamaitai ua aafia ma lana uo e su'e lona atalii e 14 tausaga le matua. Na ioe le alii ua molia, sa ia tago i le tino o le tamaitai ua aafia peita’i o lana molimau, na mafua ona tago i le tino, ina ia faigofie ai ona ala mai i luga le tamaitai e fesili i ai po o fea lona atali’i.

Na taua foi e le alii ua molia i Leoleo e faapea, o le tele o taimi i le latou mafutaga, e ese ai lava uiga e fa’aali atu e le tamaitai lea ia te ia, e foliga mai e mana’o ia te ia, o le mafua’aga lea o lona taumafai e tulituli o ia.

Na ta'ua e matua o le tamaitai ua aafia e faapea, e le o se taimi muamua lenei ua alia’e mai ai uiga mataga a le ua molia faasaga i le la fanau tamaitai e aofia ai ma le tamaitai ua  aumau i atunu'u i fafo. O le tele fo’i o taimi e inu pia ai le ua molia i fafo o le fale, la te matua lokaina ai le faitoto’a o le fale ina ia mautinoa e le sao atu le ua molia i totonu o le potu o lo o momoe ai le la fanau teine.