Molia se alii 34 tausaga i lona faaoolima i se alii talavou

Pago Pago - AMERIKA SAMOA

O le aso 7 o Aukuso, 2023 na lokaina ai e leoleo se alii e 34 tausaga le matua ona o se valaau na o’o atu i le ofisa leoleo i Fagatogo mai i se aiga o lo o manaomia se fesoasoani i se alii fa’asuaava o lo o taumafai e titina le ua o se latou tamaititi talavou, i se fusipa’u.

Ina ua taunuu atu leoleo i le fale o le aiga na valaau mai i le ofisa a leoleo, na ta’u atu iai e le ulugalii, ua sola le alii 34 tausaga ina ua faalogo mai ua valaau leoleo.  Sa faatonuina e le tina o le aiga ia lana fanau e toatolu e fa’aali o latou manu’a i leoleo, ma sa fautuaina loa i latou e sui malu o le malo, ina ia agai atu i le falemai i Faga’alu e togafitia o latou manu’a.

O le po lava lea na amataina ai suesuega a leoleo , e saili le alii o Ernie Feula lea na masalomia i lenei faalavelave, ae peitai, sa le i faamanuiaina a latou suesuega.

Ae o le 1 i le vaveao o le aso na soso’o ai, na toe valaau atu ai le tama o le aiga i le ofisa leoleo i Fagatogo ma faailoa atu iai, o lea ua toe foi ifo Ernie i lo latou fale.  Ae peitai, e toe taunuu atu foi leoleo, ua toe sola foi lenei alii ma sa toe tau saili foi ae e le i mauaina o ia.

Sa faapea ona aveina atu le aiga i le ofisa a leoleo mo le faatalanoaina o I latou.

Sa faamatala e le atalii matua, lea o lo o masalomia sa faaoolima iai Ernie, sa o latou taalo i fafo ma nai ona tei laiti, ae le fiafia ai le ua molia i lo latou pisapisao.  Ma o lea na sau ai i fafo Ernie ma lana fusipai ma sasa o ia faapea ma lona tuafafine laititi.

Sa ta’ua foi e le alii talavou lea, sa taumafai e tamo’e i totonu o le latou fale ona ua te’i ina ua taumafai le ua molia e titina lona ua i le fusipa’u.

Sa taumafai lea alii talavou e valaau mo se fesoasoani ma sa iloa mai e lona tuafafine le mea o lo o tupe ma ia tamo’e ai ma ta’u i ona matua ma o lea na tamo’e mai ai le tina o le aiga ma u’unai ese le ua molia mai i lona alo.  

Ua ta’ua le iai o ni manu’a i le ua o le atalii talavou faapea ma le papatua o lona tuafafine.

Sa faamaonia e le tina ia faamatalaga a lona alo ma sa faamatala e le tina le tamo’e o le ua molia i totonu o le potu ma taumafai e faaoolima i lona toalua, e ala i lona tago i le u’u mai se nofoa o le a faaoolima ai i le tamaloa.  Ae peitai, na oso atu le tina ma tu i luma o lona toalua, lea na manu’a ai ona foliga.

Na tulai mai ai loa se fusuaga i le va o le alii ua molia ma le tama ole aiga ma feosofi mai ai nisi o le aiga e taofi le misa ma toso ese atu le alii o Ernie.

Sa tutusa le molimau a le tama o le aiga ma le tina o le aiga.

Ina ua maea ona faatalanoaina le ulugalii, sa o la faailoa atu i leoleo o lea na faafesootai atu i la’ua e lo la alo, o lea ua toe fo’i atu Ernie i lona fale ma o lo o folafola lona fasiotia o le tama o le aiga, ma o lo o faatali mai i le fale ma se agaese, e pei ona ta’ua i faamaumauga a le faamasinoga.

Sa nonofo le aiga i le ofisa o leoleo a o feagai sui malu o le malo ma le sailiga o le ua molia.  O le 7:37 i le taeao na maua atu ai Ernie o tofa i lalo o se pupu vao.

Na aveina atu o ia e leoleo i le ofisa o leoleo ma sa molimauina e leoleo le manogi fa’asuaava o lenei alii.  Sa tete’e Ernie e le fia faia sana faamatalaga e tusa ai ma le faalavelave na tupu.

Ma ua molia nei o ia i faitauga e tolu o le sauaina o fanau iti, o moliaga i le faatupu vevesi faapea ma faitauga e lua i le faia o ni gaioiga e ono aafia ai le saogalemu o fanau iti, ma faitauga e lua o le faaoolima i le tikeri e tolu.

E $20,000 le tupe faatulaga e mafai ona tatalaina ai le ua molia, mai i le falepuipui.