Molia se ali’i i lona faia o ni uiga mataga i se tamaitai e 16 tausaga

Pago Pago, AMERIKA SAMOA

O le masina na te’a nei na pu’e faapagota ai e Leoleo se ali’i e 42 tausaga le matua mai Kokoland ona o tu’uaiga i lona faia o ni uiga mataga i se tamaitai e 16 tausaga le matua. 

O lenei mataupu na tofu atu i le Ofisa o Leoleo i Tafuna, ina ua faila e le aunty o le tamaitai na aafia se tagi faasaga i le ali’i ua molia, ona o se faalavelave na tula’i mai i le 5 masina talu ai.

O le masina na te’a nei na tula’i ai le ali’i ua molia i luma o le Fa’amasinoga Faaitumalo mo lana ulua’i iloiloga. 

E 6 moliaga ua faila e le malo fa’asaga i le ali’i ua molia, e aofia ai moliaga e 2 o le faia o amioga faasotoma; 2 moliaga o le tagofia o itutinosa o se tamaitai i le tulaga muamua. o moliaga mamafa uma ia,  e mafai ona faasala ai se tasi i le Toese mai le va o le 5 ma le 15 tausaga, faapea ai ma moliaga e 2 o le faaoolima i le tulaga tolu,  o se solitulafono mama lea e mafai ona faasala ai se tasi i le Toese mo le umi e le silia i le tasi le tausaga, pe sala tupe e le silia i le $1,000, po o le faasala foi i faasalaga uma e 2.

E $35,000 le tupe ua fa’atulaga e tatala ai i tua le ua molia.

Afai ae tatala o ia i tua, ua poloaina o ia e le Fa’amasinoga ina ia auai i soo se taimi e valaau ai lana mataupu, fesootai vava lalata ma lana loia, ma aua nei taumafai e sola ese mai le atunu’u a o fa’agasolo ai taualumaga o lana mataupu. 

Ua poloaina o ia e le Fa’amasinoga e saili se isi nofoaga e faamautu ai, e le mafai ona toe nofo I le nofoaga na tula’i mai ai le fa’alavelave, e le mafai fo’i ona ia toe taumafai e faafesoota’i le tamaitai na aafia poo lona aiga i soo se auala, ma ia avea o ia o se tagatanu’u e tausisi i tulafono uma a le malo.

Na teena e le Faamasinoga le talosaga a le itu tete’e mo se avanoa e faaitiitia ai le tupe e tatala ai le ua molia i le $10,000. Na ta’ua e le Loia a le ua molia e faapea, o le tagi ua faila faasaga i le ali’i ua molia, ua na o ni tu’uaiga e le o mafai ona fa’amaonia. O le ali’i ua molia, ua silia i le 15 tausaga talu ona aumau i Amerika Samoa, o se taimi muamua lenei ua a’afia ai o ia i se solitulafono.

Na faatu’I’ese le malo i le fa’afinauga a le itu tete’e.  Na taua e le Loia a le malo e fa’apea, e ui o le ulua’i taimi lea ua tu’uaia ai le ua molia i se solitulafono, peita’i o moliaga faasaga ia te ia e matua mamafa ma matuia. Ae le gata I lea, na taga’I le loia a le malo I le puipuiga o le saogalemu o fanau laiti e ono aafia I sauaga mataga. Na lagolagoina e le Faamasinoga le finau a le malo.

O se tasi o itu sa fesiligia e le Faamasinoga, o kilia a le ua molia e faatatau i ni solitulafono na aafia ai o ia mai le atunuu na malaga mai ai. Na faamanino e le sui o le Ofisa o Femalagaaiga i luma o le Fa’amasinoga, o le ua molia, o se tagatanu’u o Samoa, o lo o ia umia le ituaiga ID o le “SP” (Special Provision), lona uiga, o lo o sponsor o ia e se Pisinisi (Kamupani) ua mae’a ona lesitalaina i totonu o Amerika Samoa.

O le ali’i ua molia, e galue o se ave pasi ma ua silia i le 10 tausaga o galue o ia i lea galuega.

Na ta’ua e le Faamasinoga e faapea, o se tasi lenei o itu sa tatau ona silasila toto’a i ai le Komiti Faafoe a le Ofisa o Femalagaaiga i le taimi na latou iloiloina ai tusi talosaga a le ua molia, mo se avanoa e aumau ma galue ai i Amerika Samoa, ina ia mautinoa latou te fesiligia ripoti mai le Ofisa o Leoleo mo ni solitulafono na aafia muamua ai o ia i tausaga ua tuana’i.

TAGI A LE MALO

O lenei mataupu na tofu atu i le Ofisa o Leoleo i Tafuna i le masina na te’a nei, ina ua manatu se tina e faila se tagi faasaga I le ali’I ua molia, ona o amioga mataga sa ia faia I se alo teine a lona uso, I le masina o Me o le tausaga nei.

Sa ta’ua e le aiga o le tama’ita’I ua a’afia, e so’o fale lo latou fale ma le fale sa nofo ai le ua molia.  Ma o lenei ali’I, o le tausoga o le tina o le tamaitai ua a’afia.

Na ta’ua e le tamaitai ua aafia, i Leoleo e faapea, e fa’a lua ona faia e lenei ali’I ni uiga mataga ia te ia.  O le taimi muamua, o le taeao o le aso 22 o Me, 2020, a’o ia pisi e auli ona ofu a’oga ma ofu faigaluega a le ua molia, ae faafuasei ona ulufale atu le ua molia I totonu o le fale, ina ua na iloa, ua taape uma tagata matutua o le latou aiga, e faigaluega.

Na ta’ua e le tamaitai ua aafia i Leoleo e faapea, na te’i ina ua fusi mai e le ua molia o ia mai ona tua ma taumafai e kisi atu ia te ia.   Ma sa ia taumafai e una’i ese le ua molia peita’i sa matua u’u mau e lenei ali’i ona lima ma amata ona ia tagofia vaega o lona tino e aofia ai ma ona itutinosa.

Sa ta’ua e lenei tamaitai, lona fai atu I lenei alii,  “uncle, soia e te faavalevalea ma au amioga o lo o fai ma alu i fafo ma le fale.”  Ae sa atili ai ona fa’aauau gaioiga a lenei alii.

O le aso lava lea na faamatala ai e le tamaitai ua aafia le mea sa tupu i lona uso matua, ma telefoni ai loa lona uso matua i lo la Tina o lo o i Samoa ma ta’u i ai le mea ua tupu. O le fautuaga a lo la Tina, a toe fai le amio a le ua molia, e sili atu loa pe a tapena lana ato ma toe fo’i atu i Samoa la te nonofo ai, ina ne’i te’i ua sili atu le matuia o se isi mea e tula’i mai i le lumana’i.

E 5 aso talu ona tuana’i le faalavelave muamua ae tupu le faalavelave lona lua, e pei ona faamatala e le tama’ita’I ua a’afia I leoleo e faapea, o le aso na tula’i mai ai le faalavelave lona lua, sa le I a’oga, ae na nofo I le fale ona ua lagona le niniva o lona ulu atoa ai ma le tiga o lona tino. Sa ia iloa le taimi na faaola ai le pasi a le ua molia i le vaveao ma alu e la’u pasese.

Na fa’amatala e lenei tamaitai, i se taimi o le 9:00 i le taeao, a o taoto i luga o lona moega, na faateia o ia ina ua taoto atu le ua molia i ona luga ma tago atu i ona itutinosa. Sa ia taumafai e una’i ese le ua molia peita’i sa faigata ona e malosi tele o ia.  Na faamalosi ona aveese e le ua molia ona lavalava ma taumafai e faamalosi le tamaitai, la te faiaiga.

Na avea le tafiti solo o le tamaitai ua aafia ma auala na le mafai ai e le ua molia ona faamalosi o ia. A o la tauivi pea, na ta’ua e le tamaitai ua aafia i Leoleo le fai atu o le alii ua molia ia te ia, o ia ua mana’o la te mafuta ona e leai si tamaitai e fia faauo ia te ia, ae na fai i ai le tamaitai ua aafia, e soia le faavalevalea ma ana faamatalaga. O le taimi lea na taofi ai loa e le ua molia ana gaioiga sa faia i le tamaitai ua aafia.

Na faatoese le ua molia i le tamaitai ma ia tago ua tu’u i ai le $20 e faatau ai sana mea’ai i le aoga. Sa talosaga fo’i i ai e aua ne’i talanoa i se isi e uiga i le mea sa tupu.

Ina ua fesiligia e Leoleo le ua molia, sa ia ioeina ai lona alu i totonu o le potu a le tamaitai ua aafia, la te talanoa. Sa ia ta’ua i Leoleo e faapea, o le tamaitai ua aafia na fai atu ia te ia e alu atu i totonu o le potu la te talanoa. Sa ia taua fo’i le malie o le tamaitai ua aafia la te talanoa ma lona sogi atu ia te ia.

O lo’o teena e le ua molia, tu’uaiga faasaga ia te ia, e faapea, sa ia taumafai e faamalosi lenei tamaitai, la te fai’aiga.