Molia se alii i le faia o uiga mataga faasaga i se tamaitai

Pago Pago, AMERIKA SAMOA

E 26 tausaga le matua o se ali’i talavou ua taofia nei i le Toese i Tafuna, ina ua mae’a ona pu’e faapagota o ia Leoleo i le masina na te’a nei, e mafua mai i tu’uaiga o lona faia lea o uiga mataga i se tamaitai talavou e 16 tausaga le matua.

Ina ua pu’e faapagota e Leoleo le alii ua molia, na maua ai i totonu o le taga o lona ofu sa laei se paipa tioata o lo o i ai vaega o le pauta pa’epa’e o le aisa.

E pei ona e le malo i le latou tagi, o le alii ua molia, le susuga a Taumata Tialogo ma le tama’ita’i na aafia, e auai i laua i se mafutaga faaleuo i le va o le ali’i ma le tama’ita’i mo ni nai masina, a o le i alia’e mai lenei mataupu.

O le masina na te’a nei na pu’e faapagota ai e Leoleo le susuga a Tialogo i lalo o se poloaiga a le Fa’amasinoga, ma ua taofia nei o ia i le Toese i Tafuna e faatalitali ai le isi ana iloiloga.

E 15 moliaga mamafa ua tu’uaia ai e le malo le ali’i ua molia. 

O ia moliaga e aofia ai moliaga e 10 o le faia o amioga faasotoma, faapea ai ma moliaga e 5 o le faiaiga ma se tamaitai e talavou i lalo o le Tulafono, o le vaega B lea o solitulafono mamafa, lea e mafai ona ona faasala ai se tasi i le Toese mai le 5 e oo atu i le 15 tausaga le umi.

E $35,000 le vaega tupe lea ua fa’atulaga e tatala ai i tua Tialogo. Afai ae tatala o ia i tua, ua poloaina o ia e le Fa’amasnoga e aua nei toe vaaia o ia o taumafai e fesoota’i le tamaitai na aafia i soo se auala, poo se isi fo’i o lona aiga, e le mafai fo’i ona ia toe taumafai e latalata i ai pe alu ai fo’i i lona fale. 

A ia avea o ia o se tagatanu’u lelei e tausisi i tulafono a le malo i taimi uma, ma ia auai i soo se taimi e valaau ai lana mataupu.

E le i manatu le ua molia e fa’ataunuu lana ulua’i iloiloga, ae na filifili o ia e tu’u sa’o atu loa lana mataupu i luma o le Faamasinoga Maualuga mo isi ana iloiloga o lo o mulimuli mai ai.

O le masina na te’a nei na tula’i ai Tialogo i luma o le Faamasinoga Maualuga ma ia teena ai le tagi a le malo faasaga ia te ia.. O le masina o Oketopa lea ua fa’atulaga e toe valaau ai lenei mataupu, ae o le amataga o le tausaga e 2026 lea ua fa’atulaga e faia ai lana faamasinoga autu.

TAGI A LE MALO

O lenei mataupu  na tofu atu i le Ofisa o Leoleo i Tauna ina ua aga’i atu i ai le Tina o le tamaitai na aafia ma faila sana tagi faasaga ia Tialogo, ona o le faalavelave na tula’i mai i le va o ia ma lana tama teine e 15 tausaga le matua.

Na taua atili e le Tina i Leoleo Suesue e faapea, la te le iloaina ma le Tama o le aiga se faafitauli o lo o tula’i mai i le la tama teine, peita’i o se faafitauli na tula’i mai i le latou fale i se tasi o Aso Sa ina ua toeitiiti lava matapogia le tamaitai, na mafua ai loa ona alia’e lenei mataupu.

O le mae’a ai ona tau aao e Leoleo Suesue o faamatalaga e uiga i lenei mataupu, na latou fesiligia ai loa ni isi o loo aafia i lenei mataupu, e aofia ai le tamaitai na aafia faapea ai ma le ali’i ua molia i lenei mataupu. Sa i ai faatasi le tamaitai na aafia ma lona Tina i le taimi na fesiligia ai o ia.

Na taua e le Tina i Leoleo Suesue e faapea, o lenei mataupu na faatoa alia’e i le taeao o le aso Sa i le masina o Iuni o le tauaga nei, ina ua tau matapogia lana tama, ma manatu ai loa e ave o ia i le Falema’i i Fagaalu e vaai le foma’i. O le suega sa faia e le Foma’i na faamaonia ai aafiaga o lana tama talu ai le la mafutaga faaleuo ma le ali’i ua molia nei.

Na maua le avanoa e fesiligia ai e Leoleo Suesue le tamaitai na aafia e uiga i lenei mataupu, atoa ai ma le mafua’aga o lona ma’itaga. Sa molimauina e le Tina faamatalaga sa tuuina atu e lana tama i Leoleo Suesue. 

Na taua e le tamaitai na aafia e faapea, o le la mafutaga ma Tialogo na amata mai i le masina o Tesema i taimi o aso fiafia. Na mafai ona manatua e le tamaitai na aafia nisi o mea sa tutupu i le taimi o le la mafutaga ma lana uo, e aofia ai mafutaga i totonu o le aoga atoa ai ma mafutaga i tua i le aiga e aofia ai se taimi o le leva o le po.

I se tasi o po i le masina o Iuni o le tausaga na te’a nei e pei ona taua e le tamaitai na aafia i Leoleo Suesue, na tula’i mai ai se faalavelave i le va o ia ma Tialogo i le Fale Tuufua o loo i autafa o le latou fale i Nu’uuli. Na manatua e le tamaitai le taimi na fesootai atu ai Faalogo ia te ia i le telefoni pe mafai ona alu atu la te eva ae sa tali i ai e onosa’i se’i momoe uma le latou aiga. 

Pe tusa o le itula e 12 i le tulua o po ina ua momoe lona aiga, na tuua ai loa e le tamaitai le fale ae alu atu i le Fale Tuufua o loo faatali mai ai Tialogo ma la tafafao loa. E silia i le 2 itula le umi o lea tafaoga. Na amata lava i talanoaga ae na faai’u ina ua la feusua’i. Sa ia taua i Leoleo Suesue lona malie atoatoa i feusuaiga sa faia i lea po ma Tialogo. Pe tusa o le itula e 3:00 i le vaveao na ia toe fo’i ai loa i le fale ae aga’i atu fo’i Tialogo i lona fale.

O le faalavelave lona lua e pei ona taua e le tamaitai na aafia i Leoleo Suesue na tulai mai i le masina o Setema o le tausaga na te’a nei, ina ua alu ma la eva ma Tialogo i totonu o le Fale Tuufua i tafatafa o le latou fale, ma i’u ina la feusua’i ai ma Tialogo. Ae na faateia o ia ina ua vaaia e Tialogo le tau fai ola mai o moli o le latou fale, ma vaaia ai lona Tama ua savali mai i fafo o le fale. Na alu i le atoa Tialogo ae o le taimi lea na tu ai i luga ma savali atui le fale. 

Sa fesili atu lona Tama ia te ia poo fea sa i ai i le leva o le po ae na tali i ai sa alu e fa’aaoga le bathroom. 

O le mae’a ai ona fesiligia e Leoleo Suesue o le tamaitai na aafia, na latou fesiligia ai loa le ali’i ua molia e uiga i lenei mataupu. A o le i fesiligia e Leoleo Suesue le alii ua molia, sa latou faailoa i ai, e le o taofia faapagota o ia i le taimi lea, e mafai fo’i ona ia fo’i atu i lona aiga i soo se taimi lava e mana’o i ai.

Ina ua fesiligia le ua molia, sa ia ta’utino ai i Leoleo Suesue, e moni tu’uaiga i le i ai lea o se mafutaga faaleulugali’i i le va o ia ma le tamaitai na a’afia.

O le taimi lava na ta’utino ai Faalogo e tusa ai o tu’uaiga faasaga ia te ia, na taofi ai loa e Leoleo Suesue le faatalatalanoaga ae fautuaina loa o ia i ona aia tatau i lalo o le tulafono, e aofia ai le aia tatau e le tau faia ai sana faamatalaga. Na faailoa e Tialogo i Leoleo Suesue lona malamalama i ona aia tatau ma ua ia manatu fo’i e fa’aagafua ona aia tatau ae tuuina atu lana faamatalaga e tusa ai o le faalavelave sa tula’i mai i le va o ia ma lana uo tamaita’i.

Na faamatala e le ua molia e faapea, o le masina o Tesema o le tausaga na te’a nei na amata mai ai le la mafutaga ma le tamaitai na aafia seia oo mai i le masina o Fepuari o le tausaga nei. I totonu o le va lea, sa la feusua’i ai mo le tele o taimi i totonu o le Fale Tuufua o loo i tafatafa o le fale o le tamaitai, poo totonu fo’i o lona potu.

O nisi o po e fesoota’i atu ai le tamaitai ia te ia pe mafai ona la tafafao i le po, ae o nisi fo’i taimi e fesoota’i ai o ia i le tamaitai mo se avanoa la te tafafao ai i le leva o le po. Faatoa la mafuta lava i le leva o le po, aemaise lava i le taimi ua momoe uma ai le aiga o le tamaitai, o nisi o taimi la te eva ai i le Fale Tuufua ae o isi fo’i taimi o totonu lona potu.

O taimi uma lava la te feusuta’i ai, la te malilie uma ai lava e faatino nei gaioiga. Na ta’utino Tialogo, e leai se taimi na ia faamalosia ai le tamaitai na aafia, ae sa malie fo’i i ai o ia.

Na toe fesiligia e Leoleo Suesue le tamaitai na aafia e tusa ai o lenei mataupu, i le mae’a ai lea ona latou fesiligia o Tialogo. Na taua e le tamaitai na aafia i Leoleo Suesue e faapea, e i ai isi faamatalaga na musu e faailoa i le latou ulua’i talanoaga, ona sa iai ona lagona ma i lona Tina sa faalogologo i le latou talanoaga.

Na faamaonia e le tamaitai na aafia i Leoleo faamatalaga uma a Tialogo e tusa ai o le la mafutaga. Sa ia taua e faapea, e faatele ona la momoe ma faiaiga ma Faalogo, toeitiiti lava fo’i po uma lava la te eva ma mafuta ai ma Tialogo. Sa ia malie ai fo’i i taimi uma la te faiaiga ai ma lana uo.

A o lei auina atu Tialogo i le Ofisa o Leoleo mo suesuega, na saili e Leoleo lona tino mo ni aupega faasaina, ma maua ai se paipa tioata o lo o i ai vaega o le pauta o le aisa. Ina ua fesiligia e Leoleo Suesue le alii o Tialogo e tusa ai o le paipa tioata na i ai vaega o le pauta faasaina na maua ia te ia, na tali le ua molia, o le paipa tioata na foa’i atu e sana uo ia te ia.