Molia se alii i le fa’ao’olima i lona tuafafine

Pago Pago - AMERIKA SAMOA

E tusa ai ma faamaumauga a le malo, o le aso 16 o Iulai i le 8:30 i le po, na telefoni ai se tamaitai i le Ofisa a Leoleo i Tafuna, e ripotia iai lona tuagane, i le faatupu misa i totonu o le latu aiga ma le tauaia o mea totino i fafo o le fale, a’o lo’o iai lona tina i totonu o le fale.

(O le a le lomia e le Samoa News suafa o i latou ua a’afia i lenei mataupu, aua le puipuiga o fanau.)

Sa aga’i atu loa leoleo i le nofoaga na tupu ai le faalavelave ma talatalanoa ma le tamaitai na valaau mai i le ofisa a leoleo, o ia lava lea o le tuafafine o le ua molia.

Na fa’amatala e le tamaitai le le fiafia o lona tuagane ina ua leiloa ona seevae.  Ma a’o ia (tuafafine) taumafai e se’i ‘ese mai le ki o le taavale mai i lona tuagane, ina ia ave’ese mai ana meatotino mai totonu o le taavale, sa tulei o ia e lona tuagane ma pa’u ai.  O iina lea na ia savali mai ai loa i fafo o le fale, ma vala’au leoleo mo se fesoasoani.

O lo’o ta’ua foi i totonu o faamaumauga le fa’atalanoaina e leoleo se teineititi e tau i le aiga ma sa faamatalaina e le teineititi laititi lenei, lona molimauina o se taugaupu i le va o lona ‘aunty’ ma lona ‘uncle’.  Ma sa ia ta’ua foi le ita o lona ‘uncle’ ona ua le maua ona seevae, ae e le iloa e lona ‘aunty’, po o fea o iai.

Na ta’ua foi e le molimau talavou le ita tele o le ua molia ma amata ona palauvale leotele i totonu o le fale.  Ma na u’una’i e lona ‘uncle’ ia lona ‘aunty’ ma pa’u ai lona ‘aunty’, ae o lo’o taumafai lona ‘aunty’ e ave’ese le ki o le taavale mai lona ‘uncle’.

Sa faapea loa ona lokaina e leoleo ia le ua molia ma aveina atu o ia i le ofisa a leoleo mo le fa’aauauina o a latou su’esu’ega.

Na faamatalaina e le ua molia i leoleo, sa fai se la tauga’upu ma lona tuafafine ona sa su’e ona se’evae, ae ona iloa mulimuli ane, na lafoa’i e lona tuafafine i le lapisi.  O le mafua’aga lea na ita ai ma ia faatalitali ai se’i toe fo’i atu.

Ma ina ua toe fo’i atu lona tuafafine, sa ta’ua e le ua molia, na ia savali i le umukuka ma u’u mai le ki o le taavale ma faatonuina lona tuafafine, e le toe mafai ona fa’aaogaina e ia le taavale, ona o lana amio.

Sa ta’ua foi e le ua molia, lona savali atu i totonu o lona potu o le a tapuni mai le faitoto’a ae tamo’e atu lona tuafafine u’una’i le faitoto’a o lona potu ma ulufale faamalosi atu i totonu o lona potu e aumai le ki o le taavale.

Ua molia nei lenei alii e 35 tausaga, i moliaga, e aofia ai;

Faitauga 1:  Faatupu vevesi i totonu o aiga (DV) – o se vaega ‘C’ o solitulafono mama, e mafai ona nofosala ai i le falepuipui i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu (DV) – o se vaega ‘C’ o solitulafono mama, e mafai ona nofosala ai i le o’o atu i aso e sefululima (15), po o se sala tupe e $300; po o faasalaga uma e lua.

E $500 le vaegatupe sa faatulagaina e mafai ona tatalaina ai le ua molia, e faatalitali ai lona faamasinoga.