Molia se ali’i i lona faia o uiga mataga i lona afafine fai e 11 tausaga

E 45 tausaga o se ali’i na pu’e fa’apagota e Leoleo i le vaiaso na te’a nei, ona o tu’uaiga i lona faia o uiga mataga i lona afafine fai e 11 tausaga le matua.

O le a le mafai e le Samoa News ona fa’alauiloa le suafa o le ua molia, ona o puipuiga i le ono faigofie ai ona iloa le teineititi o loo a’afia i lenei mataupu.

O le aso Lulu o le vaiaso na te’a nei na tula’i ai le ua molia i luma o le Fa’amasinoga Fa’aitumalo mo lana ulua’i iloiloga. O le tama’ita’i loia fautua ia Anna Wells na tula’i mo ia, ae o le tama’ita’i loia sili lagolago ia Christy Dunn na tula’i mo le itu a le malo i lenei mataupu.

E 6 moliaga mamafa o loo molia ai lenei ali’i, o ia moliaga e aofia ai le moliaga o le faia o uiga faasotoma, lea e mafai ona faasala ai se tasi i le umi e amata atu i le 5 tausaga ae le silia i le 15 tausaga i le toese; o le moliaga o le taumafai e fa’amalosi se teineititi e laititi i lalo o le tulafono, ma moliaga e 3 o le tagofia lea o itutinosa o se teineititi. O loo tu’uaia fo’i o ia i le moliaga mama e tasi o lona faia lea o gaioiga e lamatia ai le saogalemu o fanau laiti.

E $75,000 lea ua fa’atulaga e le afioga i le ali’i Fa’amasino ia Fiti Sunia e totogi ona fa’ataoa mafai lea ona tatala le ua molia i tua.

Afai ae mafai ona tatala o ia i tua, ua poloaina o ia e le Fa’amasinoga ina ia auai i soo se taimi e valaau ai lana mataupu, aua nei taumafai e tuua le atunuu, ma ia tuuina atu lona tusi folau e taofi e le loia a le malo. Ua poloaina fo’i o ia e aua ne’i toe taumafai e fa’afesoota’i le teineitiiti o loo a’afia i lenei mataupu, poo molimau fo’i a le malo.

O le mataupu lenei na tofu atu i le Ofisa o Leoleo i le aso 25 o Oketopa 2018, ina ua logo a se tasi o aoga a le malo le Ofisa o Leoleo mo se fesoasoani, ona o a’afiaga sa maitauina i se teineititi e 11 tausaga le matua o le aoga. Na taua e le Failautusi a le aoga i Leoleo lona vaaia o le teineitiiti na a’afia i le fale o le isi aiga tuaoi, ae ina ua ia fesili i le teineitiiti pe aisea ua nofo ai i le fale o le aiga tuaoi, ae na tali le teineitiiti, na sola ese ma le latou aiga ona ua fefe i lona Tama (stepfather).

Na fa’amatala e le teineitiiti i le Failautusi a le aoga le fa’aaoga e lona Tama o le uaea e sasa ai o ia, o le mafua’aga lena na alu ese ai loa ma le latou aiga ae nofo i le uso o lona Tina.

O suiga na vaaia i le teineititi e aofia ai foliga le fiafia, foliga fa’anoanoa, atoa ai ma le avea o lenei fa’alavelave o se mea mamafa i lona mafaufau, o le mafua’aga lea na ia logoina ai loa le Ofisa o Leoleo mo se fesoasoani.

Na maua le avanoa e fesiligia ai e Leoleo le teineitiiti na a’afia e uiga i lenei mataupu, ma ia tuuina atu ai sana fa’amatalaga tusitusia i Leoleo e tusa ai o mea uma sa tutupu i le va o ia ma lona Tama.

O le fa’alavelave muamua lea e pei ona taua e le teineitiiti i Leoleo na tula’i mai i le masina o Setema o le tausaga nei, ina ua alu atu lona Tama ma tago atu i lona itutinosa. Sa ia fefe peita’i sa fa’afefe e lona Tama o ia ma fai atu, o le taimi lava na te ta’uina ai i se isi, na te sasaina ai o ia i le uaea.

O le fa’alavelave lona lua na tula’i mai i le isi po ina ua mae’a ona matamata ata leaga a lona Tama. Na alu atu ai loa ma tago atu ia te ia ma taumafai e fa’amalosi o ia. Sa ia tagi ma fai atu i lona Tama e soia e tiga.

Na ta’u e le teineitiiti i lona Tina uiga sa fa’aali atu e lona Tama ia te ia, peita’i sa tali atu lona Tina, e ta’atia atu se’i uma ona ia talanoa lea i lona Tama. O le fefe tele o le teineitiiti i nei uiga uma na mafua ai loa ona sola ese.

Na tusia e le teineitiiti i sana api mea uma sa tutupu ia te ia, e le gata i le sauaina o ia e lona Tama ae o uiga mataga fo’i ma le le taupulea sa faia ia te ia.

Ina ua fesiligia e Leoleo le Tina o le teineitiiti na a’afia, sa ia fa’amaonia ai i Leoleo le talanoa atu o lana tama ia te ia e fa’atatau i uiga le taupulea sa faia e le ua molia, ae sa ia fai i lana tama e taoto atu se’i uma ona ia talanoa lea i le ua molia.

Na ioeina e le ua molia i Leoleo lona sasa o le teineitiiti i le uaea, peita’i sa ia teena lona faia o ni uiga mataga ia te ia.