Molia se alii i le umia o fualaau fa’asaina

Pago Pago, AMERIKA SAMOA

O le ali’i e 40 tausaga le matua lea na pu’e faapagota e Leoleo i le masina na te’a nei, ona o tu’uaiga i lona fa’aaoga lea o se tama’i naifi (tulou) e faaoo ai manu’a i se isi ali’i, ua molia nei o ia i lona umia o fualaau fa’asaina, ina ua saili e Leoleo lona tino ae maua ai vaega o fualaau fa’asaina ia te ia.

O lenei mataupu na tofu atu i le Ofisa o Leoleo i Tafuna, ina ua talosagaina e se tama’ita’i e 17 tausaga le matua le fesoasoani a Leoleo mo lona uncle na manu’a ina ua tui e se isi tagata i se naifi. Na faailoa atili e le tama’ita’i lea i Leoleo, talu ai le matuia o manu’a o loo aafia ai lona uncle, o le mafua’aga lea ua faanatinati atu ai o ia i le Falema’i i Faga’alu i le ta’avale a le latou aiga mo togafitiga.

E to’atele Leoleo na aga’i atu e tali i le valaau ma maua ai loa le avanoa latou te fesiligia ai nisi o le aiga o le alii ua aafia. Na taua e le tama’ita’i talavou lea i Leoleo e fa’apea, na alu lona uncle e talanoa ma lona to’alua muamua e tusa ai o se mataupu e faatatau i le la fanau. Na faateia lo latou aiga ina ua latou vaaia o le toe fo’i atu o lona uncle ma ona foliga e pisia uma i le toto, ma ia talosagaina loa le aiga ina ia ave o ia i le falema’i ona o loo manu’a lona tauau ma lona papatua.

Na maua e Leoleo i le latou suesuega, e i ai le sootaga i le va o le alii ua aafia ma le tagata o loo masalomia na faatinoina le solitulafoano, o ia lea o Aukusitino Faalava’i. O le ua molia, o le to’alua muamua lea o le tuafafine a Fa’alava’i.

Na aga’i atu Leoleo i le nofoaga na tula’i mai ai le fa’alavelave ma le faamoemoe e saili le susuga a Faalava’i, peita’i na fiu Leoleo e saili le ua molia latou te le i maua. Na malilie fo’i lona aiga, o le a latou fesoasoani e momoli atu Faalava’i i le Ofisa o Leoleo i le taimi e toe fo’i ane ai i le fale. 

A o taumafai ai Leoleo e saili ni molimau e fesoasoani i le latou suesuega, na maua ai e Leoleo se faamatalaga mai le tamaitai e 17 sa latou talanoa muamua e faapea, e tusa ai o le tala a lona uncle ia te ia, sa i ai lona to’alua muamua i le taimi na tula’i mai ai le fa’alavelave, o ia fo’i o loo molimau i le taimi na tui ai o ia e Faalava’i i le naifi.

Na maua le avanoa e fesiligia ai e Leoleo le to’alua muamua o le alii ua manu’a mo le tuuina atu o sana faamatalaga e tusa ai o lenei mataupu. Na taua e le Tina talavou lea i Leoleo e fa’apea, o ia na valaau i lona to’alua muamua (le ua manu’a) e alu atu i le latou fale se’i o la talanoa i le mataupu e faatatau i le la fanau e to’atolu. 

Sa lelei lava le la talanoaga i fafo o le vaega e paka ai ta’avale, ae na faateia o ia ina ua ia vaaia le aga’i atu o lona tuagane (le ua molia) ma faaoolima loa i le na aafia e ala i lona tu’i o ona foliga. Na tifa i autafa le ua aafia ina ua tau ai le tu’i a Faalava’i, ma toe faasaga mai ai ma sasau atu loa lana tu’i ma lavea ai Faalava’i.

Na taua e le molimau, o le taimi lea na tamo’e ai loa i totonu o le fale ma valaau i lona aiga mo se fesoasoani, peita’i na faateia o ia ina ua ia vaaia le tamo’e ane o lona toalua muamua i le pito i luma o le fale ma ona foliga o loo pisia uma i le toto. E oo fo’i i lona papatua ma lona tauau sa ia vaaia ai ni manu’a e foliga mai na aafia o ia i se aupega maai. 

Na teena e le molimau faamatalaga sa ia vaai i le taimi na faatino ai e lona tuagane le solitulafono. 

Na maua le avanoa e fesiligia ai e Leoleo le na aafia ina ua te’a o ia i tua mai le Falema’i i Faga’alu. 

Na taua e le alii na aafia i Leoleo e fa’apea, na mafua ona alu i le fale a lona to’alua muamua (Tina o lana fanau e to’atolu), ona sa valaau atu o ia e alu atu la te talanoa i se mataupu e faatatau i lana fanau. O fafo o le fale i le vaega e paka ai ta’avale sa la talanoa ai, pe tusa o le 20 minute, ae faafuase’i loa ona ia vaaia Faalava’i ua savali atu i le vaega tonu o loo la talanoa ai.

Na faateia o ia ina ua savali atu lava Faalava’i ma tu’i loa o ia ma tifa ai i le isi itu. Na ia faliu i le itu o loo i ai Faalava’i ma sasau atu lana tu’i ma tau i le gutu o Faalava’i, ma palasi ai loa Faalava’i i lalo. Na ia vaaia le toe tu mai o Faalava’i i luga, a o tago lona lima e se’i mai se tama’i naifi sa i totonu o le taga o lona ofu sa fai ma tui ai loa o ia.

Na vave lana faliu ma tu ai le naifi i lona tauau. Na ia lagona le tiga, o lea na ia taumai ai loa e tamo’e ese, peita’i na toe sasau atu le isi tui lona lua ma aafia ai lona papatua. Na mafai ona ia tamo’e i luma o le fale ma ia valaau atu i lona to’alua muamua e vili se ta’avale e alu ai i le fale, o ia ua lavea.

E 3 aso talu ona tuana’i le fa’alavelave ae mafai loa ona pu’e faapagota e Leoleo ia Faalava’i mai lo latou fale, ma auina atu loa o ia i le Ofisa o Leoleo mo le faatalatalanoaina o lenei mataupu. 

A o le i auina atu o ia i le ta’avale a Leoleo, na muamua saili e Leoleo le tino o Faalava’i mo ni aupega faapea ai ma fualaau faasaina.

E tasi le taga pepa iila na maua e Leoleo i le taga a le ua molia, o loo i ai vaega o le pauta faasaina o le aisa. Sa maua ai fo’i i totonu o le taga o lona ofuvae sa fai se sikaleti mariuana ua uma ona taai.

Ina ua fesiligia e uiga i le mataupu lea na manu’a ai le to’alua muamua a lona tuafafine, na ta’utino ai le ua molia, sa ia fa’aaoga se tamai naifi e tui ai le tauau ma le papatua o le alii na aafia, e mafua mai i lona le fiafia i ana amioga o loo faia i lona tuafafine ma lana fanau. E le i mana’o Faalava’i e talanoa i Leoleo e faatatau i fualaau faasaina sa maua ia te ia.

O le faaiuga o le masina na te’a nei na tula’i ai Tino Faalava’i i luma o le Fa’amasinoga Faaitumalo.

Ua molia nei o ia i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o vaega ia o solitulafono mamafa, lea e mafai ona faasala ai se tasi i le Toese mai le 5 e oo atu i le 10 tausaga, poo le faasala foi i le salatupe e oo atu i le $20,000, pe faasala foi i faasalaga uma ia e lua; faatasi ai ma le moliaga e tasi o le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e oo atu i le $5,000, poo le faasala foi i faasalaga uma ia e lua, faapea ai ma le moliaga e tasi o le faatupu vevesi i nofoaga faitele. 

E $10,000 lea ua faatulaga e tatala ai i tua le ua molia.

Afai ae tatala o ia i tua, ua poloaina o ia e le Fa’amasinoga ina ia aua nei toe taumafai e faafesootai molimau a le malo, e aofia ai ma le alii na aafia i lenei mataupu, a ia avea o ia ma tagata nu’u lelei e tausisi i tulafono a le malo i taimi uma.

O le vaiaso fou lea ua faatulaga e faia ai le ulua’i iloiloga o lenei mataupu.

O lo o taofia pea Faalava’i i le Toese i Tafuna i le taimi nei, ina ua le mafai ona ia totogi le tupe na faatulaga e tatala ai o ia i tua mai le Toese.