Molia se alii i le umia o vaega o fualaau faasaina

Pago Pago - AMERIKA SAMOA

E tusa ai ma fa’amaumauga a le malo, na lokaina se alii e suafa ia Filisi Filisi, i le po o le aso 2 o Mati, 2024 ina ua taofia e leoleo lana taavale i luga o le alatele, i lona pasia o ni taavale i se vaega o le alatele e faasaina ona pasia ai taavale.

Ae i le fa’agasologa o su’esue’ga a leoleo, na maua ai ni vaega o fualaau faasaina, o Aisa ma Marijuana.

Sa tapaina e leoleo ia le laisene aveta’avale a Filisi, ae peitai, sa ia tali mai i leoleo, ua galo i le fale.  Na fa’ailoa atu loa e leoleo ia te ia, o le a ave o ia i le Ofisa o Leoleo i Fagatogo, ma o le a lokaina foi ma le taavale.

O le taunu’u o leoleo ma le ua molia i le Ofisa a Leoleo i Fagatogo, sa faailoa atu ai ia Filisi, o le a fa’amaumauina meatotino o lo’o i totonu o le taavale.

O iina na maua ai e leoleo i le itu o le nofoa a le pasese, ia se taga pepa i’ila (Ziploc) o lo’o iai se pauta i totonu faapea se ato lanu meamata (Army camouflage) i luga o le nofoa.

Na maua foi e leoleo i nofoa pito i tua, ia se paipa e masani ona fa’aaoga e ula ai vaega o fualaau faasaina, o le Aisa.  Ma na maua ai foi ma se ‘straw’ tipitipi o lo’o iai totonu le pauta.  Faapea ma nisi ‘straws’ tipitipi o iai le pauta, i lalo o le nofoa a le avetaavale.

Sa maua foi ma se vaegatupe e $260, i totonu o le taavale.  Na talosagaina e le ua molia pe mafai ona tu’uina le tupe i lona tausoga, ma na faapea ona tu’uina i se tasi o tagata o lona aiga, i lea lava po.

Na faapea loa ona logoina le kapeteni o leoleo, i meatotino na maua i totonu o le taavale.

I le taunu’u ifo o se leoleo faapea ma le alii kapeteni, sa tauaaoina atu loa tulaga uma na maua i totonu o le taavale, i le alii kapeteni ma ia aveina, ma faia ai suesuega, lea na fa’amaonia ai le pauta, o se vaega o fualaau faasaina, o le Aisa.

 Sa su’esu’eina foi ia le ato Ami ma taga pepa i’ila  lea sa iai laula’au lanu meamata faapea ma le paipa ula tapa’a mata’eta’e, lea e masani ona fa’aaoga e ula ai mariuana.  Na su’esu’eina laula’au lanu meamata ma fa’amaonia ai, o mariuana.

I le fa’atalanoaga e leoleo o Filisi sa ia fa’amaonia ai, o ana meatotino uma ia sa maua i totonu o le taavale.  Ma e taofia lana taavale, o lo’o aga’i atu e fa’atau atu.  Sa faamaonia foi  e le ua molia lona ula sikaleti mariuana ma le fa’aaogaina o le paipa e ula ai lana maliuana.

O moliaga ua faia fa’asaga i le ua molia, e aofia ai;

Faitauga 1:  Umia faasolitulafono o se vaega o fualaau faasaina ma le faamoemoega e faatau atu – o se solitulafono mamafa, e mafai ona nofosala ai i le falepuipui i le va o le lima (5) ma le luasefulu (20) tausaga po o se sala tupe e le silia ma le $20,000; po o faasalaga uma e lua.

Faitauga 2:  Umia faasolitulafono o se vaega o fualaau faasaina, o le Aisa – o se solitulafono mamafa, e mafai ona nofosala ai i le falepuipui, i le va o le lima (5) ma le luasefulu (20) tausaga, po o se sala tupe e le silia ma le $20,000; po o faasalaga uma e lua.

Faitauga 3:  Umia faasolitulafono o se vaega o fualaau faasaina (Mariuana) ma le faamoemoe e fa’atauina atu – o se solitulafono mamafa, e mafai ona nofosala ai i le falepuipui i le va o le lima (5) ma le luasefulu (20) tausaga po o se sala tupe e le silia ma le $20,000; po o faasalaga uma e lua.

Faitauga 4:  Umia faasolitulafono o se vaega o fualaau faasaina (Mariuana) – o se solitulafono mamafa, e mafai ona nofosala ai i le va o le lima (5) ma le luasefulu (20) tausaga po o se sala tupe e le silia ma le $20,000; po o faasalaga uma e lua.

E $20,000 le vaegatupe sa faatulagaina e tatalaina ai le ua molia, e faatalitali ai lona faamasinoga.