Molia se ali’i i lona fa’aaoga o se agaese e fasi ai lona to’alua

O le vaiaso na te’a nei na pu’e fa’apagota ai e Leoleo mai le Vaega a le Vice & Narcotics a le Ofisa o Leoleo se ali’i ua lata i le masina o tau sailia, ona o tu’uaiga i lona fa’aaoga lea o se agaese e fasi ai si ona to’alua.

E le o se taimi muamua lea ua tula’i ai lenei ali’i i luma o le Fa’amasinoga ona o solitulafono ua faia fa’asaga ia te ia.

(Talu ai ona o lle puipuia mai le faigofie lea ona silafia e le lautele le sa a’afia i lenei mataupu, ua le mafai ai e le Samoa News ona fa’alauiloa le igoa o le o loo molia)

O le vaiaso na te’a nei na tula’i ai le ua molia i luma o le Fa’amasinoga Fa’aitumalo, ma fa’atulaga ai loa e le afioga i le Tama’ita’i Fa’amasino ia Gwen Tauiliili-Langkilde le tupe e $10,000 e totogi, ona fa’atoa mafai lea ona tatala o ia i tua.

O lo o molia o ia i le moliaga mamafa e tasi o le fa’ao’olima i le tulaga lua, lea e mafai ona fa’asala ai o ia i le toese mo le umi e le silia i le 5 tausaga, pe faasala foi i le salatupe e le silia i le $5,000, pe afai ae fa’amaonia e le fa’amasinoga lana solitulafono.

Na finau le loia a le ua molia ia Ryan Anderson i le fa’amasinoga mo se avanoa e fa’aitiitia ai i le $5,000 le tupe e tatala ai le ua molia i tua, nai lo le $10,000 e pei ona fa’atulaga e le Fa’amasinoga.

Na taua atili e Anderson e fa’apea, o le $5,000 e pei ona ia finauina, o le tupe maualuga lea o loo faatulaga mai e le tulafono e mafai ona faasala ai le ua molia pe afai ae faamaonia lana solitulafono, ma ua ia manatu ai fo’i, o le tupe talafeagai fo’i lea e tatau ona totogi e tatala ai o ia i tua.

Na tete’e le loia a le malo i le talosaga a le itu tete’e. Na taua e le tama’ita’i loia sili lagolago ia Christy Dunn e fa’apea, o le tupe lea ua mae’a ona fa’atulaga e le fa’amasinoga, ua lava ma talafeagai e tatala ai le ua molia i tua.

Saunoa Dunn e fa’apea, o le o loo molia o loo tu’uaia i lona fa’aaoga o se agaese e fa’aoo ai manu’a i lona to’alua. O se gaioiga e sili ona matuia, ma ua fesiligia ai le saogalemu o lona to’alua ma lana fanau pe afai ae toe tatala o ia i tua. Na finau malosi Dunn i le fa’amasinoga ina ia fa’atumau pea le tupe e totogi ona fa’atoa tatala lea o le ua molia i tua.

Na talia e le afioga i le Tama’ita’i Fa’amasino le talosaga a le malo, ma ia fa’atumauina ai loa le tupe e tatala ai le ua molia i le aofaiga e pei ona fa’atulaga e le Fa’amasinoga. Saunoa Tauiliili-Langkilde e fa’apea, afai ae mafai ona tatala le ua molia i tua, ua faasa ona ia toe taumafai e faafesoota’i lona to’alua ma lana fanau, ua faasa fo’i ona toe alu i le fale o loo nonofo ai i laua, a ia saili se isi nofoaga e nofo ai ao faagasolo ai taualumaga o lana fa’amasinoga.

Ua faasa fo’i ona ia toe umia ni a’upega mata’utia poo nisi lava a’upega e ono tula’i mai ai lagona fefe ma le le mautonu o lona to’alua poo nisi fo’i tagata o le atunu’u lautele.

O le mataupu lenei na tofu atu i le Ofisa o Leoleo i Fagatogo i le masina na te’a nei, ina ua logo e aiga tuaoi ma matua o le fafine ia Leoleo mo se fesoasoani, i le mae’a ai lea ona latou fa’alogoina o le e e mai o le fafine mai totonu o le fale i lona fia maua o se fesoasoani, ina ua fasi e le ua molia.

Na taua e ni isi o molimau sa vaai i le fa’alavelave le fa’aaoga lea e le ua molia o le pito mafolafola o le agaese e sasa ai lona to’alua. O se tasi o ta na lavea ai le papatua o le fafine i le pito maai o le agaese ma mafua ai ona tula’i mai se manu’a i lona tino. Sa leaga fo’i isi vaega o le tino ina ua fa’aaoga e le ua molia ona lima e fasi ai o ia.

O le tausaga e 2013 na fa’asala ai e le fa’amasinoga maualuga le ua molia ina ia taofia i le falepuipui i Tafuna mo le 20 masina, o se tasi lea o tuutuuga o lana nofovaavaaia e 5 tausaga, ina ua fa’amaonia le moliaga mamafa o le faaoolima i le tulaga lua sa tuuaia ai o ia e le malo.

Na faaaoga e le ua molia se nofoa e sasa ai le ulu mal e tino o le ali’i na a’afia i lenei mataupu, ma mafua ai ona manu’a tigaina lea ali’i.