Molia se ali’i i le talepe fale ma le umia o fualaau faasaina

 Pago Pago, AMERIKA SAMOA - O le alii lea na tu’uaia i lona osofaia o se fale i Nuuuli i le amataga o le tausaga lenei, ua taofia nei o ia i le Toese i Tafuna, i le mae’a ai lea ona pu’e faapagota o ia e Leoleo i le masina na te’a nei, i lalo o se poloaiga mai le Fa’amasinoga. I le taimi na pu’e faapagota ai Leoleo lea ali’i, na maua i ai ni pepa iila laiti se 2 o lo o i ai vaega o le pauta faasaina o le aisa.

E pei ona taua e le malo i le latou tagi e fa’apea, o le aso 26 o Ianuari o le tausaga nei na talosagaina ai e se Tama mai Nuuuli le fesoasoani a Leoleo, ona o le fale a lona Tina na osofa’i ma faaleaga e ni tagata ae ave faagaoi le tele o meatotino sa i totonu.

Na taua e le alii lea i Leoleo e fa’apea, e leai se isi e nofo i le fale a lona Tina, se’i vagana ai o ia o loo fai ma alu e vaai le fale ina ia mautinoa o loo tulaga lelei mea uma o le fale ma le fanua.

I le aso Faraile, aso 24 o Ianuari e pei ona taua e le molimau, sa ia asia ai le fale ma le fanua ma faia ai fo’i ma lana galuega mo le faamamaina o le lotoa. Sa ia maitauina le leai o se mea na faaletonu, ae na lelei mea uma a’o lei aga’i ese mai i le nofoaga. E le i alu e siaki le fale ma le fanua o lona Tina i le aso Toona’i na sosoo ai, Ianuari 25, ona sa i ai nai ona tuatuagia le maalofia.

Peita’i na matua faateia o ia i le po o le aso Sa, Iauari 26 ina ua toe alu atu e siaki le fale, ae ona vaaia ai loa se vaaiga mata’utia, e le gata ua talepe le faitoto’a pito i tua o le fale, ae tele fo’i meaaoga ua gaoia mai totonu.

Na aga’i atu le molimau i totonu o le fale ma ia faamaonia ai, e le gata e tele meatotino a lona Tina ua ave faagoai, ae o le tele fo’i o isi meatotino ua faaleaga ma fola solo i luga o le fola o le fale. 

E to’atele Leoleo na aga’i atu i le nofoaga na sau ai le valaau, ma latou faamaonia ai tulaga faaletonu e pei ona taua e le molimau i luga o le Telefoni. O le mae’a ai ona fesiligia e Leoleo o le molimau e tusa ai o mea ua faaleagaina, na amata ai loa le latou suesuega e ala lea i lo latou taumafai e saili se molimau poo ni molimau e mafai ona latou tuuina atu ni fa’amatalaga e uiga i lenei mataupu.

E tasi le vaiaso talu ona faagasolo suesuega a Leoleo, ae latou maua loa le ulua’i molimau, o ia lea o se tama’ita’i e nofo latalata i le nofoaga o lo o i ai le fale na afaina i Nuuuli.

Na taua e le molimau lea i Leoleo e faapea, a o nofonofo i luma o le sitepu o le latou i le po o le aso Toonai, aso 25 o Ianuari pe tusa o le itula e 10:32 i le po, na ia vaaia ai se pikiapu lanu uliuli o loo paka mai i luma tonu lava o le fale o le aiga na aafia i lenei faalavelave, faatasi ai ma ni ali’i se to’alua sa ia vaaia o loo tutu i luma o le pikiapu a o ola moli o le ta’avale.

Sa faigofie ona ia iloa le pikiapu, o le ta’avale lea a Ifopo, ona e masani ona ti’eti’e ai lona tuagane ma ana uo, faatasi ai ma Ifopo i le tele o taimi e faia ai a latou tafaoga. Na faailoa atili e le molimau i Leoleo e fa’apea, na te iloaina Ifopo i lona igoa tauvala’au o “Talent” Taleni, lea e masani ona valaau ai e ana uo.

Na aga’i atu Leoleo e tau saili mai Ifopo mai lona aiga, peita’i na fiu Leoleo e saili o ia ua le maua. Na taua fo’i e ona aiga ma ana uo i Leoleo, ua silia ma le vaiaso talu ona latou le toe vaai ia Ifopo, e le i toe oo atu fo’i i le fale.

O se tasi o tausoga o Ifopo sa i ai i le fale i le taimi na aga’i atu ai Leoleo e saili o ia, na ia faailoa i Leoleo e fa’apea, sa ia faalogo, o Ifopo ma isi alii na aafia i le osofaiga o se fale i Nuuuli, lea na gaoia mai ai le tele o meaaoga ae faatau atu i le nofoaga o le Aute e faatau mai ai fualaau faasaina.

E to’alua isi molimau na fesiligia e Leoleo e uiga i lenei mataupu. Na taua e le isi molimau e fa’apea, o le aso 12 o  Fepuari na o atu ai Ifopo i lana taavale pikiapu lanu uliuli faatasi ai ma se isi alii, na tauanau o ia na te faatauina le la moa vao fou lava sa i tua o le ta’avale i le $100. Na fai atu Ifopo ia te ia, na te mana’omia vave lava se tupe e lafo i lona Tina i Samoa, o le mafua’aga lena ua ia manatu ai e fa’atau ese atu lana moa vao. 

E $70 na ave e le alii lea ia Ifopo e fa’atau ai le moa vao, ae i le taeao na sosoo ai, na alu ai lea alii lea na faafo’i le moa vao i Leoleo ma faailoa i ai lana faamataga e uiga i lenei mataupu.

O le masina na te’a nei na pu’e faapagota ai loa e Leoleo ia Ifopo ao faia sa latou galuega faamama fanua ma nisi o alii.

A o le i auina atu Ifopo i le Ofisa o Leoleo mo le faatalatalanoaina o lenei mataupu, na muamua saili e Leoleo lona tino poo i ai ni fualaau faasaina poo ni aupega mata’utia. Ina ua saili e Leoleo le tino a le ua molia, sa latou maua i ai ni pepa iila laiti se lua o lo o i ai vaega o le pauta faasaina o le aisa.

Na taua e Ifopo i Leoleo e fa’apea, o fualaau faasaina sa maua i lona tino, o fualaau faasaina e patino lava ia te ia, na ia faatau mai i le nofoaga o le Aute. Ae ina ua fesiligia e tusa ai o le osofaiga o le fale i Nu’uuli, na teena ai loa e Ifopo lona aoai i lea solitulafono. 

O le masina na te’a nei na tula’i ai le susuga a Taleni Ifopo i luma o le Fa’amasinoga Faaitumalo. E 2 tagi a le malo ua faila faasaga ia te ia.

I le tagi muamua, o loo molia ai o ia i moliaga e 2 o le talepe fale i le tulaga lua faapea ai ma moliaga e 2 o le gaoi, o le vaega C lea o solitulafono mamafa, lea e mafai ona fa’asala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala foi i faasalaga uma ia e 2.

I le tagli lona 2, o lo o tu’uaia ai o ia i le moliaga e tasi o le umia faasolitulafono o vaega o le pauta fa’asaina o le aisa, o se solitulafono mamafa e mafai ona fa’asala ai se tasi i le Toese mai le 5 e oo atu i le 10 tausaga, pe fa’asala foi i le salatupe e mafai ona oo atu i le $20,000, poo le faasala foi i faasalaga uma ia e lua.

E $15,000 lea ua faatulaga e le Fa’amasinoga e totogi ona faatoa mafai lea ona tatala le ua molia i tua mai le Toese i Tafuna.

Afai ae tatala o ia i tua, e le mafai ona ia toe taumafai e faafesoota’i molimau a le malo i soo se auala, e aofia ai ma i latou na aafia i lana solitulafono, a ia avea o ia ma tagatanu’u lelei e tausisi i tulafono a le malo i taimi uma. E le mafai ona ia taumafai e tuua le atunuu i soo se auala, sei vagana ua tuuina atu se poloaiga a le Fa’amasinoga.

O le aso 30 o Iulai lea ua faatulaga e toe valaau ai le mataupu a Ifopo i luma o le Fa’amasinoga Maualuga, i le mae’a ai lea ona ia teena o moliaga faasaga ia te ia i le taimi o lana ulua’i iloiloga i le vaiaso na te’a nei.