Molia se alii i le faaoolima ona ua lau lona ‘fia malosi’

Pago Pago - AMERIKA SAMOA

O le aso 30 o Setema i le 10:47 i le taeao, na valaau atu ai se tamaitai i le ofisa a leoleo mo se fesoasoani, ona o le alii o Christopher To’omata, o lo o fa’atupu faalavelave i le afioaga o Laulii, Aumi, ma ua faaoolima ai i lona tuagane.

Ina ua taunuu leoleo i le nofoaga na tupu ai le faalavelave, sa faamalamalama atu iai e si mafine na valaau i le ofisa a leoleo, na tamomo’e ona tei laiti ma ta’u atu ia te ia, o lo o fasi e To’omata ia lona tuagane.  Na faamatala e le tamaitai le oso o Toomata i luga o le latou taavale ma tatu’i foliga o lona tuagane, ona sola ese lea.

Ae na toe foi atu ma toe fasi le ua a’afia i lenei faalavelave.  Ina ua iloa mai e Toomata ia leoleo, na toe sola ese o ia.

Sa faamatala e le na a’afia i le faalavelave, e le o iloa e ia pe aisea ua ita ai To’omata ia te ia.  Sa ia faamatala e faapea, sa faia se la inuga pia ma sana uo i luga o le latou pikiapu, ae alu atu To’omata ma suesue o ia.  Na fa’ate’ia o ia ina ua fasi o ia e To’omata ma togi lona ulu i se fagu pia.

Na saili e leoleo ia To’omata ae peitai, e le i maua o ia.  Sa faatonuina le aiga o le alii na lavea i lenei faalavelave, ina ia valaau vave atu le ofisa a leoleo pe a toe fo’i atu Toomata.

E pe a ma le 30 minute na toe foi ai leoleo i lo latou ofisa, ae toe valaau atu le tuafafine o le ua a’afia i lenei faalavelave, ma ta’u atu i leoleo, o To’omata la ua i le latou fale.  Na maua atu e leoleo To’omata o lo o taotooto i lona moega ma ula lana sikareti.

Na o latou aveina loa To’omata i le ofisa a leoleo i Fagaitua ma fa’aauauina ai a latou suesuega, lea sa faamatala ai e To’omata, na ia fasia le ua a’afia i lenei faalavelave, ona ula atu ia te ia, o ia e ‘fia malosi’.

O lo o ua molia nei To’omata i le faaoolima i lona tulaga e tolu.  E $300 le tinoitupe ua faatulaga e mafai ona tatala ai i tua.