Molia se ali’i i le gaoi ma le talepe fale

Pago Pago - AMERIKA SAMOA

O le ali’i talavou lea na tu’uaia i lona ulufale faamalosi i totonu o se fale i Ottoville ma ave faagaoi meatotino sa i ai, ua taofia nei o ia i le Toese i Tafuna ma tu’uaia i le talepe fale ma le gaoi,  i le mae’a ai lea ona pu’e faapagota o ia e Leoleo i le masina na te’a nei.

O le auala na mafai ai ona maua le ua molia, ina ua sola ese ae tia’i lana telefoni atoa ai ma lana uila vilivae i le fale na ia osofaia.

O le masina na te’a nei na tula’i ai le susuga a Ualolo Fatulau i luma o le Fa’amasinoga Faaitumalo mo lana ulua’i iloiloga. E 3 moliga ua tu’uaia ai o ia e le malo. O ia moliga e aofia ai le talepe fale i le tulaga muamua faapea ai ma le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e le silia i le $5,000, poo le faasala foi i faasalaga uma ia e 2, faapea ai ma le moliga o le tu fua i le fanua poo le fale o le isi tagata, o le vaega A o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe faasala i le salatupe e le silia i le $5,000, poo le faasala foi i faasalaga uma ia e 2.

E $10,000 le vaega tupe lea ua faatulaga e le Fa’amasinoga e totogi ona faatoa mafai lea ona tatala le ua molia i tua mai le Toese i Tafuna. Afai ae mafai ona tatala o ia i tua, e le mafai ona ia toe taumafai e faafesootai le fale o le tagata na ia osofaia ma ave faagaoi mai ai mea totino i totonu, e le mafai fo’i ona ia taumafai e faafesootai molimau a le malo i soo se auala, a ia avea o ia ma tagatanu’u e tausisi i tulafono a le malo i taimi uma.

Na faaagafua fo’i e le ua molia ona aia tatau faaletulafono, ma le mafai ai ona faataunuu lana ulua’i iloiloga lea sa faamoemoe e faia i le masina na te’a nei, ae na ia manatu e tuu sa’oa tu loa lana mataupu i luma o le Fa’amasinoga Maualuga e faataunu’u ai lana faamasinoga autu. 

Na teena e le ua molia moliga faasaga ia te ia ina ua tula’i i luma o le Fa’amasinoga Maualuga i le 2 vaiaso talu ai. O lona teena ai o tu’uaiga a le malo, ua faatulaga ai loa lana ulua’i iloiloga i luma o le Fa’amasinoga Mualuga i le masina o Setema o le tausaga nei. 

TAGI A LE MALO

E pei ona taua e le malo i le latou tagi e faapea, o le vaveao o le aso 15 o Iulai 2022 na logo ai e se ali’i le Ofisa o Leoleo i Tafuna ma faailoa i ai se tagata o loo i totonu o lona fale o lo ia ave faagaoi meatotino o loo i ai. Na taua e le alii e ana le fale i Leoleo e faapea, faatoa uma lava le la tuliga ma le tagata na ia osofaia lona fale, ma o lo o tamo’e aga’i atu i le itu o lo o i ai le Fatuoaiga i Ottoville, o lo o tamo’e ma ave meatotino na aveese faagaoi mai i totonu o lona fale faapea ai totonu o lana ta’avale.

E toatele Leoleo na tali atu i le valaau ma maua ai loa le avanoa e feiloa’i ma talanoa ai ma le ali’i e ana le fale lea na osofaia e le gaoi. Na taua e le ali’i lea i Leoleo e faapea, ao moe i totonu o le potu, na faateia lana faalogo i se tagata e pei o loo savali i totonu o le potu malolo. Sa i ai lona manatu, atonu o se isumu o loo fealua’i, peita’i ina ua latalata mai le pao, sa ia manino i lana vaai, o se alii o loo ia ofuina se mitiafu lanu mumu o loo fealua’i solo i totonu o lona fale. 

Na alaga leotele le alii e ana le fale i le tagata gaoi ma faafuase’i ai loa ona tamo’e le tagata gaoi i le atoa ma sola ese loa ma le fale. Na tuliloa e le alii e ana le fale le tagata gaoi peita’i na fai lava si saoasaoa o le gaoi ma i’u ai loa ina le maua e le alii e ana le fale.

Na toe fo’i le ali’i e siaki lana fale ma lana ta’avale ma faamaonia ai meatotino ua aveesea e pei o lana laptop e $1,300 le tau, o isi masini e alu i le uila e faaaoga i lana galuega e ta’i $150 i le mea e tasi, ae 2 meatotino na gaoia e le tagata na sola, atoa ai ma isi meatotino na aveesea mai i totonu o le ta’avale. 

A o taamilo le alii e ana le fale i totonu o lona fale e vaavaai pe i ai nisi ana meatotino na ave faagoai, ae faafuase’i ai ona tau i se telefoni feavea’i o le ituaiga o le Nokia o loo taatia i luma o le potu malolo, o le telefoni tonu lava lea a le tagata na osofaia lona fale. Na savali atu i fafo ma ia vaaia ai se uila vilivae o loo taatia i luma o le fasitepu o le fale, ma ia iloa ai, o meatotino ia a le tagata gaoi ua sola i le atoa ae tiai.

Na faailoa atili e le alii e ana le fale i Leoleo, lana masini pu’e ata o loo i fafo o lona fale e mafai ona fesoasoani ai i le tau sailiina o le tagata na osofaia lona fale. Na maua le avanoa e matamata ai Leoleo Suesue i le ata sa pu’eina i le masini pu’eata, ma faigofie ai ona latou mataituina le tagata na faatinoina o lenei osofaiga, o le susuga lea a Ualolo Fatulua, o se tasi o ali’i o loo nofovaavaaia i nisi foi solitlafono e aofia ai le gaoi ma le talepe fale. 

Na faamaonia uma e Leoleo i le ata sa pu’eina i le masini pu’eata faamatalaga uma a le alii e ana le fale i gaioiga sa faia e le tagata gaoi, mai lava i le amataga seia oo i le taimi na sola ai ma alu i le atoa ina ua ia maua o ia.

O le vaega lona lua o le suesuega a Leoleo Suesue, o le taumafai loa lea e saili se nofoaga e mafai ona maua i ai le ua molia. Na asia e Leoleo nofoaga ma afioaga sa masani ona maua i ai le ua molia peita’i e le o toe nofo ai o ia i nofoaga uma ia. 

Na faateia Leoleo Suesue ina ua maua sa latou telefoni mai se Molimau Faatuatuaina, na ia vaai tino lava i le alii o loo tau sailia o tietie atu i lana uila vilivili i le vaveao o le aso lea pe tusa o le itula e 5:00 i le taeao, ma lona mitiafu lanu mumu ma se pulou enaena.

Na taua e le molimau i Leoleo Suesue e faapea, a o nofonofo i luma o lona fale i le taeao po lava lea, ae faafuase’i lona oa tau atu lana vaai i le alii lea o loo tietie atu i uila vilivae, ae o loo tau saili o ia e le Ofisa Nofovaavaaia i lona le usitaia o tuutuuga o lana nofovaavaaia. Ole molimau e pei ona fesootai i Leoleo o se asi fo’i o Leoleo o le malo. Na taua atili e le molimau i Leoleo, o loo i ai se tusi saisai mai le Faamasinoga e pu’e faapagota ai le ua molia, talu ai lona le auai i taimi sa faatulaga e valaau ai lana mataupu. 

Na maua e Leoleo le kopi o le tusi saisai ma sauniuni ai loa i se taimi e sau ai se valaau e faatatau i se nofoaga e maua i ai le ua molia. A o faatalitali Leoleo Suesue i le taeao lava lea o le aso 15 o Iulai pe tusa o le itula e 9:40, na latou maua ai loa le telefoni mai se tasi o molimau, o le alii o loo tau sailia ia Fatulau o lo o tutu i luma o se tasi o Faleoloa i se vaega o Tafuna. 

E le i toe faatali Leoleo Suesue ae ua aga’i atu loa i le nofoaga na sau ai le valaau ma latou vaaia ai le ua molia o lo o tutu na o ia i luma o le Faleoloa. Na vave gaioiga a Leoleo Suesue ma latou pu’e faapagota ai loa le ua molia ma auina atu i le Ofisa o Leoleo i Tafuna mo suesuega. 

Na matua tete’e malosi le ua molia e i ai sona aafiaga i le faalavelave lea na amata ai lava ona sailia o ia e Leoleo. Na faailoa fo’i e Leoleo Suesue i le alii ua molia, o loo i ai le tusi saisai mai le Fa’amasinoga e pu’e faapagota ai o ia, talu ai lona le usitai i faatonuga na avatu e faatatau i lana nofovaavaaia.

Talu ai le tete’e malosi o le ua molia i tu’uaiga o le gaoi ma le talepe fale, na mafua ai loa ona faafesootai e Leoleo le alii e ana le fale na osofaia e oo atu i le Ofisa o Leoleo e vaai poo le tagata tonu lea na fai la tuliga i le vaveao i lona fale. Na taunu’u le molimau ma faamaonia ai i lana vaai, o le tagata tonu lava lea na osofaia lona fale i Ottoville, lea na oso ae tia’i lana telefoni ma lana uila viliave.