Molia se ali’i i le umia o fualaau fa’asaina ma le taumafai e talepe se fale o se aiga

Pago Pago - AMERIKA SAMOA

O le ave ta’avale o le taavale pikiapu lea na taofia e Leoleo i luga o le alatele i Tafuna i lona le usitaia o tulafono tau ta’avale afi, ua molia nei i lona umia faasolitulafono o vaega o fualaau fa’asaina o le aisa ma le mariuana. Ina ua fesiligia e Leoleo lenei ali’i, na maua ai i faamaumauga a le malo le tusi saisai na tuuina mai e le Fa’amasinoga i le tausaga na te’a nei e pu’e faapagota ai lenei ali’i, ona o tu’uaiga i lona taumafai lea e osofa’i ma talepe le fale o se aiga.

O le masina na te’a nei na tula’i ai le susuga a Apela Lavea i luma o le Fa’amasinoga mo lana ulua’i iloiloga. O le ali’i Loia Fautua lagolago ia Ryan Anderson na tula’i mo ia, ae o le tama’ita’i Loia Sili lagolago ia Kristine Soule’ na tula’i mo le malo. 

E 2 tagi eseese ua faila e le malo faasaga ia Lavea

I le tagi muamua, ua tu’uaia ai o ia i le moliaga e tasi o lona umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau faasaina o le mariuana; tasi le moliaga o le umia faasolitulafono o mariuana ma le fa’amoemoe e tulei ma faatau atu i isi tagata; tasi le moliaga o le tete’e atu i Leoleo a o taumafai e pu’e faapagota o ia; o vaega uma ia o solitulafono mamafa; faapea ai ma moliaga mama e 2 o lona umia faasolitulafono o ni pulufana faapea ai ma le moliaga o le ave ta’avale ‘ona, o le vaega A lea o solitulafono mama.

I le tagi lona 2 faasaga ia Lavea’i, ua molia ai o ia e le malo i le moliaga e tasi o le taumafai lea e osofa’i ma talepe se fale i le tulaga 2, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala i le salatupe e le silia i le $5,000, poo le faasala fo’i i faasalaga uma ia e 2.

E $15,000 le vaega tupe lea ua fa’atulaga e le Fa’amasinoga e tatala ai i tua le ua molia. 

Afai ae tatala o ia i tua, ua poloaina o ia ina ia auai i soo se taimi e valaau ai lana mataupu, ia fesoota’i vava lalata ma lana loia, e le mafai ona ia tuua le atunuu, ma ia avea o ia ma tagatanuu lelei e tausisi i tulafono a le malo i taimi uma. 

Ua poloaina fo’i e le Fa’amasinoga le ua molia ina ia aua ne’i ona toe taumafai e faafesoota’i molimau a le malo, faapea ai ma i latou na aafia i lana solitulafono.

TAGI A LE MALO

E pei ona taua e le malo i le latou tagi, o le mataupu faasaga ia Lavea na tofu atu i le Ofisa o Leoleo ina ua talosagaina e se alii mai Vaitogi le fesoasoani a Leoleo faasaga i lana ta’avale na aveese faagaoi mai e se tagata i lona fale. Na taua atili e lea tagata i Leoleo, e to’atasi lava le tagata na te masalomia i lenei gaioiga, o le tagata e igoa ia Apela Lavea, o ia o se ali’i Kamuta e masani ona alu atu i lona fale e fai ana galuega kamuta. 

Pe tusa o le itula e 3:43 i le vaveao o le aso 12 o Novema, 2021, na vaaia ai e Leoleo se taavale pikiapu Nissan lanu uliuli o loo aga’i atu i luga o le alatele i Tafuna i se saoasaoa uiga ese. Na maitauina e Leoleo le tutusa lelei o le ta’avale lea ma le ta’avale lea o loo masalomia na ave faagaoi.

Na taofi e Leoleo le pikiapu Nissan lanu uliuli ona o le alu saoasaoa i luga o le alatele, ae ina ua fesiligia e Leoleo le ave ta’avale, na iloa ai, o loo tagofia e ia le ‘ava malosi ma faafoe le ta’avale. E to’atolu isi tagata sa i ai faatasi ma le ave ta’avale i totonu o le ta’avale. O le ave ta’avale, o le susuga lea a Apela Lavea, le ua molia i lenei mataupu. O lana pasese e to’atolu e aofia ai ni alii matutua se to’alua ma se alii talavou e 17 tausaga le matua.

Na faailoa e Leoleo ia Lavea’i le mafua’aga ua taofi ai lana ta’avale, ona e tele mafua’aga eseese e tatau ona ia malamalama i ai. E le gata o le ta’avale lea o loo masalomia na aveese faagaioi mai i se fale i Vaitogi, ae sa maitauina fo’i le ova o maila na alu ai lana ta’avale mai maila faatulagaina i luga o le alatele.

Ina ua fesiligia Lavea mo lana laisene ave ta’avale, na tali le ua molia, o loo galo i le fale lona laisene ave ta’avale. E leai ma se pepa faamaonia na umia e Lavea i le taimi lea e ono faamaonia ai lona tagata, o le mafua’aga lea na fautuaina ai loa o ia e Leoleo, ina ia latou aga’i atu i le Ofisa o Leoleo i Tafuna mo nisi suesuega e faatatau i lana mataupu. Sa taofia fo’i e Leoleo ma le ta’avale na faafoe e Lavea. Sa avatu uma ai fo’i ma le pasese e to’atolu i le Ofisa o Leoleo mo suesuega.

A o le i auina atu i latou uma nei faatasi ai ma le ta’avale i le Ofisa o Leoleo mo suesuega atili, na muamua saili e Leoleo i latou nei e to’afa faapea ai ma le ta’avale mo ni fualaau faasaina poo ni aupega malolosi.

E leai ni mea na maua e Leoleo i ali’i e to’atolu sa i totonu o le ta’avale a Lavea’i. O le mae’a ai ona sailia o latou tino ma faia a latou faamatalaga, na tatala ai loa i latou e Leoleo e toe fo’i atu i o latou aiga.

Ae ina ua saili e Leoleo le tino o le ua molia, sa latou maua i ai se pepa iila o lo o i ai sikaleti mariuana e 7 ua uma ona taai. Na saili e Leoleo totonu o le ta’avale ma maua ai se ato faafafa lanu meamata i le nofoa pito i tua o le ta’avale. Na faailoa e le ua molia i Leoleo, o ia e ana le ato faafafa.

Na saili e Leoleo totonu o le ato ma maua ai se paipa tioata e faaaoga e ula ai le pauta o le aisa, o se straw ua uma ona tipi tulimanu o loo i ai vaega o le pauta o le aisa, o ni pepa iila e fa’aaoga e utu ai fualaau fa’asaina, o se pulu fana o le ituaiga o le .45, faapea ai ma ni afi penisini se 2 ma pepa taai e 2.

Ina ua fesiligia e Leoleo le ua molia poo ai e ana le ta’avale, na tali le ua molia, o le ta’avale a lona uncle o loo poloka i Hawaii ona o le taofia ai o malaga a va’alele mai le fa’ama’i o le COVID-19, peita’i ina ua faagasolo pea suesuega na manino ai, o le ta’avale tonu lava lea a se alii mai Vaitogi na gaoia mai i lona fale i le 2 aso talu ai.

Ina ua fesiligia e Leoleo le alii e ana le ta’avale, sa ia faamaonia ai ina ua taunuu atu i le Ofisa o Leoleo i Tafuna, o le ta’avale lea na faafoe e Lavea’i, o lana ta’avale lea. 

O le mae’a ai ona faatalatalanoa e Leoleo le alii e ana le ta’avale na gaoia e Lavea’i, na ia talosaga ai loa i Leoleo, e le mana’o e faila se tagi faasaga ia Lavea’i ona o lana ta’avale na ia gaoia. 

Na taua e se tasi o le pasese i Leoleo ina ua fesiligia o ia i le mafua’aga na maua ai i latou i totonu o le ta’avale, o latou na faatali se latou lifi i Nua ma Seetaga, ae sosolo atu loa ma le ta’avale pikiapu a Lavea ma latou ti’eti’e mai ai loa. Na taua atili e le molimau e fa’apea, latou te le i iloaina o loo i ai ni fualaau fa’asaina i totonu o le ta’avale.

Ina ua fesiligia e Leoleo le ua molia e uiga i lenei mataupu, na ia ioeina ai lona umia faasolitulafono o vaega o fualaau fa’asaina, atoa ai ma lona faafoeina o le ta’avale a o ia tagofia le ‘ava malosi. 

Ae ina ua fesiligia e faatatau i le tusi saisai lea na tuuina mai e le Fa’amasinoga i le tausaga na te’a nei, ona o tu’uaiga i lona taumafai lea e osofa’i ma talepe se fale i Kokoland, na matua teena ai e Leva’i lona aafia i lea mataupu.

O le tausaga e 2014 na ta’usala ai e le Fa’amasinoga Maualuga le susuga a Lavea i le solitulafono o le faaoolima ma le gaoi, ma faasala ai o ia e nofovaavaaia mo le 5 tausaga. O tuutuuga o lana nofovaavaaia e aofia ai lona tuli o masina e 20 i le Toese ma totogi le salatupe e $1,000.