Molia se alii 26 tausaga i le fa’atupu vevesi ma le faomea

Pago Pago - AMERIKA SAMOA

O le taeao o le aso muamua o Iuni, na lipotia ai e se tamaitai se alii sa faia se la faigauo ona o le fa’atupu vevesi i le fale o le tamaitai, i Nu’uuli.

(Ona o le alo a le tamaitai o lo’o a’afia, o le a le lomia ai suafa o i latou o lo’o a’afia i lenei mataupu.

Sa talosagaina e le tamaitai ia le ave’esea o lenei alii mai lona fale ona o sona popolega ina ne’i fa’ao’olima lenei alii ia te ia.

Sa mafai ona maua se feso’ota’iga a leoleo ma le ua molia, i lo latou aiga i Nu’uuli ma sa fa’ailoa atu iai e leoleo, i luma o le tua’a o le ua molia, ia le lipoti ua o’o atu i lo latou ofisa.

Na molimauina e leoleo le iai o ni manu’a i foliga o lenei alii ma ina ua fesiligia o ia i le mafua’aga ua a’afia ai ona foliga, sa ta’ua e lenei alii, na manu’a mai i sana galuega i se fa’ato’aga i lea taeao.

Sa ta’ua foi e le ua molia, na mafua ona iai i le fale o le tamaitai, ona sa alu atu e aumai lana ato tupe ma lana ‘bank card’.  Sa ta’ua foi e leoleo, e ui ina ua le uma le faigauo a le ua molia ma le tamaitai na a’afia, ae peitai, sa taofia pea e le ua molia ia se taulima auro (14kt) a le tamaitai na a’afia.  Ma na mana’o le ua molia e fesuia’i le taulima ma lana ato tupe.

Na fa’amatala e le ua molia, na savali atu e fa’afetaui le taunu’u atu o le ta’avale a le tamaitai, ae peitai sa ia va’aia le toe solomuli o le ta’avale ma toe alu ese.  Sa te’ena e le alii ia lona taumafai e taofi le ta’avale a le tamaitai.

Na fa’ailoa atu loa e leoleo i le ua molia, o le a toe fa’afo’i atu lana ato tupe ma sa fautuaina o ia e aua ne’i ona toe fa’alavelave i le tamaitai ua a’afia, i so’o se taimi, i le lumanai.

Na maua se avanoa e fa’atalanoa ai e leoleo ia le tamaitai na a’afia i le Ofisa a Leoleo i Tafuna, lea sa ia faamatalaina ai le gaoia e se tasi o ana meatotino sa i lona fale, i le aso lava e tasi lea na tupu ai le fa’alavelave e pei ona ta’ua i luga, faapea isi fa’alavelave na tula’i mai i lo la va ma le ua molia.

Na fa’amalamalama e le tamaitai na a’afia, sa ia nofo malamalama i le gaoia o ana meatotino i totonu o lona fale, ina ua ia toe fo’i atu mai i se la tafaoga ma lona uso.

Sa faamatala e lenei tamaitai, na faamutaina le la faigauo ma le ua molia, i le lua vaiaso ae e le’i tupu lenei fa’alavelave.  O le aso muamua o Iuni, ina ua alu i lona fale, sa ia va’aia ai le ua molia, o tu i luma o lona fale, ma o le mafua’aga lea na ia toe liliu ai lana taavale ma toe alu ese atu ai, ona o lona fefe ina ne’i ona fa’ao’olima ia te ia.

Sa ta’ua e le tamaitai, e le o se taimi muamua lea na taumulimuli atu ai le ua molia, ia te ia.  Sa ia fa’aleoina sona popolega ina ua alu atu le ua molia ma taumafai e tatala le faitoto’a o lana ta’avale.

E tusa ai ma fa’amaumauga a leoleo, na oso le ua molia i luga o le taavale ma palauvale atu i le tamaitai, a’o matamata mai ana tuaoi.

Sa ta’ua foi e le tamaitai lona valaauina o leoleo i lea lava aso mo se fesoasoani ina ia ave’esea le ua molia mai luma o lona fale.  Ma ina ua logotala le tamaitai ua mae’a ona ave’esea le ua molia mai luma o lona fale, sa ia toe fo’i loa i lona fale ma ia va’aaia ai le gaoia e se tagata o ana meatotino mai lona fale.

Sa ta’ua e le tamaitai le leai o le ‘charger’ a lana telefoni ma lana tusi folau mai luga o le fata i totonu o le umukuka ma ina ua aga’i atu i totonu o le potu a lana tama teine, sa ia va’aia ni pu pu i le puipui o le potu.

E le gata i lea, sa iai se la’au na taofi ai le fa’amalama (sliding window) mai i le faigofie ona tatalaina, ae ua ave’esea.  Na ia va’aia ai le matala o le ‘screen wire’ ma le fa’amalama.

Ina ua fa’aauau lana su’esu’ega, na va’aia ai foi e lenei tamaitai le tele o ana mea totino ua leiloloa, e aofia ai sana uati sa i totonu o le faleta’ele ma sa ia va’aia foi le toto o totonu o le fa’ata’anoa (sink) i totonu o le faleta’ele ma e foliga mai sa ta’ele se tasi.

Sa fa’amatala e le tamaitai, lona manatuaina o se mea na tupu i le vaveao o le taeao muamua, lea na tu ai i se faleoloa ae ona va’aia ai le ua molia, o oso mai fafo mai lana ta’avale.  O lea na ia toe solomuli ai lana ta’avale ma alu ese, ae peitai, sa ia va’aia le mulimuli atu o le ta’avale lea na oso mai ai le ua molia.

Sa ta’ua e le tamaitai lona fefe ma masalosalo, ina ua tu le ta’avale lea na mulimuli atu ia te ia, i le moa o le auala ma poloka mai ai o ia, ae oso mai i fafo le ua molia ma savali atu i lana ta’avale ma tatala fa’amalosi le faitoto’a, i le itu e nofo ai le pasese.  Ona tago lea o le ua molia i le se’i atu lana telefoni ma palauvale atu ia te ia.  

O se taimi mulimuli ane na mafai ona toe maua mai ai le telefoni a le tamaitai mai i le ua molia.

Sa ave faapagotaina e leoleo ia le ua molia mai lona aiga ma fa’atalanoaina o ia e tusa ai ma le lipoti a le tamaitai.  

Na mauaina foi meatotino a le tamaitai, e pei ona ia fa’amatalaina i leoleo, i totonu o le ato fa’afafa a le ua molia.  E le gata i lea, na maua ai foi ma le ato tupe a le ua molia i totonu o lana ato fa’afafa, ae o lea na ia fai i leoleo, sa ave e le tamaitai na a’afia.

Sa fa’amaonia e le ua molia ia le molimau a le tamaitai, e tusa ai ma le fa’alavelave sa tupu i luga o le auala ma sa ia ta’ua, na mafua ona ia aveina le telefoni a le tamaitai ua a’afia, ona o le tiga o lona loto ina ua ia vaai i seisi alii i totonu o le ta’avale a le tamaitai ua a’afia.

Sa fa’amaonia foi e le ua molia lona oso i luga o le ta’avale a le tamaitai, e taofi ai lana ta’avale, ae peitai, sa ia te’ena tu’ua’iga i lona gaoia o ana (tamaitai) meatotino.

E tusa ai ma fa’amaumauga a leoleo, o le tau aofai o meatotino sa gaoia, e $720.

Ua molia nei lenei alii i moliaga e tolu:

Faitauga 1:  Faomea i lona tulaga e lua – o se vaega ‘C’ o solitulafono mamafa, e mafai ona nofosala ai i le falepuiui, i le le silia ma le fitu (7) tausaga, po o se sala tupe e le silia ma le $5,000; po o fa’asalaga uma e lua.

Faitauga 2:  Gaoi – o se vaega ‘C’ o solitulafono mamafa, e mafai ona nofosala ai i le falepuipui, i le le silia ma le fitu (7), po o se sala tupe e le silia ma le $5,000; po o fa’asalaga uma e lua.

Faitauga 3:  Faatupu vevesi i nofoaga faitele – o se vaega ‘B’ o solitulafono mama, e mafai ona nofosala ai i le falepuipui e le silia ma le ono (6) masina, po o se sala tupe e $500; po o fa’asalaga uma e lua.

E $3,000 le vaegatupe fa’atulagaina e mafai ona tatalaina mai ai le ua molia mai i le falepuipui, e fa’atalitali ai lona fa’amasinoga.