Molia se alii i le faia o faamaumauga pepelo ma le gaoi

Pago Pago - AMERIKA SAMOA

Ua molia nei e le malo se ali’i e 35 tausaga le matua i moliaga o le gaoi atoa ai ma le faia o faamaumauga pepelo, e mafua mai i le mataupu lea na ia faamalosia ai le saini a lona uncle i luga o ana siaki ae tala ma fa’aaoga mo ia lava i le tausaga na te’a nei. 

E le o manino le mafua’aga faatoa faila ai e le malo i le masina na te’a nei le tagi faasaga i le ali’i ua molia, e ui o le solitulafono na tula’i mai i le tausaga na te’a nei.

Ina ua pu’e faapagota e Leoleo le ua molia, na maua ai i totonu o lana ato faafafa ni pepa iila se 2 o loo i ai vaega o le pauta faasaina o le aisa.

O le masina na te’a nei na tula’i ai le susuga a Justin Saolotoga i luma o le Fa’amasinoga Fa’aitumalo mo lana ulua’i iloiloga.

E 2 tagi a le malo ua faila faasaga ia Saolotoga.

I le tagi muamua, ua molia ai o ia i moliaga e 4 o le gaoi atoa ai ma moliaga e 4 o le faia o faamaumauga pepelo, o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

I le tagi lona lua, ua molia ai o ia i le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai o ia i le Toese mai le 5 e oo atu i le 20 tausaga, pe faasala foi i le salatupe e oo atu i le $20,000.

E $10,000 le vaega tupe lea ua fa’atulaga e le Fa’amasinoga e tatala ai i tua Saolotoga. Afai ae tatala o ia i tua, ua poloaina o ia ina ia auai i soo sana iloiloga, fesoota’i vava lalata ma lana loia, ma ia avea fo’i o ia ma tagatanu’u e tausisi i soo se tulafono a le malo.

E le mafai ona ia tuua pe taumafai fo’i e sola ese ma le atunu’u, ma ua poloaina fo’i le tuuina atu o lona tusi folau e taofi e le Ofisa o le Loia Sili se’i mae’a taualumaga o lana mataupu ona fa’atoa toe fa’amatu’u atu lea. Ua fautuaina malosi fo’i o ia e le Fa’amasinoga, e le mafai ona ia toe taumafai e fa’afesoota’i molimau a le malo e aofia ai ma lona aunty o lo o a’afia i lenei mataupu.

Na teena e le Fa’amasinoga le talosaga a le loia fautua ina ia fa’aitiitia le tupe e tatala ai Saologoa i le $3,400, fuafua i le aofa’i o le tupe o lo o a’afia i lenei mataupu.

Na taua e le loia fautua a le ua molia ia Ryan Anderson e fa’apea, o Saolotoga, o se ali’i e fai lona aiga ma lana fanau e to’a 4, e faamoemoe ia te ia le tausiga o lona aiga, o ia foi o se tagata e galue malosi mo lona aiga. 

O le faalavelave o lo o tu’uaia ai o ia, na tula’i mai lava i totonu o le lotoifale o le aiga, e le o i ai fo’i se tulaga e ono lamatia ai le saogalemu o tagata lautele pe afai ae tatala o ia i tua. Na talosaga Anderson ina ia faatulaga le tupe e tatala ai le ua molia, fuafua i le aofa’iga o le tupe o loo finau le malo na a’afia i le solitulafono.

Na tete’e malosi le loia a le malo i le talosaga a le itu tete’e. Na taua e le susuga ia Jaosn Mitchell e fa’apea, e 8 moliaga mamafa o lo o tu’uaia ai Saolotoga, o le moliaga e tasi, e $5,000 le salatupe o loo faatulaga mai ai e le Tulafono. 

E ui o le mataupu na tula’i mai i totonu o le lotoifale o le aiga, peita’i na finau le malo e fa’apea, e matuia tele le gaioiga sa faia e le ua molia, ina ua ia gaoia meatotino a lona aunty, ona ia faamalosi lea o le saini ma tala faagaoi ai tupe ae fa’aaoga mo ia lava. 

E talitonu le malo, ua talafeagai le tupe ua maea ona faatulaga e le fa’amasinoga e tatala ai le ua molia i tua. 

I le mae’a ai ona faafofoga o le Fa’amasinoga i faafinauga a itu e lua, na talia ai loa e le Fa’amasinoga le talosaga a le malo, ina ia tumau pea i le $10,000 le tupe e tatala ai le ua molia i tua.

E pei ona taua e le malo i le latou tagi, o lenei mataupu na tofu atu i le Ofisa o Leoleo, ina ua faila e le aunty sana tagi fa’asaga ia Saolotoga, i lona ave faagaoi lea o se vaega tupe tele mai totonu o lana teugatupe e aunoa ma se fa’atanaga fa’aletulafono.

Na taua e le Tina na a’afia i Leoleo e fa’apea, na fiu e tau faapaleni le aofa’i o le tupe o loo totoe i totonu o lana teugatupe, ina ua alu atu e siaki pe fia se paleni o i ai. Sa ia taumafaufau poo a nisi manaoga o le aiga sa fa’aalu ai lea vaega tupe tele, ae foliga mai e le o mafai lava ona manino i lona mafaufau.

Ae ina ua maua mai lana kopi o le paleni o lana teugatupe mai le Faletupe i le amataga o le masina na te’a nei, na ia iloa ai loa iina, e $3,400 le aofa’i o le tupe ua alu ese mai lana teugatupe, ina ua tala faamalosi ese tagata e aunoa ma lana faatanaga.

A o faaauau pea sailiiliga a le Tina i le mafua’aga ua tala faamalosi ai e le tagata tupe mai totonu o lana teugatupe, na ia manino ai loa, e 4 ana siaki ua aveese mai i totonu o lana tusi siaki.

Na iloa mulimuli ane e le Tina, o lona nephew ia Saolotoga lea na ia gaoia ana siaki e 4 mai totonu o lana tusi siaki, saini faamalosi ai lona igoa ma tala mai loa i le faletupe e aunoa ma ana fa’atanaga.

Na saili e le Tina i le Faletupe isi faamaumauga e uiga i lana teugatupe ma faamaonia ai, e 4 siaki na tala e Saolotoga e ala i lona saini faamalosi o lona igoa i se auala faagaoi.

Na fesiligia e le Tina ia Saolotoga e tusa ai o lenei mataupu, ma faatoese ai loa le ua molia i lona aunty e tusa ai o lana gaioiga sa faia, faatasi ai ma lana ta’utinoga, o le a ia toe totogi atu le tupe sa ia gaoia. 

Na tuuina atu fo’i e le ua molia i lona aunty sana tusi ua mae’a ona saini e fa’ailoa atu ai lona sauni e toe totogi le tupe, peita’i na taua e le Tina i Leoleo, ua fiu e fa’atalitali le ua molia mo le toe totogiina atu o lana tupe e pei o lana folafolaga, e lei toe oo atu lava, o le mafua’aga lea na ia manatu ai loa e faila lana tagi i le Ofisa o Leoleo.

E pei ona taua i faamaumauga a le Faletupe, o le siaki muamua i le aofaiga e $690 na tala e le ua molia i le aso 23 o Aperila o le tausaga na te’a nei. O le siaki lona lua e $510 na tala i le aso 31 o Me o le masina na sosoo ai. O le siaki lona tolu i le aofaiga e $540 na tala i le aso 05 o Iuni o le masina na sosoo ai, ma le siaki lona fa e $710 le aofa’i na tala i le aso 20 o Iuni o le masina lava lea.

I faamaumauga na tuuina atu e le Faletupe i Leoleo e tusa ai o lenei mataupu, o loo taua ai le tusia e le ua molia o lona igoa i lona o siaki uma nei e 4, faatasi ai ma lona faamalosia o le saini a lona aunty e faamaonia ai le talaina o siaki, ma ia fa’aaoga ai lona Laisene ave ta’avale e fai ma pepa faamaonia e tala ai siaki uma nei.

Ina ua fesiligia e Leoleo le ua molia e uiga i lenei mataupu, sa ia ioeina ai lona aga’i atu i totonu o le potu a lona aunty i le aso na alu ai e teu le fanua, ma ia maua ai le tusi siaki i luga o le laulau.

Sa ia se’i ese siaki e 4 ma le fa’amoemoe na te talaina ai se tupe mo ia ma lona aiga. Na tagi le ua molia ma faatoese i Leoleo e tusa ai o lana solitulafono, faatasi ai ma lana tautinoga, na te toe fia totogiina le tupe a lona aunty, ae ua le iloa pe faapefea ona ia toe totogiina.

Ina ua pu’e faapagota e Leoleo le ua molia i le masina na te’a nei, na maua ai i totonu o lana ato faafafa ni pepa iila laiti se 2 o lo o i ai vaega o le pauta faasaina o le aisa. Ina ua fesiligia o ia e Leoleo e uiga i fualaau faasaina, na ta’utino ai le ua molia, o fualaau faasaina na ia faatauina mai i se tasi o alii i le masina na te’a nei ma le faamoemoe e fa’aaoga mo ia lava.