Molia se ali’i i lona fa’aaoga o se agaese e faaoo ai manu’a i se isi tagata

O le vaiso na te’a nei na pu’e fa’apagota ai e Leoleo se ali’i e 42 tausaga le matua mai Tafuna, ona o tu’uaiga i lona fa’aaoga lea o se agaese e fa’aoo ai manu’a i se isi ali’i e aunoa ma se mafua’aga.

O le aso Tofi o le vaiaso na te’a nei na tula’i ai le susuga a Ioelu Tulaga Jr i luma o le Fa’amasinoga Faaitumalo mo lana ulua’i iloiloga. O le ali’i Loia Sili lagolago ia Jason Mtichell na tulai mo le malo, ae o le susuga i le alii Loia Fautua lagolago ia Bob Stuart na tula’i mo Tulaga Jr.

Ua molia Tulaga Jr i moliaga mamafa e 2 o le faaoolima i le tulaga 2 faapea ai ma le umia faasolitulafono o vaega o le pauta fa’asaina o le aisa; faapea ai ma moliaga mama e 2 o le faatupu vevesi i nofoaga faitele, faapea ai ma le fa’aaoga faasolitulafono o se aupega mata’utia.

Ua toe taofia nei Tulaga Jr i le toese i Tafuna e aunoa ma se tupe ua fa’atulaga e tatala ai o ia i tua.

E ui na talosaga lana loia fautua i le Fa’amasinoga mo se avanoa e fa’atulaga ai se tupe e tatala ai le ua molia i tua, peita’i e talitonu le Fa’amasinoga, e le tatau ona tatalaina i tua le ua molia, ona o le tulaga matuia o le gaoiga e pei ona tu’uaia ai o ia.

Na taua e le loia a Tulaga Jr ia Stuart i lana talosaga e fa’apea, e na o Tulaga Jr lava e faigaluega e tausi ai lona aiga, o ia fo’i o lo o maua mai ai le tupe e fesoasoani ai i le faatupeina o talavai a lona Tama matua.

E ui fo’i i le tagi a le malo fa’asaga i le ua molia, ae na taua e Stuart e fa’apea, e leai se isi na maliu poo se isi na manu’a tuga, se’i vagana ai lava nai manu’a laiti na aafia ai le tino o le ali’i na a’afia, e mafua mai ina ua fa’aaoga e Tulaga Jr le lau o le sapelu e sasa ai lona papatua.

Na matua tete’e malosi le loia a le malo i le talosaga. Na taua e Mitchell e fa’apea, o le gaioiga sa faia e le ua molia e matua sili lava ona matuia. O le itu e laki ai, e leai se isi na maliu i le agaese sa ia umia ma fa’aaoga e faatino ai le solitulafono.

Na lagolagoina e le Fa’amasinoga le faafinauga a le malo. O nisi o itu na silasila toto’a i ai le Fa’amasinoga, e le gata o le saogalemu o Tulaga Jr ae o le tausia fo’i o le saogalemu o tagata lautele ma le toe aafia i se isi gaioiga e sili atu ona matuia a le ua molia.

O le taeao nei, ua fa’atulaga e faia ai le ulua’i iloiloga o lenei mataupu.

TAGI A LE MALO

E pei ona taua e le malo i le latou tagi e fa’apea, o le afiafi po o le aso 25 o Setema na te’a nei, na faafesoota’i ai e se Tina le Ofisa o Leoleo i Tafuna mo se fesoasoani, e fa’atatau i se faalavelave na manu’a ai se isi ali’i i luma o le Faleoloa o le Jin’s Store, e mafua mai ina ua fa’aaoga e se isi ali’i se agaese e faaoo ai manu’a i le ali’i na a’afia.

Taunu’u leoleo i luma o le Faleoloa na tula’i mai ai le fa’alavelave, ma latou molimauina ai le tumutumu o tagata i luma o le faleoloa, faapea ai ma se ali’i o lo o manu’a ona foliga ma lona tino.

O le taimi fo’i lea o lo o galulue ai sui o le EMS i le togafitiina o le ali’i na manu’a, seia oo lava ina auina atu o ia i le Falema’i i Faga’alu mo togafitiga.

Na maua le avanoa e fesiligia ai e Leoleo le Tina na ia faafesoota’iina le Ofisa o Leoleo mo se fesoasoani, i ana fa’amatalaga e tusa ai o le fa’alavelave sa tula’i mai. Na taua e le Tina lona molimauina o le taimi na ta tu’i ai e le ua molia foliga o le ali’i na a’afia, atoa ai ma lona fa’aaoga o se agaese e sasa ai lona papatua.

Na taua e le molimau e fa’apea, o ia sa i totonu o le Faleoloa faatasi ai ma le ali’i na a’afia. Ina ua mae’a ona totogi le fa’atau a le ali’i na a’afia, sa ia agai mai i loa i fafo o le faleoloa, ae aga’i atu o ia ua totogi lana fa’atau.

E fetaui lona ulufafo mai i le Faleoloa, ae ona faalogoina loa tagata o loo feei solo ma tauvalaau, “Vaai se isi i lavea!” Sa ia faliu atu i le isi itu o le vaega e paka ai ta’avale i luma o le Faleoloa, ma ia iloa atu ai se ali’i o loo ia tatu’i foliga o le isi ali’i, ae o loo uu i lona lima se agaese.

Ina ua uma ona ta tu’i e le ali’i ua molia le tagata na manu’a ma palasi ai i lalo, sa ia vaaia loa le tago o le alii ua molia i le lau o le sapelu ma sasa ai le papatua o le ali’i na manu’a ao taatia o ia i luga o le sima.

Sa ia vaaia se ali’i na aga’i mai i le pito i tua o le faleoloa ma le fa’amoemoe e fia aga’i atu i totonu e fai lana faatau, ae na avea le faalavelave ma itu na taumafai ai loa le ali’i lenei e fesoasoani i le tagata ua manu’a. Na taua e le molimau i Leoleo e fa’apea, ina ua iloa atu e le ua molia le aga’i atu o le ali’i lea e fesoasoani, sa tu’u ai loa lona faaoolima i le ali’i ua manu’a ae ua ia savali mai e faafetaui le ali’i lea ua aga’i atu ia te ia.

Na sola ese le ali’i lea na tau aga’i atu e fesoasoani ina ua ia iloa atu le agaese o lo o uu mai i lima o le ali’ia u molia.

O le taimi lava fo’i lea na taunu’u atu ai loa ma ni ali’i se to’alua i luma o le Faleoloa, ma la faatonuina ai loa le ua molia e alu ese ma luma o le Faleoloa. Na vaaia le savali ese atu o le ua molia i le isi itu ma aga’i atu ai lava i lona fale, lea e le mamao mai le vaega o lo o i ai le nofoaga na tula’i mai ai le fa’alavelave.

Ina ua mae’a ona fesiligia e Leoleo ia molimau e uiga i lenei fa’alavelave, na latou aga’i atu ai loa i le fale a le ua molia ma le fa’amoemoe e pu’e faapagota mai o ia. Ina ua latou taunu’u i le fale, sa latou vaaia ai le ua molia o loo saofa’i mai i tafatafa o lona Tama.

Na umi se taimi o taumafai Leoleo e fa’atonu le ua molia e alu atu i fafo ma le fale se’i o latou talanoa. Mulimuli ane, na i’u ai loa ina fa’aaoga e Leoleo le malosi e pu’e faapagota ai le ua molia ma loka ai ona lima.

Ina ua fesiligia le ua molia i le mafua’aga o lona faia o lenei gaioiga, sa ia taua ai e fa’apea, o ia na alu i le Faleoloa e fa’atau, ae fa’afuase’i ai ona tula’i mai le fa’alavelave e pei ona ia faaoolima ai i le ali’i na manu’a. Sa ia taua fo’i e fa’apea, na te le iloa le mafua’aga na ala ai ona ia faatinoina lenei solitulafono.