Molia se alii i le umia o fualaau faasaina ma le sauaina o lona to’alua

Pago Pago - AMERIKA SAMOA

Ua molia nei e le malo i moliaga mamafa le ali’i na pu’e faapagota i lona faia o sauaga faasaga i lona to’alua, ina ua saili atu e Leoleo lona tino i le taimi na pu’e faapagota ai ae maua ai pepa iila o lo o tutumu i lau mamago o le mariuana.

Na musu le alii ua molia e talanoa i Leoleo e tusa ai o fualaau faasaina na maua ia te ia, ina ua fesiligia ma suesue o ia e Leoleo e uiga i lenei mataupu. 

O le mae’a ai ona o le 36 itula na taofia faapagota ai Faamatala Ulberg i le Toese i Tafuna, na tula’i ai loa o ia i luma o le Faamasinoga Faaitumalo i le masina na te’a nei.

Ua molia nei e le malo le ua molia i moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o solitulafono mamafa, e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua. 

O lo o tu’uaia fo’i o ia i le faaoolima i le tulaga tolu faapea ai ma le faatupu vevesi i totonu o lona aiga, o le vaega A lea o solitulafono mama, lea e mafai ona faasala ai se tasi i le toese mo le umi e oo atu i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e lua.

E $5,000 lea ua faatulaga e le Faamasinoga Faaitumalo e tatala ai le ua molia i tua. Na teena e le Faamasinoga le talosaga na faaulu e le alii Loia Fautua, mo se avanoa e faaitiitia ai le tupe e tatala ai le ua molia i le $2,000. 

Na taua e le alii Loia Fautua e fa’apea, o le ua molia e faalagolago i ai le tausiga o lona aiga, o le ulua’i taimi fo’i lenei ua aafia ai o ia i se solitulafono. Afai ae taofia pea le ua molia i le Toese, o le a i ai se aafiaga i le tausiga o lona aiga. Na tete’e malosi le loia a le malo i le talosaga a le itu tete’e. 

Na taua e le tama’ita’i a le malo e fa’apea, e matuia le tu’uaiga fou lea ua faia faasaga i le alii ua molia, i lona umia faasolitulafono lea o vaega o fualaau faasaina o le aisa. Sa ia talosaga i le Faamasinoga ina ia faatumau le tupe ua maea ona faatulaga e tatala ai i tua le ua molia, lea fo’i na talia e le Fa’amasinoga.

Afai ae tatala i tua le ua molia, ua fautuaina o ia e le Fa’amasinoga ina ia auai i soo se taimi e valaau ai lana mataupu, ma ia fesootai fo’i ma lana loia i soo se taimi. E le mafai ona ia taumafai e tuua le atunuu pe sola ese foi, sei vagana ua tuuina atu se poloaiga a le Faamasinoga. 

E le mafai ona ia taumafai e faafesootai molimau a le malo poo i latou o loo aafia i lenei mataupu, e aofia ai lona to’alua. A ia avea o ia ma tagatanuu e tausisi i tulafono a le malo.

Na fa’aalia e le Ofisa Faanofovaavaia le latou sauni e faila le latou talosaga i luma o le Fa’amasinoga e faaleaoga ai le nofovaavaaia a le ua molia, ona o lea ua sa poloaina o ia e aua nei ona toe solia se tulafono a o lea ua aafia 

TAGI A LE MALO

E pei ona taua e le malo i le latou tagi e fa’apea, o le aso 12 o Aokuso,  2020 na taunu’u ai i le Ofisa o Leoleo i Tafuna se telefoni mai se Tama i Leone, e talosagaina ai se fesoasoani ona o se faalavelave na tula’i mai i lona aiga, i le va o lona afafine ma lona to’alua.

E to’atele Leoleo na tali atu i le valaau ma maua ai le avanoa e feiloa’i ai ma le Tama na talosagaina se fesoasoani, ma amata loa suesuega e faatatau i le faalavelave e pei ona tula’i mai i le va o lona afafine ma lona to’alua. Na taua e le Tama i Leoleo lona lagonaina o lona afafine o loo ee ma alaga mai “fesoasoani faamolemole”, o le mafua’aga lea na ia logoina ai loa le Ofisa o Leoleo mo se fesoasoani.

A o le i aga’i atu Leoleo e fesiligia le Tina na aafia i lenei mataupu, na muamua latou aga’i atu i le fale ma taofia le ua molia i lalo o le latou vaavaaiga, ona o le puipuiga lava o le saogalemu.

A o le i auina atu le ua molia i le Ofisa o Leoleo i Tafuna mo suesuega, na muamua saili e Leoleo lona tino ia ia mautinoa na te le o tauaveina se a’upega e ono lamatia ai le saogalemu o Leoleo.

Na saili e Leoleo le taga o le ofuvae a le ua molia sa faia ma maua ai se tama’i ato uliuli o loo i ai pepa faamaonia e pei o le laisene ave ta’avale ma le ID mai le Ofisa o Femalagaaiga. I totonu o le ato uliuli sa maua ai e Leoleo ni pepa iila laiti se 2 o lo o i ai vaega o le pauta pa’epa’e o le aisa.

O le isi itu o le ato na maua i ai e Leoleo sikaleti mariuana e 2 ua uma ona taai o lo o i ai vaega o lau mamago o le mariuana. A o taumafai Leoleo e tuu faatasi pepa iila na maua ai aisa ma sikaleti mariuana, na faafuasei ona aapa atu le ua molia ma se’i ese mai ae taumafai e faaleaga, peita’i na vave gaioiga a Leoleo ma le mafai ai loa e le ua molia ona fa’ataunu’u lana fuafuaga.

Ina ua mae’a ona faailoa aia tatau faaletulafono o le alii ua molia, na ia faailoa ai i Leoleo, e le mana’o e fai sana faamatalaga e faatatau i le paipa tioata na maua ia te ia. Pau lana faamatalaga na fai i Leoleo, sa ia faatoese e tusa ai o lana gaioiga sa faia i lona to’alua, lea ua mafua ai ona loka o ia.

ULUA’I ILOILOIGA

I le taimi na tula’i ai le ua moila mo le taimi muamua, na ia faailoa ai i le Faamasinoga lona mana’o e fa’ataunu’u lana ulua’i iloiloga.

I le taimi o le ulua’i iloiloga, e to’atasi le molimau na valaau e le malo mo le latou itu, o le alii Leoleo ia Off. Fomai, o ia fo’i lea na autu i ai le suesueina o lenei mataupu.

Na taua e le molimau e faapea, o le pepa iila sa i ai vaega o le pauta o le aisa na maua i le tino o le ua molia, na mafai ona faia i ai se suega faapitoa mo vailaau oona, ma faamaonia ai, o le pauta paepae sa i ai i totonu, o le vaega lea o le pauta faasaina o le aisa.

Na fesili le loia a le alii ua molia i le molimau, pe aisea e su’e ai e Leoleo tino o tagata e taofia i soo se tulafono, poo se faiga masani lava lea a Leoleo ina ia saili ai ni fualaau fa’asaina.

Na tali le molimau, e mafua ona saili le tino o le tagata ua taofia i lalo o le vaavaaiga a Leoleo, mo le puipuiga lava o le saogalemu o Leoleo faapea ai le tagata ua taofia, ina ia mautinoa e le o umia e le tagata ua taofia ni aupega poo nisi mea maai e ono aafia ai le soifua o se tagata.

Na fia malamalama le alii Loia Fautua pe na faapefea ona taumafai le ua molia e faaleaga sikaleti mariuana ina ua maua e Leoleo. Na taua e le molimau e fa’apea, ao uu e le Leoleo sikaleti mariuana i lona lima, na faafuasei ona tago atu le ua molia ma se’i ese mai sikaleti mai le lima o le Leoleo ma taumafai e sasae.

O le mae’a ai o le ulua’i iloiloga o lenei mataupu, na finau ai loa le itu a le malo i le Fa’amasinoga ina ia tuu atu loa le mataupu a le ua molia i luma o le Fa’amasinoga Maualuga e faaauau ai ona taualumaga, ona o lea ua manino mau sa latou folasia e lagolago ai lana solitulafono.

Na faamalieina le Faamasinoga Faaitumalo i mau na folasia e le malo, ma faia ai loa le faaiuga ina ia tuuina atu le mataupu a le ua molia i luma o le Fa’amasinoga Maualuga.

O le aso Lulu na te’a na tula’i ai le ua molia i luma o le Faamasinoga Maualuga, ma ia teena ai le tagi a le malo. O le masina o Tesema lea ua fa’atulaga e toe valaau ai lana mataupu.