Molia se alii i le faia o amioga mataga i se teineitiiti 13 tausaga

Pago Pago - AMERIKA SAMOA

Ua molia nei se alii e 49 tausaga mai Samoa, i moliaga o le faia o uiga mataga, i lona tulaga muamua, o se solitulafono mamafa, e mafai ona loka ai se tasi i le falepuipui, e le sili atu ma le lima (5) tausaga, po o se sala tupe e le sili atu ma le $5,000; po o faasalaga uma e lua.

E tusa ai ma faamaumauga a leoleo, o lenei mataupu na tulai mai i le aso 26 o Ianuari, 2024 i le 8:30 i le po, a’o feagai leoleo ma o latou tiute masani i luga o le alatele, ae va’aia ai se ali’i o ta’atia i tafatafa o le alatele i Iliili.  O le agai atu o leoleo e saili po o manaomia e lea ali’i se fesoasoani, ae faamatalaina atu ai e ni teneiti talavou, e 13 ma le 14 tausaga le matutua, le faia e lea alii o ni uiga mataga i le teineitiiti 13 tausaga, i luma o le falesa EFKAS i Iliili.

O le a le lomia e le Samoa News suafa o i latou o lo’o a’afia i lenei mataupu, ona o le talavou o le tamaitai o lo o talitonu, o lo o a’afia i lenei faalavelave.

Sa fa’atonuina e leoleo ia le tua’a o le teineitiiti 13 tausaga, ina ia aveina atu lona fafine i le ofisa a leoleo mo le fa’aauauina o a latou su’esu’ega.

Ae ua aveina ia le alii lea sa ta’atia i tafatafa o le auala, i totonu o le taavale a leoleo, ma na lagona e leoleo le manogi pia o lenei alii.

I le ofisa a leoleo, sa fa’atalanoaina ai e leoleo ia nei teineiti e to’alua ma sa faamatala e le teineitiiti e 13 tausaga e faapea, na o ma lona tausoga i le Bingo i le fale ole ekalesia (hall) EFKAS, ae fai atu le tamaitai 14 tausaga, e la te tafafao i le pakaga taavale e faatali ai nai o latou tei.

Sa ta’ua e le teineitiiti 13 tausaga, e le i umi, ae alu atu se alii e la te le masani ai, ma fesili atu ia la’ua pe la te iloa se tagata e igoa ia ‘Vao’, na tali le tamaitai, ‘ioe’, ona alu ese lea o le alii.  Ae o sina taimi pu’upu’u, na toe foi atu ai lenei alii, ae o le taimi lena ua valaau mai ai lona ‘Aunty’ e alu atu.  Ina ua ia toe fo’i mai, sa faamatala atu e le teine 14 tausaga, o la sa su’e o ia e le alii lea.

Ina ua fai atu le teineitiiti 14 tausaga, o ia o le a alu i totonu o le Bingo, sa faapea loa ona savali le teineitiiti 13 tausaga e latalata i le pakaga taavale, ma ia vaaia ai le toe alu atu o le alii lava lea e tasi, ma fesili atu ia te ia, pe ono loka o ia (alii) pe a tago atu ia te ia (teineitiiti), ae na te le i tali mai iai.

Sa faamatala e le teineitiiti 13 tausaga le tago atu o le alii ia te ia, ma e faalima ona ia po ese ina le lima o lea alii, ma tamo’e ese ai loa.  Ae e tepa mai i tua, o lo o mulimuli atu lenei alii ia te ia ma fai atu ia te ia, afai e na te ta’uina i seisi le mea na tupu, o le a ia tuliloaina o ia i le po atoa.

I le faamatalaga a le molimau, po o le teineitiiti 14 tausaga, sa ia ta’ua ai e faapea, na alu atu se alii e la te le masani ma faatalofa atu ia la’ua, ona savali lea o lenei alii i totonu o le ‘hall’ ma toe fo’i mai ma fesili atu ia la’ua pe la te iloa se tagata e igoa ia ‘Vao’, lea e iai sona alo e suafa ia Henry.  Sa tali nei tamaitai, ‘ioe’.

Sa fa’ailoa atu e nei teineiti i lea alii, o le fafine lea o lo o ia su’eina, o lo o i totonu o le ‘hall’ la e fai ai le Bingo.  Ae talosaga atu lenei alii ia la’ua e o e fai ia Vao, o ia lea e i fafo.  Sa faapea loa ona o nei tamaitai talavou ma ta’u ia Vao lea tulaga.

Ae na faatonu e le fafine ia teineiti nei, e o e fai i le alii lea, e alu atu i totonu.  Sa faamatala foi e le molimau, e le i umi na alu i totonu le alii lea, ae toe sau i fafo ma fai atu ia la’ua e o e avea ana pepa bingo i totonu ma tu’u i luga o lana laulau, ma sa faapea ona faia e nei tamaitai talavou.

Ona faamatala lea e le molimau, po o le tamaitai 14 tausaga, na alu e ave le mea tausami a le faifeau, ae ina ua toe fo’i mai, sa ia vaaia ai lenei alii o tagotago atu i lana tausoga.

O lo o ta’ua foi i faamaumauga a leoleo, le fa’ato’ese o le ua molia ma faapea atu, e na te le toe faia.  E le gata i lea, o lo o aofia i faamaumauga a leoleo le manu’a o tua o le ulu o le ua molia, ae peitai, sa musu e togaftia.

E le i ta’ua i totonu o faamaumauga a leoleo le mafuaaga na manu’a ai lenei alii, ma po o fea fo’i na manu’a mai ai.

Sa lokaina loa lea alii i lea po, ma e $10,000 le tupe faatulagaina e mafai ona tatalaina ai o ia i tua, e faatali ai lona faamasinoga.